BILANGAN 3 - Susula Malalaok Hehelu Palak Ma Hehelu Beuk

Harun anan-nala

¹ Musa ma Harun teidale-bobongin nanasulak nde dae ia, nai lelek Manetualain kokolak no Musa neme Letek Sinai lain:

² Harun anatoun haa, de uluk na'de Nadab, basa boema Abihu, Eleazar ma Itamar.

³ Sila nanandoo eik da'di imam nenik ala po'a mina neu langan lain.

⁴ Tehu mate Nadab ma Abihu nai moo solokaek Sinai-a, ndek lelek lasasalematak loo Manetualain nenik ha'i nalulik. Duas ana tak. Da'di nai lelek Harun bei naso'da, Eleazar ma Itamar lalalau-laoono da'di leo imam.

Hataholi Lewi-la, nananatu'duk soaneu lalalau-laoono imam-mala

⁵ Manetualain nafa'da Musa nae,

⁶ Madenu leo Lewi-la mai lataa, fo matu'dus sila da'di Harun malalau-maoonon.

^7-8 Lalalau-laoono nai Au Lalaa Temang-nga, ma muse lalalau-laoono basa imam-mala, boema basa hataholi Israel-la, nenik sila bela-ba'un manai Au Lalaa Temang ndia, da'di leo hataholi Israel-la ngganggatin-na.

⁹ Neme leoina Israel-la mai, ka'da leo Lewi-a nde Au fen bela-ba'uk da'di malalau-maoono lahele neu Harun ma tititi-nonosin.

¹⁰ Tehu o muse so'u Harun no anan-nala, fo lakalalaok bela-ba'uk da'di leo imam; fe'ek neme sila mai, metema su'di see boe, fo ana so'ba-so'ba nakalala'ok bela-ba'uk ndia soona, muse huku nisan.”

¹¹ Manetualain nafa'da Musa nae,

^12-13 “Besak ia, Au hele hataholi Lewi-la da'di Au nuung so. Lelek Au taoisa la'iesak leoina Masir-ra anatou ulun-nala, Au hele hehelik ba'eneu Au, basa hataholi Israel-la anatou ulun-nala, ma basa sila bana-manun-nala ana makasososan-nala. Au nuung basa sila lala'en-na. Da'di leo hataholi Israel-la anatou ulun-nala ngganggatin-na, Au ho'i-a hataholi Lewi-la soaneu Au; neukose ala da'di Au nuung. Au nde Manetualain.”

Leke hataholi Lewi-la dede'un-nala

¹⁴ Manetualain nadenu Musa neme mook solokaek Sinai-a,

¹⁵ fo ana sulak hataholi-la dede'un-na, tunga esa-esak leo-ingu ma teidale-bobongin; basa ni'iana touanak fo teun-na besak-ka bulak esa leo lain neu, muse sulak na'den-na.

¹⁶ Boema Musa nakalala'ok Manetualain paletan ndia.

^17-20 Lewi anatoun telu: fo nde Gerson, Kehat ma Merari. Teidale-bobongin-nala bei-ba'i kain nde sila, de loke na'den-nala tunga bei-ba'i kain-nala na'den-na. Gerson anatoun dua: fo nde Libni ma Simei. Kehat anatoun haa: fo nde Amram, Yizhar, Hebron ma Uziel. Merari anatoun dua: fo nde Mahli ma Musi. Teidale-bobongin-nala bei-ba'i kain nde sila, de loke na'den-nala tunga bei-ba'i kain-nala na'den-na.

²¹ Teidale-bobongik manai leo-ingu Gerson-na dalek nde, teidalek Libni ma teidalek Simei.

²² Leo-ingu Gerson-na anatoun fo teun-na besak-ka bulak esa leo lain neu, dede'un-na nanasulak nde been-na, hataholi lifun hitu natun lima.

^23-24 Elyasaf fo Lael anan-na, nde nalanga leo-ingu ndia. Nai leoina Israel-la mamana ofun-na dalek, leo-ingu ndia mamanan-na nai boboak muli, fo nai Manetualain Lalaa Teman-na dean-na.

²⁵ Nai ito-ato Manetualain Lalaa Teman-na, leo-ingu ndia mete-nakanae Lalaa Temak-ka no lalaan-na, temak manai lelesu masok-ka,

²⁶ laa manaokofeon-na Lalaa Temak-ka so'dan-na no mei tunu-hotuk, ma uma so'dak ndia tema lelesun-na. Sila mete-lakanae basa tatao-nono'ik lala'en fo natu'tik no bua-lo'as sila-la.

²⁷ Teidale-bobongik manai leo-ingu Kehat-ta dalek nde, teidalek Amram, Yizhar, Hebron ma Uziel.

²⁸ Touk fo teun-na besak-ka bulak esa leo lain neu, nai leo-ingu ndia dalek, basa-basan dede'un-na, hataholi lifun falu natun nee. Sila bela-ba'un nde ito-ato bua-lo'as manai Manetualain Lalaa Teman dale.

^29-30 Elisafan fo Uziel anan-na, nalanga leo-ingu ndia. Nai ofu dale, leo-ingu ndia mamanan-na nai Manetualain Lalaa Teman-na boboan kona.

³¹ Sila nde mete-lakanae Peti Hehelu-balataak, mei, banu eik, mei tunu-hotuk-kala, hata-heto fo imam-mala paken nai Kama Malalao-malalafuk dale, ma tema lelesu fo manata'da fe'e Kama Malalao-malalafuk-ka. Ala mete-lakanae basa tatao-nono'ik lala'en fo bei natu'tik no bua-lo'as sila-la.

³² Leo Lewi-a mane leon-na nde Eleazar fo Harun anan-na. Nanea hataholi manamalalau-maoono manai Kama Malalao-malalafuk-ka.

³³ Teidale-bobongik manai leo-ingu Merari dalek nde teidalek Mahli ma teidalek Musi.

³⁴ Touk fo teun-na besak-ka bulak esa leo lain neu, nai leo-ingu ndia dalek, basa-basan dede'un-na, hataholi lifun nee natun dua.

³⁵ Abihail fo Zuriel anan-na nalanga leo-ingu ndia. Nai ofu dale, leo-ingu ndia mamanan-na nai, Manetualain Lalaa Teman-na boboan kii.

³⁶ Ala mete lakanae Lalaa Temak ndia dii-ain, fo nde lolon-nala, diin-nala, laten-na, ma basa taka-besi, boema basa tatao-nono'ik fo bei natu'tik no bua-lo'as sila-la.

³⁷ Sila boeo lanea Lalaa Temak-ka so'dan manai deak-ka diin-nala, laten-nala, ai papakun-nala ma talin-nala.

³⁸ Nai ofu dale, Musa no Harun boema anan-nala mamanan-na nai Manetualain Lalaa Teman-na uluk, fo nai boboan dulu. Ala mete-lakanae leoina Israel-la makaluku-makatelen, nai Kama Malalao-malalafuk dale. Fe'ek neme hataholi sila-la mai, su'di see boe, fo ana so'ba-so'ba tao tatao-nono'ik ndia soona, muse hukunisan.

³⁹ Basa ni'iana touanak manai leo Lewi dale, fo teun-na besak-ka bulak esa leo lain neu, Musa sulak-kasa tunga esa-esak leo-ingu, tunga Manetualain paletan-na, de basa-basan lala'en-na, hataholi lifun duahulu dua.

Hataholi Lewi-la, da'di leo mananggati neu Israel anatou ulun-nala

^40-41 Manetualain nafa'da Musa nae, “Basa Israel anatou ulun-nala nde been-na, Au nuung. Sulak-ma, ni'iana fo teun besak-ka bulak esa leo lain neu na'den-nala. Tehu mananggati ni'iana sila-la, Au aketu basa, hataholi Lewi-la lala'en-na, ala da'di Au nuung. Au nde Manetualain! Ma basa hataholi Lewi-la bana-manun boeo, Au aketu basa, ala da'di mananggati neu basa leoina Israel-la bana-manu anan fo nanabongi makasososan-na.”

⁴² Musa tao tunga Manetualain paletan-na; ana sulak basa ni'iana touana uluk-kala na'den-na,

⁴³ fo teun besak-ka bulak esa leo lain neu. Basa-basas, hataholi 22.273.

⁴⁴ Boema Manetualain nafa'da Musa nae,

⁴⁵ “Fe hehelik hataholi Lewi-la leo Au mai, fo da'di leo mananggati neu basa Israel ana ulun-nala; hataholi Lewi-la bana-manun-nala boeo, da'di leo Israel bana-manun ngganggatin-na.

⁴⁶ Hu kande Israel anatou ulun-nala de'u lena natun dua hituhulu telu neme hataholi Lewi-la mai, de emi muse soi-ma lenak sila-la.

⁴⁷ Emi muse bae ni'iana esa soona, doifulak lima, tunga belik fo nanapakek nai Au Lalaa Temang-nga;

⁴⁸ fe doik sila-la leo Harun no anan-nala neu.”

⁴⁹ Musa tao tunga Manetualain paletan ndia;

⁵⁰ Ana ho'i-na doi fulak 1.365

⁵¹ de ana fen leo Harun no anan-nala neu.