BILANGAN 29 - Susula Malalaok Hehelu Palak Ma Hehelu Beuk

Tunu-hotuk nai Feta Teu Beuk-ka

¹ Neu hataholi Yahudi-la bula ka hitun-na, fain esa soona, emi muse makabubua fo makaluku-makatele, ma ta bole maue-le'di ue-le'dis mabela fa. Nai faik ndia, muse puu pupuuk-kala.

² Tunu-hotu fe Manetualain tutunu-hohotu nanatunuk, nalupa sapi maneanak esa, bi'ilopo mane esa, ma bi'ilopo ana maneanak hitu, besak-ka teuk beke esak, ma ta lu'u la'ak fa. Tutunu-hohotuk sila-la boon-na, nandaa no Manetualain dalen-na.

³ Boeo, tunu-hotu tutunu-hohotu nana'ak, fo nau do ta nau fa, emi muse tunu-hotun, nalupa ha'desopuk nanasese'dok mina setun: fo nde sapi mane-a, ha'desopuk kilo telu, bi'ilopo mane-a, ha'de sopuk kilo dua,

⁴ ma bi'ilopo ana-la, esan-na ha'desopuk kilo esa.

⁵ Boeo, tunu-hotu bi'ihiik mane esa, soaneu tutunu-hohotuk fo, sala-singok hapu do'o do ampon. No enok ndia, emi tao feta soaneu hataholi Israel-la, sala-singon nanakoka henik.

⁶ Tutunu-hohotuk sila-la, nalupa tatamak neu tutunu-hohotu nanatunuk-ka, sama-sama no tutunu-hohotu nana'an-na, nai tunga-tunga bulak-kala fain esa. Boeo, nalupa tatamak neu tutunu-hohotu nanatunu tunga faik-ka, fo tunu-hotun sama-sama no tutunu-hohotu nana'ak-ka, ma tutunu-hohotu angol-la. Tutunu-hohotu nanatunuk ndia boon-na, Nandaa no Manetualain dalen-na.

Tunu-hotuk nai Faik fo Sala-singok hapu do'o do ampon

⁷ Neu hataholi Yahudi-la bula ka hitun-na, fain sanahulu soona, emi muse makabubua, fo makaluku-makatele. Nai faik ndia, emi muse okaaom-mala, ma ta bole maue-male'di fa.

⁸ Tunu-hotu fe Manetualain tutunu-hohotu nanatunuk, nalupa sapi maneanak esa, bi'ilopo mane esa, ma bi'ilopo ana maneanak hitu, besak-ka teuk beke esak, ma ta lu'u la'ak fa. Tutunu-hohotuk ndia boon-na, nandaa no Manetualain dalen-na.

⁹ Tunu-hotu tutunu-hohotu nana'ak fo, nau do ta nau fa, emi muse tunu-hotun, nalupa ha'desopuk nanasese'dok mina setun: fo nde sapi mane-a, ha'desopuk kilo telu, bi'ilopo mane-a, ha'desopuk kilo dua,

¹⁰ ma bi'ilopo ana esan-na, ha'desopuk kilo esa.

¹¹ Boeo, tunu-hotu bi'ihii mane esa, soaneu feta hataholi Israel-la sala-singon, nanafe do'do do ampon. Fe'ek neme tutunu-hohotuk fo, sala-singok hapu do'o do ampon, ma tutunu-hohotu nanatunuk tunga faik-ka, sama-sama no tutunu-hohotu nana'ak-ka, ma tutunu-hohotu angol fo nanatunu-hotuk nai faik ndia.

Tunu-hotuk nai Feta Lalaa Akidook-ka

¹² Nai hataholi Yahudi-la, bula ka hitun-na, fain sanahulu lima soona, emi muse makabubua, fo makaluku-makatele, ma ta bole maue-male'di ue-le'dis mabela fa. Nai faik hitu dalen-na, emi muse tao feta soaneu fe ha'da-holomata neu Manetualain.

¹³ Nai fai makasososak-ka, tunu-hotu fe Manetualain tutunu-hohotu nanatunuk, nalupa sapi maneanak sanahulu telu, bi'ilopo maneanak dua, ma bi'ilopo ana maneanak sanahulu haa, besak-ka teuk beke esak, ma ta lu'u la'ak fa. Tutunu-hohotuk sila-la boon-na nandaa no Manetualain dalen-na.

¹⁴ Boeo, tunu-hotu tutunu-hohotu nana'ak, fo nau do ta nau fa, emi muse tunu-hotun, nalupa a'desopuk nanasese'dok mina setun: fo nde sapi mane esan-na, ha'desopuk kilo telu, bi'ilopo mane esan-na, ha'desopuk kilo dua,

¹⁵ ma bi'ilopo ana esan-na, ha'desopuk kilo esa. Boeo muse tunu-hotu angol fo nanapaluuk-ka, sama-sama no tutunu-hohotu nana'ak ndia.

¹⁶ Fe-ek neme ndia mai, tunu-hotu bi'ihiik mane esa boe, soaneu tutunu-hohotuk fo, sala-singok hapu do'o do ampon. Tutunu-hohotuk ndia, nalupa tatamak neu tutunu-hohotu nanatunuk tunga faik-ka, sama-sama no tutunu-hohotu nana'ak-ka, ma tutunu-hohotu angol-la.

¹⁷ Nai faik-ka duan-na, tunu-hotu sapi maneanak sanahulu dua, ma bi'ilopo mane dua, ma bi'ilopo ana maneanak sanahulu haa, besak-ka teuk beke esak, ma ta lu'u la'ak fa

^18-19 Tunu-hotu basa sila-la, sama-sama no basa tutunu-hohotu fe'ek-kala, sama leo tutunu-hohotuk nai fai makasososak-ka.

²⁰ Neu faik-ka telun-na, tunu-hotu sapi maneanak sanahulu esa, bi'ilopo mane dua, ma bi'ilopo ana maneanak sanahulu haa, besak-ka teuk beke esak, ma ta lu'u la'ak fa

^21-22 Tunu-hotu basa sila-la, sama-sama no basa tutunu-hohotu fe'ek-kala, sama leo tutunu-hohotuk nai fai makasososak-ka.

²³ Neu faik-ka haan-na, tunu-hotu sapi maneanak sanahulu, bi'ilopo mane dua, ma bi'ilopo ana maneanak sanahulu haa, besak-ka teuk beke esak, ma ta lu'u la'ak fa.

^24-25 Tunu-hotu basa sila-la, sama-sama no basa tutunu-hohotu fe'ek-kala boe, sama leo tutunu-hohotuk nai fai makasososak-ka.

²⁶ Neu faik-ka liman-na, tunu-hotu sapi maneanak sio, bi'ilopo mane dua, ma bi'ilopo ana maneanak sanahulu haa, besak-ka teuk beke esak, ma ta lu'u la'ak fa.

^27-28 Tunu-hotu basa sila-la, sama-sama no basa tutunu-hohotu fe'ek-kala boe, sama leo tutunu-hohotuk nai fai makasososak-ka.

²⁹ Neu faik-ka neen-na, tunu-hotu sapi maneanak falu, bi'ilopo mane dua, ma bi'ilopo ana maneanak sanahulu haa, besak-ka teuk beke esak, ma ta lu'u la'ak fa.

^30-31 Tunu-hotu basa sila-la, sama-sama no basa tutunu-hohotu fe'ek-kala boe, sama leo tutunu-hohotuk nai fai makasososak-ka.

³² Neu faik-ka hitun-na, tunu-otu sapi maneanak hitu, bi'ilopo mane dua, ma bi'ilopo ana maneanak sanahulu haa, besak-ka teuk beke esak, ma ta lu'u la'ak fa.

^33-34 Tunu-hotu basa sila-la, sama-sama no basa tutunu-hohotu fe'ek-kala boe, sama leo tutunu-hohotuk nai fai makasososak-ka.

³⁵ Neu faik-ka falun-na, emi muse makabubua, fo makaluku-makatele, ma ta bole maue-male'di ue-le'dis mabela fa.

³⁶ Tunu-hotu fe Manetualain tutunu-hohotu nanatunuk, nalupa sapi maneanak esa, bi'ilopo mane esa, ma bi'ilopo ana maneanak hitu, besak-ka teuk beke esak, ma ta lu'u la'ak fa. Tutunu-hohotuk sila-la boon-na, nandaa no Manetualain dalen-na.

^37-38 Tunu-hotu basa sila-la, sama-sama no basa tutunu-hohotu fa'ek-kala boe, sama leo tutunu-hohotuk nai fai makasososak-ka.

³⁹ Basa sila-la nde da'di nakanenetek la'eneu tutunu-hohotu nanatunuk, tutunu-hohotu nana'ak, tutunu-hohotu angol, boema tutunu-hohotu mole-dame, fo emi muse tunu-hotu fen neu Manetualain nai emi fai malolem-mala, fo nananaketu basak so. Tutunu-hohotuk sila-la, nalupa tatamak neu tutunu-hohotuk fo, emi tunu-hotun soaneu bae nasar, do tutunu-hohotuk fo, emi fe tunga emi dale hihii-nanau mesam-ma.

⁴⁰ Musa nanduku-nalosak neu leoina Israel-la, basa hata lala'en, fo Manetualain paleta neun.