BILANGAN 26 - Susula Malalaok Hehelu Palak Ma Hehelu Beuk

Leleke ka dua

¹ Soe ndia basa boema, Manetualain nafa'da Musa ma Eleazar, fo Imam Harun-na upun-na nae,

² “Emi muse leke la'iesak hataholi Israel-la lala'en-na, tunga esa-esak teidalen. Emi muse sulak basa touk fo, teun duahulu leo lain neu, fo nandaa teken solda'du so.”

^3-4 Musa ma Eleazar, lakalala'ok paleta ndia. De laloo basa touk fo, teun duahulu leo lain neu, de ala fe lakabubua leme masadokek Moab-pa, nai Lee Yarden-na selik, fo deka no kota Yerikho-a. Hataholi Israel fo manakalua leme Masir mai-a, nde ia:

⁵ Neme leo Ruben, fo Yakob ana ulun-na nde: Henokh, Palu,

⁶ Hezron ma Karmi.

⁷ Touk manai leo-ingu sila-la dalek, hataholi lifun haahulu telu, natun hitu teluhulu.

⁸ Palu anan-na nde: Eliab,

⁹ ma Eliab anan-nala nde: Nemuel, Datan ma Abiram. Hataholi Israel-la hele basa Datan ma Abiram so, tehu ala lakabubua loo Korah no hataholi manatungan-nala, de lale'a loo Musa no Harun, ma ala la'ban Manetualain.

¹⁰ Boema, dae natangga, de ana ko'do-nalas, nalosa mates sama-sama loo Korah no hataholi manatungan-nana, lelek ha'i-a na'a heni touk natun dua limahulu. Manada'dik ndia, ana da'di nasanene'dak ba'eneu leoina Israel-la.

¹¹ Tehu ta mate Korah anan-nala fa.

¹² Neme leo Simeon mai nde: Leo-ingu Nemuel, Yamin, Yakhin,

¹³ Zerah ma Saul.

¹⁴ Touk manai leo-ingu sila-la dalek, basa-basan touk lifun duahulu dua natun dua.

¹⁵ Neme leo Gad mai, nde: Leo-ingu Zefon, Hagi, Syuni,

¹⁶ Ozni, Eri,

¹⁷ Arod ma Areli.

¹⁸ Touk manai leo-ingu sila-la dalek, basa-basan touk lifun haahulu natun lima.

^19-21 Neme leo Yehuda mai, nde: Leo-ingu Syela, Peres, Zerah, Hezron ma Hamul. Yehuda anan dua, fo nde Er ma Onan, fo maten nai dae Kanaan-na.

²² Touk manai leo-ingu sila-la dalek, basa-basan touk lifun hituhulu nee natun lima.

²³ Neme leo Isakhar-ra mai, nde: Leo-ingu Tola, Pua,

²⁴ Yasub ma Simron.

²⁵ Touk manai leo-ingu sila-la dalek, basa-basan touk lifun neehulu haa natun telu.

²⁶ Neme leo Zebulon-na mai, nde: Leo-ingu Sered, Elon ma Yahleel.

²⁷ Touk manai leo-ingu sila-la dalek, basa-basan, touk lifun neehulu natun lima.

²⁸ Neme Yusuf tititi-nonosin mai, nanuu anatouk dua, fo nde leo Manasye ma leo Efraim-ma.

²⁹ Neme leo Manasye mai, nde: Makhir, fo Manasye anan-na, fo Makhir ia nde been-na, Gilead aman nde ndia; ma leo-ingu manamaik ia-la, nde been-na Gilead tititi-nonosin, fo nde:

³⁰ leo-ingu Iezer, Helek,

³¹ Asriel, Sekhem,

³² Semida, ma Hefer.

³³ Zelafehad, fo Hefer anan-na, anatouun ta, ka'da maanainak. Fo na'den-nala nde: Mahla, Noa, Hogla, Milka ma Tirza.

³⁴ Touk manai leo-ingu sila-la dalek, basa-basan, touk lifun limahulu dua natun hitu.

³⁵ Neme leo Efraim-ma mai, nde: Leo-ingu Sutelah, Bekher ma Tahan.

³⁶ Leo-ingu Eran-na nde been-na, Sutelah tititi-nonosin sila.

³⁷ Touk manai leo-ingu sila-la dalek, basa-basan, touk lifun teluhulu dua natun lima. Yusuf tititi-nonosin nde leo-ingu sila-la.

³⁸ Neme leo Benyamin-na mai, nde: Leo-ingu Bela, Asybel, Ahiram,

³⁹ Sefufam ma Hufam.

⁴⁰ Leo-ingu Ared ma Naaman nde been-na, Bela tititi-nonosin sila.

⁴¹ Touk manai leo-ingu sila-la dalek, basa-basan, touk lifun haahulu lima natun nee.

⁴² Neme leo Dan-na mai, nde: Leo-ingu Suham-ma.

⁴³ Touk manai leo-ingu ndia dalek-ka, basa-basan, touk lifun neehulu haa natun haa.

⁴⁴ Neme leo Asyer-ra mai, nde: Leo-ingu Yimna, Yiswi ma Beria.

⁴⁵ Leo-ingu Heber ma Malkiel-la, nde been-na, Beria tititi-nonosin sila.

⁴⁶ Asyer anainan esa na'de, Serah.

⁴⁷ Touk manai leo-ingu sila-la dalek, basa-basan, touk lifun limahulu telu natun haa.

⁴⁸ Neme leo Naftali mai, nde: Leo-ingu Yahzeel, Guni,

⁴⁹ Yezer ma Syilem.

⁵⁰ Touk manai leo-ingu sia-la dalek, basa-basan, touk lifun haahulu lima natun haa.

⁵¹ Israel toun-nala, basa-basan, touk lifun natun nee esa natun hitu teluhulu.

⁵² Boema, Manetualain nafa'da Musa nae,

⁵³ “Baba'e dae ndia, neu leoina Israel-la leon-nala, tunga leo-la esa-esak baba'un-na.

^54-56 Baba'e dae ndia, nenik tu'u batu. Ba'eneu leo matua soona, muse o fe baba'en-na matua, ma ba'eneu leo anak-ka, fe baba'en-na anak-ka boe.”

⁵⁷ Leo Lewi-a leo-ingu-na nde: leo-ingu Gerson, Kehat ma Merari.

⁵⁸ Leo-ingu manai sila tititi-nonosin-na dalek nde: leo-ingu Libni, Hebron, Mahli, Musi ma Korah. Kehat nde been-na, Amram aman nde ndia.

⁵⁹ Amram sao Yokhebed, fo Lewi anan-na. Yokhebed ndia, bongin neme Masir. Amram no Yokhebed, anatoun dua, fo nde Musa no Harun, boema anainak esa, fo na'de Miryam.

⁶⁰ Harun anatoun haa, fo nde: Nadab, Abihu, Eleazar ma Itamar.

⁶¹ Mate Nadab ma Abihu, ndek lelek ala tunu-hotu ha'i, fo Manetualain nape'da dale nasak-kana fa.

⁶² Nai leo Lewi-a dalek, touk fo, teun-na besak-ka bulak esa leo lain neu-a, basa-basan, touk lifun duahulu telu. Sila nanasula kofe'ek, neme hataholi manai leoinan-na dalek, nanahu ala ta hapu dae pusaka nai Israel fa.

⁶³ Susulak ndia nde, Musa no Imam Eleazar-ra taon, la'eneu Israel leo-ingu-nala, ndek lelek ala leke hataholi Israel-la dede'un-na, neme masadokek Moab-pa, nai Lee Yarden-na selik, fo deka no kota Yerikho-a

⁶⁴ Neme hataholi fo makahulun-na, Musa no Harun sulak-kasa leme moo solokaek Sinai-a, mate la'iesak-kasa so.

⁶⁵ Manetualain nafa'da basa, nae neukose mate la'iesak-kala lai moo solokaek-ka. De memak tete'ek-ka, mate la'iesak-kasa leme moo solokaek-ka, de ela ka'da Kaleb, fo Yefune anan-na, ma Yosua, fo Nun anan-na.