BILANGAN 24 - Susula Malalaok Hehelu Palak Ma Hehelu Beuk

¹ Besak ia, Bileam bubuluk basa, nae Manetualain nau ana fe leoina Israel-la, baba'e-papalak. Hu ndia de, ta neu sanga ta'du-tana sama leo makahulun-na so'on. Bileam nakanae leo moo solokaek-ka neu,

² de nita leoina Israel-la bei ofu nai bubuak-kala dalek, tunga leoinan leon-nala. Boema, Manetualain Duladalen-na koasan-na Bileam,

³ de ana kokolak hala nafa'da elak-ka nde ia nae, “Bileam, fo Beor anan-na, hala hehelun-na nde ia, hataholi mananitak esa, hala-kokolan

⁴ fo namanene basa Manetualain dede'a-kokolan so ma nita Manetualain fo Manakoasan-natu'du aoinan-na, boema ana bala neu, tehu no mata malaak.

⁵ O lalaa tema oofum-mala, lalole-lanapu lanseli, hai Yakob, ma o mamana leleom-mala, hai Israel!

⁶ Sama leo bafak fo maloainan-natabaa, do osi nai lee su'un-na; sama leo ai lou kaboomenik, fo Manetualain selek-ka, do ai aras-sa nai lee su'un-na.

⁷ Ala hapu u'da oe-a, sasi kao-kao, bubu'u-palusa bini-nggen, hapu oe makadotok. Manen-na, neukose tetu-temak, lena heni Agag, ma nusan-na, neukose nananamatutua-namadedemak.

⁸ Manetualain nde nos kalua leme Masir mai, Ana natee-natati soaneus, sama leo sapi fuik-ka. Neukose Ana ko'do heni, leoina fo, manamusu loon-na, Ana tao nakalulutuk duin-nala, ma Ana helu la'di kokou isin-nala.

⁹ Leoina ndia, sama leo singa mane, ma singa ina, fo ana laek, ma nangape'uk. See kande napalani tao nafo'an-nana? Sa'di leo been-na, hataholi manafe o baba'e-papalak-ka, nanaba'e-palak, ma hataholi manasupa-soo o-a, nanasupa-sook.”

¹⁰ Balak kukumu liman-na no nasak, de nafa'da Bileam nae, “Au aloo o mai, soaneu supa-soo au musung-ngala, te se'kona, o fes baba'e-papalak losa la'i telu.

¹¹ Besak ia o bole fali mu'um-ma leo o umam muu! Au helu basa, au se'ba o so, tehu Manetualain ta fe o loak sipo sese'bak ndia.”

¹² Boema Bileam nataa nae, “Ade au beita afa'da basa Tuan nadenu hataholi-la, ae

¹³ leomae Tuan fe la'iesak lilofulak, ma lilopilas manai Tuan uma manen-na boeo, au ta bisa la'olena Manetualain paletan-na, fo au tao hata esa, tunga ka'da au dale hihiing-nga fa do? Ka'da au bole afa'da hata fo, Manetualain nadenu au afa'dan.”

Hala nafa'da elak mate'ek-ka

¹⁴ Boema Bileam nafa'da Balak nae, “Besak ia, au sanga fali leo au leoinang u. Tehu au beita la'o fa te, malole lenak au afa'da Tuan, la'eneu hata fo, nai fai makabuin, leoina Israel-la taon soaneu Tuan leoinan.”

¹⁵ Boema, Bileam kokolak hala nafa'da elak ia, “Bileam, fo Beor anan-na, hala hehelun-na nde ia; hataholi mananitak esa, dede'a-kokolan

¹⁶ fo namanene basa Manetualain dede'a-kokolan so, ma bole nalelak Manetualain Fo Mademaina; ma nita Manetualain Fo Manakoasa, natu'du aoinan-na boema ana bala neu, tehu no mata malaak

¹⁷ Au itan, tehu ta nai besak ia fa; au akanaen, tehu neme dook-ka mai. Manek esa, ana da'di neme Israel mai, neukose ana mai, sama leo nduuk mandela-masa'ak-ka. Neukose ana tao nakalulutuk la'iesak mauli-malangan Moab-pala neukose ana tao nakalulutuk leoina Set-ta.

¹⁸ Neukose musun-na, nangatuu-na dae Edom-ma, tehu Israel tao tatao-nono'i matuaina-la.

¹⁹ Manakoasa esa, neukose to'da mai neme Yakob mai, fo ana tao namopo-namate musun-nala.”

²⁰ Basa boema, nai ninitak ndia dalek, Bileam nita hataholi Amalek-kala. Boema, ana kokolak hala nafa'da elak ia, “Neme basa leoina manai daebafak-ka lala'en-na, Amalek nde manakoasa matuaina. Tehu neu mate'en-na te, leoina ndia, neukose mopok-kana losa dodoon-na boe.”

²¹ Nai ninitak ndia dalek, Bileam nita Keni tititi-nonosin, boema ana kokolak hala nafa'da elak ia nae, “Memak, o mamana leleom-ma matea-mahelek, sama leo manupui ndunuk-ka nai piak lain.

²² Tehu emi, fo hataholi Keni-la, neukose nanatao namopo-namatek, ta dook-ka so'on te, Asyur foo emi, da'di leo hataholi nanafook.”

²³ Basa boema, Bileam kokolak hala nafa'da elak ia boe nae, “Soe! Metema Manetualain tao dede'ak ndia soona, see kande naso'da

²⁴ Tehu neukose ofak bubuak esa, ala mai leme Siprus mai, fo neukose ala lasengi Asyur ma Heber, basa soona, ofu bubuak ndia neukose mopo-mates boe.”

²⁵ Boema, Bileam naheheleaon, fo ana sanga fali leo mamana leleon-na neu, de Balak tunga boe.