BILANGAN 23 - Susula Malalaok Hehelu Palak Ma Hehelu Beuk

¹ Boema, Bileam nafa'da Balak nae, “Mapadedeik fe au, mei tunu-hotuk hitu mai mamanak ia, ma sadia-ma, sapi mane hitu, ma bi'ilopo mane hitu mai ia.”

² Balak tao tungan sama leo hata fo, Bileam nafa'da neun. De nai mei tunu-hotuk sila-la esa lain soona, ana tunu-hotu sapi mane esa ma bi'ilopo mane esa.

³ Boema, Bileam nafa'da Balak nae, “Mapadeik deka moo Tuan, tutunu-hohotu nanatunun-na. Fo au mete, ade Manetualain nau natongon-no Au do ta. Mahani te, neukose au afa'da o, basa hata lala'en fo, Manetualain nafa'dan neu au.” Boema, Bileam mesak-kana neu leo pupukuk esa lain neu,

⁴ de Manetualain mai natongon-no n nai ndia. Boema, Bileam nafa'da Manetualain nae, “Au apadedeik basa, mei tunu-hotuk hitu so, de nai mei tunu-hotuk sila-la esa lain soona, tunu-hotu sapi mane esa, ma bi'ilopo mane esa.”

⁵ Boema, Manetualain nafa'da Bileam, hata fo muse nafa'dan, de nadenun fo ana fali ne'un leo Balak neu, fo nanduku-nalosak Manetualain hala hehelun-na neun.

⁶ Bileam fali ne'un, te nita Balak sama-sama no basa mauli-malangan Moab-pala, bei lapadeik deka lo tunu-hotu nanatun-na.

⁷ Boema, Bileam kokolak dede'a nafa'da elak-ka nde ia nae, “Neme Aram, fo nai letelepak manai dulu eli, Balak, fo mane Moab-pa, naloo au nae, ‘Mai leoan, fo kokolak soaneu au. Supa-soo leoina Israel ndia!’

⁸ Tao leo bee fo, au fe supa-sook, metema Manetualain ta fe supa-sook fa? Tao leo bee fo, au fe huhukuk, metema Manetualain ta fe huhukuk fa?

⁹ Au itas, leme letek-kala poin-na mai; Mitak, leoina esa mesak-kana, ana ta nau leken leo leoina fe'ek dalek neu fa.

¹⁰ Yakob tititi-nonosin, sama leo daesopuk-ka, de ta hapu leke nala fan; leoina Israel-la, makadotok nanseli. Sa'di leo been-na, au mate sama leo hataholi dale ndoos, ela leo been-na, au fai mamateng-nga, sama leo hataholi sila-la, fai mamaten-na.”

¹¹ Boema, Balak nafa'da Bileam nae, “Ade, o tao au le'e ia? Au aloo o mai leo ia mai, fo supa-soo au musung-ngala. Tehu nakalenak, o fes baba'e-papalak.”

¹² Bileam nataa nae, “Au afa'da ka'da hata fo, Manetualain nadenu au afa'dan.”

Hala nafa'da elak ka dua

¹³ Boema, Balak nafa'da Bileam nae, “Mai fo, ata teu sama-sama leo mamana fe'ek teu; o hapu mita ka'da hataholi Israel-la seli neme ndia mai. Supa-soos leme ndia mai.”

¹⁴ Boema, Balak no Bileam leo mook Zofim-ma neu, fo nai Letek Pisga poin-na. Nai ndia boeo, napadedeik na mei tunu-hotuk hitu, fo nai mei tunu-hotuk sila-la, esa-esak lain, ana tunu-hotu sapi mane esa, ma bi'ilopo mane esa.

¹⁵ Bileam nafa'da Balak nae, “Ela meme ia, fo mapadeik deka moo Tuan tutunu-hohotu nanatunum-ma, fo au u atongo o Manetualain nde ndia.”

¹⁶ Manetualain natongo Bileam, de nafa'dan hata fo, muse nafa'dan, boema nadenun fali ne'un leo Balak neu, fo nanduku-nalosak Manetualain hala hehelun ndia.

¹⁷ Boema Bileam fali ne'un, te nita Balak no basa mauli-malangan Moab-pala, bei lapadeik deka lo tutunu-hohotu nanatunun-na. Balak natane Bileam, Manetualain kokolak beek so,

¹⁸ boema, Bileam kokolak dede'a nafa'da elak-ka nde ia nae, “Hai, Balak, fo Zipor anan-na, mai leona, fo mamanene hata fo, au sanga afa'dan.

¹⁹ Manetualain ta sama leo hataholi daebafak-ka fa, fo mu'dak la'iesak-kana, nasasale dale, ma Ana hii nasapepeko-nasandandali. Metema, Manetualain helu soona, tao leo bee-o, Ana tao natetun! Metema Ana kokolak soona, tao leo bee-o, neukose ana da'di!

²⁰ Nadenu au fe baba'e-papalak; ma metema Manetualain fe baba'e-papalak soona, au ta bisa hela falik-kana fa.

²¹ Ta tita tatao-nono'i mangalauk nai Yakob fa; Ta tita toto'a-tataak nai Israel fa. Manetualain, fo sila Manetualain-na sama-sama nos.

²² Manetualain nde nos kalua leme Masir mai; Ana natee-natati soaneus, sama leo sapi fuik-ka.

²³ Ta hapu mo'do-akidook tola Yakob fa ta hapu manasiula-tongonok fo, napalani nasasalematak no Israel fa. Neukose hataholi nafa'da la'eneu leoina ndia nae, ‘Mitak, manada'di beuk fo Manetualain taon!’

²⁴ Leoina ndia, ana fo'a napadeik, sama leo singa ina, ma napadeik natetu sama leo singa mane-a. Ana ta lu'u fa, metema ana beita na'a nana'an-na fa ma beita ninu bana fo ana ka kaanisak-ka daan-na fa.”

²⁵ Boema, Balak nafa'da Bileam nae, “Dai so, metema o ta nau supa-soo leoina Israel-la fa; tehu boso fes baba'e-papalak makandondook!”

²⁶ Bileam nataa nae, “Ade, au ta afa'da basa Tuan, ae neukose au tao basa hata lala'en fo, Manetualain paletan fa do?”

Hala nafa'da elak ka teluk

²⁷ Boema Balak nae, “Mai fo, ata teu leo mamana fe'ek teu. See bubuluk, Manetualain po'ilotak o supa-soo Israel soaneu au, nai mamanak ndia.”

²⁸ Boema no Bileam leo Letek Peor-ra poin-na neu, fo nasale leo moo solokaek-ka neu.

²⁹ Boema, Bileam nafa'da Balak nae, “Mapadedeik mei tunu-hotuk hitu mai mamanak ia, ma sadia-ma sapi mane hitu, ma bi'ilopo mane hitu mai ia.”

³⁰ Balak tao sama leo Bileam hala nafa'dan-na. De nai mei tunu-hotuk sila-la esa-esak lain, ana tunu-hotu sapi mane esa, ma bi'ilopo mane esa.