BILANGAN 22 - Susula Malalaok Hehelu Palak Ma Hehelu Beuk

Mane Moab-pa naloo Bileam

¹ Basa boema, hataholi Israel-la la'o seluk, de ala ofu leme masadokek Moab-pa, nai lee Yarden-na selik, fo deka no Yerikho.

^2-3 Lelek Moab manen-na na'de Balak, fo Zipor anan-na, namanene leoina Israel-la tao hataholi Amori-la leo beek, ma lae leoina ndia, hataholin-nala makadotok nanseli boema, no laun-na lala'en-na, ala dele bengge'be.

⁴ Boema, hataholi Moab-pala lafa'da hataholi Midian-nala mauli-malangan-nala lae, “Ta dook-ka so'on te, solda'du makadotoina sila-la, la'a heni basa hata lala'en manai ita boboa kaisun, sama leo sapi na'a na'u-a, nai mook-ka.” Boema, Mane Balak-ka

⁵ nadenu hataholi neu naloo Bileam, fo Beor anan-na, ana leo nai kota Petor-ra, deka no Lee Efrat-ta, nai nusa Amau. Nadenus fo landuku-lalosak Balak hala hehelun-na nde ia neu Bileam nae, “Fo ela o bubuluk leon te, leoina esa, ana mai neme Masir mai; hataholin-nala lakapepela su'di leo bee leu, de laheheleaon fo sapu-la ami nusam-ma.

⁶ Hataholi sila-la, balakain-na lena heni ami. Da'di, mai leona! Fo supa-soos soaneu au. Fafa'kama ami hapu sengis, fo ami usi henis leme nusak ia mai. Nana au amahele, metema o fe hataholi baba'e-papalak soona, neukose ana hapu baba'e-papalak, ma o supa-soo hataholi soona, neukose ana hapu supa-sook.”

⁷ Boema hataholi Moab ma Midian sila-la mauli-malangan-nala la'o, de leni fe Bileam sese'ba-babaek, fo ana nau supa-soo hataholi Israel-la. Lelek ala losa Bileam boema, landuku-lalosak Mane Balak-ka hala-hehelun-na.

⁸ Boema, Bileam nafa'das nae, “Sungu meme ia. Fo balahaa soona, au afa'da emi, hata fo Manetualain nafa'dan neu au.” Boema basa mauli-malangan Moab sila-la, sungu loo Bileam.

⁹ Boema Manetualain mai, de natane Bileam nae, “See hataholi sila-la, de ala sungu loo o, Bileam?”

¹⁰ Boema Bileam nataa nae, “Mane Balak-ka neme Moab, nde nadenu hataholi sila-la mai, fo leni halak

¹¹ lae leoina esa neme Masir mai, de lakapepela su'di lai bee-bee boe. Mane Balak-ka nadenu au, fo supa-soo leoina ndia, soaneu ndia, fo ela natee-natati nos, fo ana usi henis.”

¹² Boema Manetualain nafa'da Bileam nae, “O boso muu sama-sama moo hataholi sila-la, ma boso supa-soo leoina ndia, nana Au ba'e-pala basa hataholi sila so.”

¹³ Balahaa boema, Bileam nafa'da Balak nadenu hataholi sila-la nae, “Fali leona, te Manetualain ta fe au loak, fo ita teu sama-sama fa.”

¹⁴ Boema hataholi sila-la fali le'us leo Balak leu, de lafa'dan lae Bileam ta nau mai fa.

¹⁵ Boema Balak nadenu hataholi makadotok de'u lena seluk bai, ma nangatutuun-nala dema lena hataholi makasososak-kala.

¹⁶ Ala landuku-lalosak Balak hala hehelun-na nde ia, neu Bileam nae, “Au dokodoe anseli: de mai leona, fo boso tipa au hala nonokeng-nga.

¹⁷ Neukose au bae o, makadotok nanseli, ma au tao su'di beek, fo o mafa'dan. Sa'di mai leona, fo supa-soo leoina ndia, soaneu au.”

¹⁸ Tehu Bileam nataa nae, “Leomae Mane Balak-ka se'ba-bae au nenik basa lilofulak, ma lilopilas manai uma manek-ka dalek lala'en-na boeo, au ta bisa la'olena Manetualain, fo au sene-do'ok-ka, paletan-na fa. Leomae nai dede'a me'doana esa dalek boe, au ta bisa lena-la'ba fan.

¹⁹ Tehu, malole lenak emi sungu meme ia, sama leo hataholi nadedenuk makahuluk-kala. Au hii bubuluk, ade fafa'kama Manetualain nau nafa'da au, hata esa seluk bai.”

²⁰ Le'odaek ndia, Manetualain mai, de nafa'da Bileam nae, “Hataholi sila-la ala mai, fo loke o, muu sama-sama moos. Da'di, maheheleaom, fo muu leona. Tehu, ana fe o ta beek soona, taok-ka'da ndia.”

²¹ Balahaa boema, Bileam sa'e-na kedein-na, de no mauli-malangan Moab sila-la la'o leona.

Bileam no keledein-na

²² Tehu lelek Bileam la'o boema, Manetualain namanasa nanseli. Lelek Bileam bei nai keledein lain, fo lelek ndia, malalau-maoonon dua tungan, boema Manetualain ata nusa so'dan-na, napadeik nai enok-ka tala'da, fo napanggen.

²³ Keledei ndia nita ata nusa so'dak-ka lesu-na tafainan-na, de napadeik nai ndia boema, ana lepos fali leo tina esa dalek neu. Bileam fepa keledei ndia, de ana hela falik-kana leo enok-ka mai.

²⁴ Basa boema, Manetualain ata nusa so'dak ndia, napadeik neu eno makabi'ak-ka, fo nai papala batu nanadamak-ka no osi angol-la tala'da.

²⁵ Lelek keledei ndia, nita Manetualain ata nusa so'dan-na boema nasingok, de nalosa Bileam ein-na nakahapi no papala nanadamak-ka. Bileam fepa seluk keledein ndia.

²⁶ Boema Manetualain ata nusa so'dan-na, lali mamanak, de napadeik neu mamana makabi'aanak nanseli, de ta hapu heok leo kii do kona neu fa.

²⁷ Keledei ndia nita Manetualain ata nusa so'dan-na boema, ana bala neu. Bileam namanasa, de ana fepa keledei ndia, nenik ai tete'en-na.

²⁸ Boema Manetualain fe keledei ndia, bisa kokolak. Bana ndia nafa'da Bileam nae, “Ade, au tao sala Tuan beek, de nalosa Tuan fepa au, losa la'i telu?”

²⁹ Bileam nataa nae, “O tao makamiminak au, de leouni'ka, au ho'u tafaina soona, tao leo bee-o, au taoisa o so!”

³⁰ Boema keledei ndia nataa nae, “Ade au ia, ta Tuan keledein fa, fo Tuan sa'en neme doon eli mai so do? Ade, au lena-la'ban hai Tuan so do beik?” Bileam nataa nae, “Ta.”

³¹ Boema Manetualain fe Bileam bisa nita Manetualain ata nusa so'dan, ana ho'uisik tafainan-na, de napadeik nai ndia. Tutik-ka, Bileam senek neu dae lain, de ana fe ha'da-holomata.

³² Manetualain ata nusa so'dan-na, natane nae, “Tao le'e de, o fepa o keledeim-ma, losa la'i telu? Au mai, soaneu apanggengge o, nana tunga Au hahapung-nga, metema o muu soona, ta malole fa.

³³ Lelek o keledeim-ma nita Au, boema nasingok la'i telu. So'ba leo ta soona, tao leo bee-o, Au taoisa o so, tehu Au fe keledei ndia naso'da.”

³⁴ Boema Bileam nataa nae, “Au asala-asingo so. Au ta bubuluk, ae Tuan napadeik nai enok-ka tala'da, fo napangge au fa. Tehu besak ia, tunga Tuan hahapun-na, metema au la'ok akandoo soona, ta malole fa, de neukose au fali.”

³⁵ Tehu Manetualain ata nusa so'dan-na nae, “O moo hataholi sila-la, tunga Au leona. Tehu o bole kokolak, ka'da hata fo Au adenu o kokolak-kana.” Boema Bileam no Balak nadenu hataholi sila-la, la'ok lakandoo.

Balak soluk Bileam

³⁶ Lelek Balak namanene, nae neukose Bileam mai boema, neu soluk-kana, nai kota Moab-pa, nai Lee Arnon-na selik, fo nai Moab dae toon-na.

³⁷ Boema Balak nafa'dan nae, “Tao le'e de, o ta mai ndek, au aloo o makasososan-na fa? Ade, o maedaenga, au ta se'ba-bae abe'i o fa do?”

³⁸ Bileam nataa nae, “Nah, besak ia, au mai so. Tehu, au ta anuu haak afa'da hata esa boen, te ka'da Manetualain nde nadenu au afa'dan-nana.”

³⁹ Boema, Bileam no Balak leu leo kota Huzot-ta leu.

⁴⁰ Ala losa boema, Balak tati sapi ma do'do bi'ilopo de'ubee. Ana fe bana sila-la paan-na seli leo, Bileam no basa mauli-malangan fo manasama-sama loon-nana.

Bileam kokolak dede'a nafa'da elak makasososak-ka

⁴¹ Balahaa boema, Balak no Bileam, nde nda'e leo pupuku Bamot Baal-la lain leu. Bileam hapu nita leoina Israel-la seli, neme mamanak ndia mai.