BILANGAN 19 - Susula Malalaok Hehelu Palak Ma Hehelu Beuk

Sapi pilas nanahotuk

¹ Manetualain paleta Musa no Harun

² fo ala fe nakanenetek ia-la, leo leoina Israel-la neu nae: meni sapi ina pilas esa, ta lu'u ei-la'di limak, ma beita paken fo fua bua-lo'as fa.

³ Fe sapi ndia leo Imam Eleazar-ra neu. Muse neni bana ndia leo mamana oofuk-ka deak neu, fo tatin nai imam-ma matan.

⁴ Soona Imam Eleazar-ra, muse ho'in-na bana ndia daan faaanak, fo nasale leo Manetualain Lalaa Teman-na neu, fo ana pisin la'i hitu.

⁵ Muse tunu la'iesak bana ndia paan-na, nai imam-ma matan, fo nde loun-na, isin-na, daan-na ma tei-aten.

⁶ Basa soona, imam-ma muse ho'in-na ai aras bibiaanak esa, hanoe ndanak esa, ma tali pilas esa, fo ana tapan leo ha'i manahotu sapi pilas ndia, tala'da neu.

⁷ Basa soona, imam-ma muse safe bua papaken-na, ma nadiu oe. Basa ndia soona, ana masok leo lalaa oofuk dale neu, tehu bei nanggenggeo losa le'do tenak.

⁸ Hataholi manahotu sapi ndia boeo, muse safe bua papaken-na, ma nadiu oe; hataholi ndia boeo, bei nanggenggeo losa le'do tenak.

⁹ Boema hataholi esa, ta nanggenggeo fa, muse ana hulu nakabubua sapi ndia afun-na, fo pe'dan neu mamana balisi esa, nai lalaa temak-ka deak. Afu ndia nanape'dak neme ndia, fo ela hataholi Israel-la, bole paken, fo ala tao oe feta tao nalalao-nalalafu aoinak-ka, fo sala-singok nanalose henik.

¹⁰ Hataholi manahulun-nakabubua sapi ndia afun-na, muse safe bua papaken-na, tehu bei nanggenggeo losa le'do tenak. Nakanenetek ndia, nanapakek losa dodoon-na, nau soaneu hataholi Israel-la, do hataholi nusa dea, fo ana leo nahele nai sila nusan dale boe.

Koila'e mamates

¹¹ Hataholi fo, aon-na la'e mamates-sa, nanggenggeo faik hitu dalen-na.

¹² Neu faik-ka telun-na ma faik-ka hitun-na soona, ana muse tao nalalao-nalalafu aoina nenik oe feta; soona besak-ka balisi. Tehu metema, neu faik-ka telun-na, ma faik-ka hitun-na, ana ta tao balisi aoinan-na fa soona, nanggenggeo nahele.

¹³ Hataholi fo, aon-na la'e mamates-sa, tehu ana ta tao nalalao-nalalafu aoinan-na, nde been-na manggenggeok, nanahu beita nanapisik nenik oe feta fa. De ana tao nanggenggeo Manetualain Lalaa Teman-na, hu ndia de, ta nanalekek da'di Manetualain anan-nala so'on.

¹⁴ Metema mate hataholi esa nai lalaa temak dale soona, su'di see fo nai lalaa temak ndia dalek, do neu leo lalaa temak ndia dalek neu, soona nanggenggeo faik hitu dalen-na

¹⁵ Basa kete ma ulek fo tatanan ta boeo, langgenggeo.

¹⁶ Ba'eneu hataholi fo, aon-na la'e mamate nisalalak, do hataholi fo ana mate aon nai tina soona, nanggenggeo fai hitu dalen-na. Leondiak boe, ba'eneu hataholi fo, ana koila'e lates do hataholi manamatek duin-na.

¹⁷ Soaneu tao nalalao-nalalafu hataholi manggenggeok ndia, muse ho'in-na sapi ina pilas, fo nanahotuk basak soaneu sala-singok nanalose henik ndia, afun faaanak. Muse tao afu ndia, leo ulek esa dalek neu, soona ho'i oe neme oe manafaak-ka mai, fo di'an leo ulek ndia dalek neu.

¹⁸ Nai dede'a makasososak-ka dalek, fo nde metema mate hataholi esa nai lalaa temak dale soona, hataholi balisi-a, muse ho'in-na hanoe ndanak esa, fo ana dopen leo oe ndia dalek neu, fo basa soona, ana pisin neu lalaa temak ndia, ma neu basa hata lala'en fo manai dalek-kala, ma hataholi manai sila-la boe. Nai dede'a ka dua dalek, fo nde metema hataholi esa, aon-na la'e mamates, lates do hataholi manamatek duin-na soona, hataholi balisi-a, muse pisi hataholi manggenggeok ndia, sama leo hataholi makasososak-ka boe.

¹⁹ Ana muse pisin nai faik-ka telun-na, ma faik-ka hitun-na. Neu faik-ka hitun-na soona, basa feta tao nalalao-nalalafu hataholi manggenggeok ndia. Hataholi ndia, muse safe bua papaken-na, ma nadiu oe. Lelek le'do mulai tenak soona, ana da'di balisi.

²⁰ Hataholi fo nanggenggeo, tehu ana ta tao feta tao nalalao-nalalafu aoinak-ka fa soona, manggenggeok nahele, nanahu beita nanapisik nenik oe feta fa. Ana tao nanggenggeo Manetualain Lalaa Teman-na, de ta nanalekek da'di Manetualain anan-nala so'on.

²¹ Nakanenetek ndia, nanapakek losa dodoon-na. Hataholi manapisi oe feta ndia boeo, muse safe bua papaken-na, fo oe ndia la'e hataholi-a, nanggenggeo losa le'do tenak.

²² Hataholi manggenggeok ndia, ana koila'e buas bee soona, buas ndia nanggenggeo, ma hataholi fe'ek koila'e hataholi ndia boeo, nanggenggeo losa le'do tenak.