Biblia Todo Logo
Bìoball air-loidhne

- Sanasan -

BILANGAN 18 - Susula Malalaok Hehelu Palak Ma Hehelu Beuk


Basa mam-mala ma hataholi Lewi-la bela-ba'un

1 Manetualain nafa'da Harun nae, “O ma o anam-mala, boema hataholi Lewi-la, muse lu'a-lepa sala-salak fo mana da'di nai Au Lalaa Temang-nga, tehu ka'da o moo o anam-mala mesam-ma, nde muse lu'a-lepa salak manai imam-mala ue-le'din-nala dalek.

2 O muse pake o tolano ka'a-fa'dim ma hataholi Lewi-la, da'di leo manatulu-fali, nai lelek o makalala'ok o bela-ba'um, ma o anam-mala bela-ba'un.

3 Leo Lewi-a, muse tao natetu sila bela-ba'un soaneu emi, ma lakalala'ok sila bela-ba'un nai Au Lalaa Temang-nga, tehu ala ta bole deka mei tunu-hotuk-ka fa, do ala koila'e bua-lo'a malalao-malalafuk manai Kama Malalao-malalafuk-ka dalek fa. Metema, ala la'olena nakanenetek ndia soona, nau sila do emi boeo, neukose mate basam-mala.

4 Sila muse laue-lale'di sama-sama loo emi, ma ala tao-no'i bela-ba'uk fo natutik no lau-onok lala'en-na, nai Au Lalaa Temang dale, tehu see ta hapu haak soaneu ue-le'dis ndia fa soona, ta bole naue-nale'di sama-sama no emi fa.

5 Ka'da o, Harun ma o anam-mala, nde muse makalala'ok bela-ba'uk manai Kama Malalao-malalafuk-ka, ma mei tunu-hotuk-ka, fo ela Au boso boe amanasa, leoina Israel bai.

6 Te'e-te'e, Au hele basa o tolano ka'a-fa'dim, hataholi Lewi-la, neme leoina Israel-la dalek mai so, fo da'di leo baba'e-babatik esa soaneu o. Sila nanafe hehelik ba'eneu Au, fo lalalau-laoono nai Au Lalaa Temang-nga so.

7 Tehu ka'da o, ma o anam-mala mesam-ma, nde bole makalala'ok bela-ba'uk da'di leo imam, nai basa ue-le'dis lala'en-na dalek, fo natutik no mei tunu-hotuk-ka, ma hata manai Kama Malalao-malalafuk nanseli-a dalek. O lulu'a-lelepam nde ndia, nanahu Au fe basa emi nangatutuuk, da'di leo imam so. Ba'eneu hataholi see fo, ta nanuu haak ndia fa soona, neukose nanahukunisak, metema ana deka bua-lo'a malalao-malalafuk sila-la.”


Imam-mala baba'en-na

8 Manetualain nafa'da Harun nae, “Mafandendelek! Te basa tunu-hotu hehelik fo aia fen leo Au mai, tehu ta nanatunuk fa soona, o nuum ndia. O baba'em-ma nde ndia, fo ndia nananaketu basak losa dodoon-na so. Au fe baba'ek ndia neu o, ma neu o tititi-nonosim.

9 Neme tunu-hotuk fo, malalao-malalafuk nanseli, ma ta tunun nai mei tunu-hotuk lain fa soona, o nuum. Tunu-hotuk sila nde ia: Tutunu-hohotu nana'ak, tutunu-hohotuk fo, sala-singok hapu do'o do ampon, ma tutunu-hohotu bae hutak. Basa tunu-hotu malalao-malalafuk sila-la, o moo o anam-mala nuum.

10 Ndia nde been-na, malalao-malalafuk ba'eneu o, da'di o muse mu'an nai mamana malalao-malalafuk boe. Tehu ka'da touk-kala bole la'an.

11 Basa tunu-hotu fe'ek lala'en, fo hataholi Israel-la fen neu Au-a, o nuum boe. Au fen neu o, boema neu o anatou-anainam. Nakanenetek ndia, paken losa dodoon-na. Ba'eneu o teidalem fo, ta manggenggeok fa soona, ana bole na'an.

12 Tunga teuk, hataholi Israel-la tunu-hotu fe Au, basa boa sosak malole lala'en-na, Au fen neu o, fo nde mina setun, angol oek, ma gandum.

13 Basa sila-la, o nuum. Ba'eneu o teidalem fo, ta manggenggeok fa soona, ana bole na'an.

14 Basa hata lala'en manai dae Israel-la, fo nanafe hehelik neu Au so, emi nuum basa sila-la.

15 Hataholi Israel-la, tunu-hotu fe Au, basa hata maso'dak lala'en-na ana ulun-nala, nau hataholi do bana-manu boe, o nuum sila. Tehu, emi muse soi-mala, emi ana ulum-mala, ma bana-manu nalulik-kala, ana makasososan-nala boe.

16 Muse soi ma ni'iana fo, so'dan-na besak-ka bulak esa. Belin-na, nananaketu basak so, fo nde doi fulak lima, tunga belik fo nanapakek nai Au Lalaa Temang-nga.

17 Tehu ta bole soi sapi, bi'ilopo ma bi'ihiik ana makasososan-nala fa. Bana-manu sila-la, Au nuung so, de muse tunu-hotu henis. Pisi daan-na neu mei tunu-hotuk-ka, ma tunu minan-na, fo da'di leo tutunu-hohotuk. Boon-na nandaa no Au daleng-nga.

18 Emi soa bana-manu nanatunu-hotuk fo, latu'du fen neu Au-a, fo nde tenen-na, ma sakibolo konan-na.

19 Losa dodoon-na, basa tunu-hotu hehelik, fo hataholi Israel-la, leni fen leo Au mai, Au fen leo o, ma leo o anatou-anainam neu. Nakanenetek ndia nanapakek losa dodoon-na, ma ana da'di hengenee-balataak esa neu Au ma o, ma o tititi-nonosim.”

20 Boema, Manetualain nafa'da Harun nae, “Emi ta hapu baba'ek pusak hata esa boen. O ta hapu dae duik esa boen, fo o taon da'di o pusakam nai nusak fo, Au heluk ndia fa. Te o pusam-ma nde Au, fo Manetualain.”


Hataholi Lewi-la baba'en-na

21 Boema, Manetualain nafa'da Harun nae, “Hataholi Israel-la fe hataholi Lewi-la sila hahapu dadain baba'ek esa neme ba'en neu sanahuluh. Sila baba'en-na nde ndia, soaneu sila ue-le'din manai Au Lalaa Temang-nga.

22 Hataholi Israel fe'ek-kala, ta bole deka Lalaa Temak ndia so'on, fo ela ala boso leni sala-singok, ma huhuku nisak neu sila aoinan-na.

23 Mulai besak ia, ka'da hataholi Lewi-la, nde bole ito-ato Au Lalaa Temang-nga, ma ala mete-lakanae ue-le'dis ndia Nakanenetek ndia boeo, nanapakek soaneu o tititi-nonosim losa dodoon-na. Hataholi Lewi-la, ta hapu baba'ek nai Israel fa,

24 nanahu, soaneu sila baba'en-na, Au fe basa sila baba'en nde, hataholi Israel-la hahapu dadain baba'ek esa neme ba'en neu sanahuluh, fo ala fen neu Au, da'di leo tunu-hotu hehelik so. Hu ndia de, la'eneu hataholi Lewi-la soona, Au afa'da ae neukose sila ta hapu baba'e pusaka nai Israel fa.”


Hataholi Lewi-la fe sila hahapu dadain baba'ek esa neme ba'en neu sanahuluh

25 Manetualain nadenu Musa,

26 fo nanduku-nalosak paleta ia, neu hataholi Lewi-la nae, Metema, emi sipo hataholi Israel-la hahapu dadain baba'ek esa neme ba'en neu sanahuluh, fo Manetualain fen neu emi, fo da'di neu emi baba'em-ma soona, emi muse fe hahapu dadain baba'ek esa neme ba'en neu sanahuluh leo Manetualain neu, fo soaneu emi tunu-hotu hehelim-ma.

27 Bole tafa'da tae, tunu-hotuk hehelik ndia, sama no tunu-hotu gandum beuk ma oe angol beuk-ka.

28 No enok ndia, emi boeo muse tunu-hotu fe Manetualain, tunu-hotu hehelik, neme hataholi Israel-la hahapu dadain baba'ek esa neme ba'en neu sanahuluh ndia faa. Emi muse fe tunu-hotu hehelik ndia, leo Harun neu.

29 Fe baba'ek neulauk nanseli, neme hata fo emi sipon.

30 Emi fe basa baba'ek ndia soona, emi bole ho'i-ma bei elak-ka fo emi soan, sama leo hataholi manatao tina-osi esa, metema ana fe basa tunu-hotun soona, ana ho'in-na bei elak-ka fo ndia soan.

31 Emi bole mi'a, bei elak ndia, sama-sama moo emi teidalem-mala, su'di nai bee boe, da'di leo nga'di neme emi ue-le'dim manai Manetualain Lalaa Teman-na mai.

32 Metema emi mi'an soona, emi ta masala fa, sa'di emi tunu-hotu basa fe Manetualain, baba'ek fo malole nanseli so. Boso tao manggenggeo hataholi Israel-la, tunu-hotu malalao-malalafun-na, nenik mi'a hata esa neme tunu-hotuk ndia mai, te se'kona emi beita fe hehelik ba'eneu Manetualain, baba'ek fo malole nanseli-a fa. Metema emi la'olena nakanenetek ndia soona, neukose mate emi.

Lean sinn:



Sanasan