BILANGAN 16 - Susula Malalaok Hehelu Palak Ma Hehelu Beuk

Korah, Datan ma Abiram la'ban manapaletan nakeketun-na

^1-2 Yizhar neme leo-ingu Kehat-ta, fo nai leo Lewi-a, anan Korah la'ban Musa. Hataholi telu leme leo Ruben-na, look-kana, hataholi ka teluk sila-la nde: Datan, ma Abiram, fo Eliab anan-na, ma On, fo Pelet anan-na, ma laun-na hele-la mauli-malangan nananita-nalelak natun dua limahulu, boeo look Korah.

³ Basa-basas leu leo Musa no Harun leu, de lafa'da lae, “Ndia dai so Musa! Hataholi Israel-la lala'en-na, nanafe hehelik neu Manetualain, ma Manetualain nai ita basa-basa-tala tala'da heon. Tehu tao le'e de, o mafa'da mae, o dema lena Manetualain anan-nala?”

⁴ Musa namanene dede'ak ndia boema, ana senek neu dae lain, de ana hule-haladoi neu Manetualain.

⁵ Boema, nafa'da Korah no hataholi manalook-kana nae, “Balahaa fafaik soona, neukose Manetualain natu'du fe ita, see kande Ndia nuun, ma see kande nanafe hehelik soaneun. Hataholi fo Ana helek-ka, neukose Ana fen loak, fo ana deka non.

^6-7 Balahaa fafaik soona, o moo hataholi manalook o-a, muse ho'i-ma mamana ha'i-la, fo tao ha'ikaak ma boomenik leo dale neu, fo menis leo mei tunu-hotuk-ka neu. Soona, mahani te, neukose ita tita, nai ita dalek, see kande Manetualain hele basan so. Ndia dai so, hai hataholi Lewi-la lemin!”

⁸ Basa boema, Musa nafa'da Korah nae, “Hai hataholi Lewi-la lemin! Mamanene leona!

⁹ Ade emi maedaenga, dede'a anak ia, de emi mae nai hataholi Israel-la dalek, Israel Manetualain-na hele emi, fo ela emi bole deka moon, ma emi malalau-maoono nai Lalaa Teman dale, boema emi maue-male'di soaneu hataholi Israel-la, ma malalau-maoonos do?

¹⁰ O, Korah, ma basa hataholi Lewi-la, hapu basa ha'da-holomata ndia, neme Manetualain mai so – de besak ia, emi malaka fo nau da'di imam boe do!

¹¹ Metema o moo o hataholim fo manalook o-a, bemumu moo Harun soona, te'e-te'e, emi la'ban Manetualain!”

¹² Boema Musa nadenu hataholi neu naloo Datan ma Abiram, tehu lafa'da lae, “Ami ta nau meu fa!

¹³ O moo ami kalua meme dae Masir fo maoe-maisik ndia mai, soaneu taomisa ami nai moo solokaek ia, de ndia beita dai fa do? Ade o muse paleta ami boe do?

¹⁴ Tete'ek-ka, o ta moo ami leo dae maoe-maisik ndia meu, do fe ami tina ma osi angol, fo da'di ami pusakam fa. Besak ia, o nau ke'di-ndiu ami bai! Ta, ami ta nau meu fa!”

¹⁵ Musa namanasa nanseli, de nafa'da Manetualain nae, “Manetualain, Boso sipok sila tutunu-hohotun. Beita la'iesa boen, fo au tao akatutu'dak sila hataholin esa boen; lena-lenak, beita la'iesa boen, fo au ho'i-a sila keledein esa boen.”

^16-17 Boema Musa nafa'da Korah nae, “Balahaa soona, muu leo Manetualain Lalaa Teman-na muu, sama-sama moo hataholi natu ka dua limahuluk-kala, fo manalooko-a. Harun boeo, neukose nai ndia boe. Emi esa-esak, muse meni emi mamana ha'im-mala. Tao boomenik leo dalek neu, fo tunu-hotu fen neu Manetualain.”

¹⁸ Boema esa-esak ho'in-na mamana ha'in-na, de ana tao ha'ikaak ma boomenik leo dalek neu, boema napadeik neu Manetualain Lalaa Teman-na lelesun-na bafan-na, sama-sama no Musa ma Harun.

¹⁹ Basa boema, Korah naloo nakabubua basa hataholi Israel-la lala'en-na, de lapadeik lasasalematak loo Musa no Harun, nai Manetualain Lalaa Teman-na lelesun-na bafan-na. No kaiboik, basa hataholi Israel-la lala'en-na, lita Manetualain mandela-masa'an nangale'do.

²⁰ Boema Manetualain nafa'da Musa ma Harun nae,

²¹ “Makadedeak meme hataholi sila-la matan-na mai; Au sanga tao amopo-amates, besak ia boe.”

²² Tehu Musa no Harun senek, de lafa'da lae, “Ou Manetualain, O nde fe maso'dak neu basa hata maso'dak lala'en-na. Metema ka'da hataholi esa mesak-kana nde nasala-nasingo soona, ade O mamanasa basa hataholi Israel-la lala'en-na do?”

²³ Boema Manetualain nafa'da Musa nae,

²⁴ “Madenu hataholi-la, fo ala la'o heok leme Korah, Datan ma Abiram lalaa oofun-nala mai.”

²⁵ Boema basa mauli-malangan Israel-la tunga Musa, de leu leo Datan ma Abiram mamanan-nala leu.

²⁶ Musa nafa'da hataholi Israel-la nae, “La'o heok meme hataholi mangalauk ia-la, lalaa teman-nala mai, ma boso koila'e sila hata-heton esa boen Metema, emi ta tunga fa soona, neukose emi nanatao namopo-namatek sama-sama moos, nanahu sila sala-singon-nala.”

²⁷ Boema hataholi Israel sila-la, la'o heok leme Korah, Datan ma Abiram lalaa teman-nala mai. Datan ma Abiram lai deak so, de lapadeik sama-sama loo sao-anan-nala, lai sila esa-esak lalaa teman-na lelesu bafan-na.

²⁸ Boema Musa nae, “No enok ia, de neukose emi bubuluk mae Manetualain nadenu basa au, fo tao basa ia-la, ma emi bubuluk mae au hihii-nanau mesang ta ndia fa.

²⁹ Metema hataholi sila-la mate ndoo-ndoo, te ta no huhukuk hata-hata neme Manetualain mai fa soona, ndia da'di ta'du-tana nae, Manetualain ta nadenu au fa.

³⁰ Tehu metema, Manetualain tao hata esa, fo dodoo basa ia, emi beita mamanene fan, ma dae-a natangga, fo ana ko'do-nalas no basa hata-heton-nala lala'en-na, nalosa ala masok loo ao holi-holin-nala, leo hataholi mana matek-kala daebafan dale neu soona, besak-ka emi bubuluk mae hataholi sila-la, ala la'ban Manetualain.”

³¹ Musa kokolak basa tutik-ka, dae fo hataholi sila lapadeik lai lain-na, natangga,

³² de ana ko'do-nalas loo teidalen-nala, boema basa hataholi manalook Korah, no basa hata-heton-nala lala'en-na.

³³ Boema basa-basas tenak loo ao holi-holin-nala, loo basa hata-heton-nala lala'en-na, leo hataholi manamatek-kala daebafan dale leu. Dae matanggak ndia, nakatema falik, de nakadofu ketus, nalosa mopok-kasa.

³⁴ Basa hataholi Israel manai sila-la, lamanene ala nggasi. Boema hataholi Israel-la lalai, ma laloo bebou lae, “Talai, te boso nalosak dae ko'don-na ita!”

³⁵ Boema Manetualain fe ha'i mai, de na'a naputu la'iesak hataholi ka natun dua limahuluk fo, manatunu-hotu boomenik sila-la.

Mamana ha'i

³⁶ Boema Manetualain nafa'da Musa nae,

^37-38 “Madenu Eleazar, fo Imam Harun-na anan-na, ko'o neni ha'i-a na'a ela mamana ha'i-la, fo neu nggali afun-na leo mamana fe'ek neu, nana ha'i-a mamanan ndia, malalao-malalafuk. Bua-lo'as sila-la nde been-na, tunu-hotuk neme hataholi fo nanahuku nisak, hu kande sala-singon-nala. Bua-lo'as sila-la malalao-malalafuk, nanahu nanatunu-hotu basak nai Manetualain matan so, hu ndia de, muse tutus da'di bebela ni'ianak-kala, fo me'das neu mei tunu-hotuk-ka lou dean-na. Manada'dik ndia, neukose ana da'di nasanene'dak ba'eneu leoina Israel-la.”

³⁹ Boema Imam Eleazar-ra, ho'in-na mamana ha'i sila-la, de nadenu hataholi tutus da'di bebela ni'ianak-kala, fo me'das neu mei tunu-hotuk-ka lou dean-na.

⁴⁰ Ndia nalupa nasanene'dak ba'eneu leoina Israel-la, nae fe'ek neme Harun tititi-nonosin mai soona, ta hapu hataholi esa boen, bole neu leo mei tunu-hotuk-ka neu, fo ana tunu boomenik soaneu Manetualain. Hataholi fo ana la'o lena nakanenetek ndia, neukose nanatao namopo-namatek sama leo Korah no hataholi manalook-kana. Basa sila-la taos sama leo hata fo Manetualain paletan neu Eleazar, tunga Musa.

Harun soi-tefa-na leoina Israel-la

⁴¹ Balahaa boema, basa hataholi Israel-la lala'en-na, tao nasa-nasak mesan loo Musa no Harun. Lafa'da lae, “Emi taomisa Manetualain anan-nala so.”

⁴² Ala bei lakabubua fo la'ban Musa no Harun, te ala lipa leo Manetualain Lalaa Teman-na neu te, lita ko'as-sa potin-na Lalaa Temak ndia, boema lita Manetualain mandela-masa'an.

⁴³ Boema Musa no Harun leu leo Manetualain Lalaa Teman-na uluk leu,

⁴⁴ boema Manetualain nafa'da Musa nae,

⁴⁵ “Makadedeak meme hataholi sila-la mai. Te neukose Au tao amopo-amates lai mamanak ndia boe!” Duas senek

⁴⁶ boema, Musa nafa'da Harun nae, “Ho'i-ma o mamana ha'im-ma, fo ho'i ha'ikaak neme mei tunu-hotuk lain mai, fo taon leo dalek neu, ma tao boomenik neu ha'ikaak lain. Menin lai-lai leo hataholi Israel-la neu, fo tao feta sala-singok hapu do'o do ampon soaneus. Lai-lai leona! Te Manetualain nasa-melun lua ponu-ponu, ma he'di-laus mulai so.”

⁴⁷ Harun tao tunga Musa hala-kokolan. Ana nalai leo hataholi Israel makabubuak-kala tala'da heon neu, te he'di-laus mulai la'es so. Boema Harun tao boomenik leo ha'ikaak lain neu, de ana tao feta fo, sala-singok hapu do'o do ampon soaneu hataholi Israel-la.

⁴⁸ He'di-laus ndia nate'e, te Harun bei nai hataholi bei maso'dak-kala ma hataholi manamate basak-kala tala'da.

⁴⁹ Lelek ndia, hataholi manamatek-kala, hataholi 14.700, ta nanalekek no hataholi manamatek nai lelek Korah la'ban Musa paletan-na fa.

⁵⁰ Lelek Harun fali leo Musa nai Manetualain Lalaa Teman-na lelesu bafan-na, te he'di-laus ndia nate'e so.