BILANGAN 13 - Susula Malalaok Hehelu Palak Ma Hehelu Beuk

Manamakuk ka sanahulu duak-kala

¹ Manetualain nafa'da Musa nae,

² “Neme Israel leon esa mai soona, madenu mauli-malangan esa neu mamaku dae Kanaan fo neukose Au fen neu hataholi Israel-la ndia.”

^3-15 No Manetualain paletan ndioa, boema Musa nadenus de ala la'o leme moo solokaek Paran-na mai. Hataholi sila-la nde been-na, basa-basas mauli-malangan nai hataholi Israel-la dalek. Naden-nala nde ia: Leo Mauli-malangan Ruben Syamua, fo Zakur anan-na Simeon Safat, fo Hori anan-na Yehuda Kaleb, fo Yefune anan-na Isakhar Yigal, fo Yusuf anan-na Efraim Hosea, fo Nun anan-na Benyamin Palti, fo Rafu anan-na Zebulon Gadiel, fo Sodi anan-na Manasye Gadi, fo Susi anan-na Dan Amiel, fo Gemali anan-na Asyer Setur, fo Mikhael anan-na Naftali Nahbi, fo Wofsi anan-na Gad Guel, fo Makhi anan-na

Leo Mauli-malangan

¹⁶ Hataholi sila-la nde, manamakuk fo Musa nadenus leu maku besa-besa loo nusak ndia. Musa nggati heni Hosea, fo Nun anan-na na'den-na, de na'de Yosua.

¹⁷ Lelek Musa nadenus fo ala la'o-a, ana helus nae leo ia, “La'ok leo kii meu, soona la'ok masale leo dae Kanaan-na boboan kona meu, basa soona, makandoo leo dae mapupukuk-kala meu.

¹⁸ Palisak matalolole, nusak ndia leobeek, ade laun-na ba'uk-ka do lumanak, ade mabe'i-balakaik-kala do tapandoes-sala do ta.

¹⁹ Palisak, ade nusak ndia malole do ta, ma ade laun-nala leo lai nggolok-kala, nai masadokek, do lai kota-kota fo makota musuk-kala dalek.

²⁰ Matetea-mahehele emi dalem-ma. Mete su'dik, daen-na maoe-maisik, ma ain-nala ba'uk-ka do ta. Mafandendelek, fo seu meni ai manamolik manai naa-la, boan lumanak dei.” Lelek ndia, la'e fai ketu-seu angol-la boa makasososan-na.

²¹ Boema, hataholi sila la'ok leo kii leu, de ala palisak matalolole nusak ndia, mulai neme moo solokaek Zin-na, nai boboak kona, fo leo kii neu, losa kota Rehob-pa, fo deka no enok manaleo Hamat neu-a.

²² Makasososan-na, leu leo nusak ndia boboan kona leu, de ala losa kota Hebron-na, fo hataholi Ahiman, Sesai, ma Talmai, fo Enak tititi-nonosin-nala, mamana leleon-na. Kota Hebron-na, napadedeik nakahuluk teuk hitu, neme kota Zoan-na nai Masir.

²³ Boema, ala losa bafak Eskol-la. Ala ke'di leni angol boak, longek esa, boan makadotok nanseli, nalosa muse hataholi dua ndolon. Ala ho'i leni dalima boak ma kaa boak de'u bee boe.

²⁴ Loke mamanak ndia soona, lae Bafak Eskol, nanahu hataholi Israel-la, ke'di leni angol boak, longek esa neme ndia mai.

²⁵ Manamakuk sila-la, ala maku besa-besa loo nusak ndia, faik haahulu dalen-na, boema ala fali ma'is,

²⁶ de lafa'da Musa no Harun, ma basa hataholi Israel-la, bei lakabubua lai Kades, fo nai moo solokaek Paran-na. Ala tui hata fo sila litan so, ma latu'du ai boak fo, sila lenik-ka.

²⁷ Lafa'da Musa lae, “Ami palisak matalolole nusak ndia so, de ami mita daen-na kamasu'ik, ma maoe-maisik, ma ami seu meni ai boak lumanak nde ia, neme naa mai.

²⁸ Tehu nusak ndia, laun-nala, ao makadelek mesa-mesan. Nusan-nala matuaina mesa-mesan, ma makota musuk. Bai te, ami mita hataholi ao matua, ei madema-la tititi-nonosin-nala lai naa.

²⁹ Hataholi Amalek-kala, leo nai nusak ndia, boboan kona; hataholi Het, Yebus ma Amori-la, leo nai nggolok mapupukuk-kala; hataholi Kanaan-nala, leo nai nggolo tasi su'uk-kala, ma nai ndolo-ndolo Lee Yarden-na, su'un-na.”

³⁰ Tehu Kaleb nakatetesa-nakatatamak hataholi fo dalen-na falahaa neu Musa. Kaleb nae, “Ita muse sapu-ta nusak ndia, fo ata loso-tan besak ia boe, nanahu ita balakain-na dai, soaneu ita sengis.”

³¹ Tehu hataholi manafali ma'is sama-sama loo Kaleb sila-la lafa'da lae, “Ta, ita balakain-na ta dai, soaneu teu sapu talas. Nusak ndia, laun-nala balakain lena ita.”

³² Boema leu tui hataholi Israel-la dede'a pepekok, la'eneu nusak fo, sila leu maku besa-besa loon ndia. Lafa'da lae, “Nusak ndia, mangalaun-na seli, lena-lenak laun-na bai. Ami mita hataholi manai naa-la, ao matuaina mesa-mesan.

³³ Nakalenak, ami mita hataholi-la, sama leo hataholi ao matua, ei madema-la, fo nde hataholi Enak-kala tititi-nonosin-nala. Metema nakasasamak ami mo hataholi sila-la soona, ami mame'da-nana, ami sama leo lamak-ka, de tao leo bee-o, sila boeo dale nameme'dan-na leondiak soaneu ami boe.”