BILANGAN 1 - Susula Malalaok Hehelu Palak Ma Hehelu Beuk

Leleke makasososak-ka la'eneu hataholi Israel-la dede'un-na

¹ Nai hataholi Yahudi-la bula ka dua-na fain esa, fo nai lelek hataholi Israel-la la'oela Masir boema, Manetualain kokolak no Musa neme Manetualain Lalaa Teman dale, nai Letek Sinai-a. Nae,

² “O ma Harun muse leke la'iesak hataholi Israe la dede'un-na, tunga esa-esak leo-ingu ma teidale-bobongin. Sulak-ma, basa touk fo,

³ teun duahulu leo lain neu, boema nandaa da'di solda'du so. Muse sulak-kasa tunga esa-esak solda'dun.

⁴ Moke mauli-malanga leo-ingu esa neme leo-la esa-esak mai, fo ala fali emi.”

^5-16 Hataholi nanahelek soaneu ala fali Musa no Harun, fo ala da'di mauli-malangan neu leo-la esa-esak, na'den-nala nde ia: Leo Mauli-malangan Ruben Elizur, fo Syedeur anan-na Simeon Selumiel, fo Zurisyadai anan-na Yehuda Nahason, fo Aminadab anan-na Isakhar Netaneel, fo Zuar anan-na Zebulon Eliab, fo Helon anan-na Efraim Elisama, fo Amihud anan-na Manasye Gamaliel, fo Pedazur anan-na Benyamin Abidan, fo Gideoni anan-na Dan Ahiezer, fo Amisyadai anan-na Gad Elyasaf, fo Rehuel anan-na Naftali Ahira, fo Enan anan-na

Leo Mauli-malangan

¹⁷ No hataholi ka sanahulu duak sila-la tutulu-fafalin, de Musa ma Harun

¹⁸ ladenu hataholi Israel-la lala'en-na lakabubua nai hataholi Yahudi-la bula ka dua-na fain esa, boema ala sulak teidale bobongik manai leo-la esa-esak dalek, tunga tutuik la'enue bei-ba'in-nala. Basa touk fo teun duahulu leo lain neu, na'den-nala nanasulak ma nanalekek,

¹⁹ sama leo Manetualain paletan-na. Basa sila-la, Musa taon neme moo solokaek Sinai-a.

^20-46 Touk fo teun duahulu leo lain neu, fo landaa da'di solda'du, na'den-nala nanasulak tunga ndia leo-ingu ma teidale-bobongin, mulai neme Ruben, fo Yakob ana ulun-na, losa Naftali. Sila dede'un-na nde ia: Leo Hataholi-a dede'un-na Ruben 46.500 Simeon 59.300 Gad 45.650 Yehuda 74.600 Isakhar 54.400 Zebulon 57.400 Efraim 40.500 Manasye 32.200 Benyamin 35.400 Dan 62.700 Asyer 41.500 Naftali 53.400 Basan-basan lala'en-na, hataholi: 603.550

Leo Hataholi-a dede'un-na

⁴⁷ Hataholi Lewi-la, ta nanasulak lakabubua loo leo fe'ek-kala fa,

⁴⁸ nanahu Manetualain kokolak basa no Musa nae,

⁴⁹ “Nai lelek o sulak hataholi fo landaa da'di solda'du soona, boso sulak hataholi Lewi-la.

⁵⁰ Madenus fo ala ito-ato Au Lalaa Temang-nga no oe-isin lala'en-na. Sila bela-ba'un nde, ndolo Au Lalaa Teman-nga no oe-isin lala'en-na, boema ala ito-aton. Sila muse ofu nai boboa-kaisun.

⁵¹ Metema emi lali mamanak soona, hataholi Lewi sila nde ofe heni Au Lalaa Temang-nga, ma ala pasak falik-kana nai mamanak fo nai bee, emi ofu. Fe'ek neme hataholi Lewi sila-la mai, su'di see fo ana deka no Lalaa Temak ndia soona, muse nanahuku nisak.

⁵² Hataholi Israel fe'ek-kala, muse lapadedeik sila lalaa teman-na bubua-bubuak, fo esa-esak nai ndia bubuan dale, ma nai sila dedeon-na boboa-kaisun.

⁵³ Tehu hataholi Lewi-la, muse ofu okofeo-la Au Lalaa Temang-nga. Sila muse lanean, fo ela ta bole hataholi deka fan, nalosa ala tao-la Au amanasa, fo Au huku hataholi Israel-la.”

⁵⁴ Boema, hataholi Israel-la tao basa hata lala'en fo Manetualain paletan neu Musa.