AYUB 7 - Susula Malalaok Hehelu Palak Ma Hehelu Beuk

¹ Hataholi daebafak ndia, nono'kabai de, nananakasetik, fo ana ulepo'de sanga nanalak; so'dan-na belak-ka, sama leo hataholi nanase'ba-baek esa, so'dan-na; ma

² sama leo ata, fo nahiik hapu nasulu-nahapak; sama leo kuli, fo nahani sese'ba-babaek.

³ Au so'dang-nga, neme bulak leo bulak neu, ta hapu mate'e-mahanin fa; neme le'odaek leo le'odaek neu, au daleng-nga, henuk no dale he'dik-ka.

⁴ Metema, au u sungu soona, le'odaek-ka, nalun-na seli; au ahiik dulufula, de au ta hapu angape'uk no nee-nee lino-linok fa.

⁵ Au aopaang-nga, henuk no kalatik, ma daa bubua anak-kala; au loung-nga bisu, de ana faa nanak.

⁶ Au so'dang fo ta nanuu namahehenak ndia, ana la'ok leo mate'en-na neu, nalain-na, lena heni hataholi-a, sefe ofan-na.

⁷ Mafandele leon, ou Manetualain, te au so'dang-nga, ka'da ani hahaek esa mesak-kana; mopo au ua-naleng, de ta la'oela leen-na fa.

⁸ Besak ia, O mita au – tehu, ndia ta dook-ka fa. Metema, mahani te O sanga au, soona au taang-nga so.

^9-10 Sama leo ko'as-sa nasakoko'a, boema mopok-kana, leondiak boe, hataholi daebafak-ka maten, de neukose ta fali ma'i fan. Basa hataholi fo ala lalelak hain so, lafandele henin, de ta lafandelen so'on.

¹¹ Hu ndia de, au ta denge-denge ahele fa! Au ta hapu akatatakak ala, au dale he'ding-nga, ma au so'da makahe'dung-nga fa. Au muse kokolak, fo au kalua au daleng-nga oe-isin.

¹² Tao le'e de, O taoafik, ma O manea au ia akando? Ade, au ia, buta tasi fo maneni soe do?

¹³ Au angape'uk, fo au so'ba hahaeaong; fo au sanga da'uk, ba'eneu au dale manasusang-nga.

¹⁴ Tehu, O makabibiik au, nenik me'i-afek; O fe me'i-afe ta malole-a, ana mai.

¹⁵ Nalosa, au ahiik anseli, hataholi ki'du au botoliing-nga, fo mate au, neme au aso'da nai aopaak, fo henuk no doidosok ia.

¹⁶ Au sota-mangu, ma pela-malua au aso'da; au hii mate leona! Po'ilotak au, nana au so'dang-nga, sosoa-ndandaan ta.

¹⁷ Tao le'e de, O paluu-man seli, neu hataholi daebafak-ka? Tao le'e de, O taoafik neu tatao-nono'in tataas esa?

¹⁸ Tunga-tunga fafain-na, O palisak besa-besa moon, ma O folan tunga faik.

¹⁹ Fai hi'da, besak-ka O lepos masadea au, nalosa au hapu ko'do au apeng-nga?

²⁰ Hai, au Manamaneang-ngonei, ade O ta hapu nanalak, hu kande au sala-singong do? Tao le'e de, O pake au, da'di leo O kokouisim-ma mamana totolan-na? Ade au da'di lelepa mabela ba'eneu O do?

²¹ Ade, O ta hapu fe do'o do ampon neu au sala-singong fa do? Ade tean-na seli, soaneu O koka heni au salang-nga do? Dodoo faa te, au akandondoo nai lates dale, de metema, O sanga au soona, neukose O ta hapu au fa.”