AYUB 42 - Susula Malalaok Hehelu Palak Ma Hehelu Beuk

Ayub

^1-2 Ayub nataa Manetualain nae, “Ou Manetualain, au bubuluk, ae O Manakoasa; O mabe'i tao su'di beek-ka.

³ O matane, tao le'e de, au apalani au daleng-nga naba'e, soaneu O manatee-tenom-ma, te se'kona, au mesang-nga, ta bubuluk hata esa boen. Au kokolak la'eneu dede'ak, fo au ta alak-kasa fa, la'eneu dede'ak, fo matabeuk nanseli, ba'eneu au ia.

⁴ Lelek O kokolak soona, O madenu au amanene, ma metema, O matane soona, au fe natataak.

⁵ Makahulun-na, au malelang soaneu O-a, au amanenen ka'da neme hataholi mai, tehu besak ia, au alelak O, nenik tasasalematak.

⁶ Hu ndia de, au afandele basa au hala-kokolang lalaena soona, au mae, ma no nasasale dalek, au angatuuk nai dae sopuk ma afu dale.”

Susulak-ka nanakenak

⁷ Manetualain kokolak basa no Ayub, boema nafa'da Elifas nae, “Au amanasa o ma o tia-lai ka duam-mala, hu kande, emi ta mafa'da tunga ndoon-na, la'eneu Au aoinang-nga fa. Tehu, Au atang Ayub, ta leondiak fa.

⁸ Nah, besak ia, pa'a-ma sapi mane 7 ma bi'ilopo mane 7, fo muu leo Ayub. Basa soona, tunu-hotu bana sila-la, da'di leo tutunu-hohotu nanatunuk, soaneu o aoinam-ma. Neukose, Ayub hule-haladoi ba'eneu emi, de neukose, Au sipok huhule-haladoin. Leomae emi mandaa sipo huhukuk, tehu neukose, Au ta akamamaek emi fa. Emi ta mafa'da tunga ndoon-na, la'eneu Au aoinang-nga fa, tehu Ayub nafa'dan tunga ndoon-na.”

⁹ Elifas, Bildad ma Zofar tao hata fo, Manetualain nadenun, de Manetualain sipok Ayub huhule-haladoin.

¹⁰ Ayub hule-haladoi basa ba'eneu tia-lai ka telun-nala boema, Manetualain taon-nan, namasu'i seluk. Ana fen namasu'i diku la'i dua, neme su'i makahulun-na mai.

¹¹ Basa Ayub ka'an-nala, ma feton-na, boema basa hataholi nalela palaan-nala, ala mai donge-daman, boema ala feta sama-sama lon, nai uman. Lafa'da lae sila boeo, tunga susa neu basa susa-soe lala'en fo, Manetualain fen neu Ayub, boema ala fen kokoe-nanasik. Sila esan-na, fe Ayub doik, ma ndeli lilopilas beke esak.

¹² Manetualain ba'e-pala Ayub, nenik baba'e-papalak fo manasasi kao-kaok-ka, nai bei ela fai maso'dan-na dalek, lena heni neme tepo-lelek ana beita la'o la'di susa-soe-a fa. Ayub bi'ihii bi'ilopon 14.000, onta 6.000, sapi 2.000, keledei 1.000.

¹³ Ana bongi-na, anatouk 7, ma ana inak 3.

¹⁴ Ana foi ana inan makasososak-ka, na'de Yemima, ka dua, na'de Kezia, ma ka telu-a, na'de Karenhapukh.

¹⁵ Ta hapu anafe'oanak mata makeek nai nusak-ka lala'en-na, sama leo Ayub anafe'o ka telu nala fa. Ala hapu baba'ek sama no sila tolanoo toun-nala, neme sila aman pusakan-na mai.

¹⁶ Basa ndia boema, Ayub bei naso'da teuk 140 dalen-na, nalosa ana hapu nita nelun-nala.

¹⁷ Ayub namalasi nanseli, besak-ka maten.