AYUB 41 - Susula Malalaok Hehelu Palak Ma Hehelu Beuk

¹ Ade, o bisa ho'u-ma, beis Lewiatan-na, ka'da nenik dolu ia'ak esa do? Ade, o bisa pa'a maan-na, nenik tali papa'ak do?

² Ade, o bisa so'bo tali neu panan-na, do kakai besi neu nolin-na do?

³ Ade, fafa'kama ana dokodoe neu o, fo se'i po'in do? do nakokolaok no o, fo noke dale kasian do?

⁴ Ade, fafa'kama noke emi dua tao nakeketuk, ma maheluk, neukose nalalau-naoono o tataas esa do?

⁵ Ade, fafa'kama o pa'an, sama leo manupui nakaboboik-ka, fo nandaa no malalau-maoono inak-kala dalen-na do?

⁶ Ade, fafa'kama manadolu-dala-la, taon da'di bua nase'o-banasak, ma nanababa'ek nai manadangan-na tala'da do?

⁷ Ade, o bisa pau loon-na, nenik tee mata ka teluk, do o paun nenik dongi, fo tola langan-na do?

⁸ Koi la'en, ka'da la'i esa, fo neukose, o ta tao seluk-kana so'on; neukose o ta mafandele heni nakasusu'dik ndia, losa dodoon-na.

⁹ Ba'eneu hataholi see, fo nita Lewiatan-na soona, neukose aon-na ndole-ndaku, boema ana sapala'o

¹⁰ Metema, fafae nafo'an neme susungun dale mai soona, nasan-na fo'a; ta hapu hataholi esa boen, napalani napadeik nai matan-na fa.

¹¹ See kande, bisa sapu-nan, fo ta nakahina fa? Nai daebafak ia, ta hapu hataholi napalani tao fan.

¹² Mai fo, Au tui la'eneu Lewiatan-na, ei-liman, la'eneu be'i-balakain-na, ma ao makadelen-na.

¹³ Ta hapu hataholi esa boen, bisa siba'e ba'du dean-na, do ana pau tola ba'du natee-nata'tin, fo ana pakek-ka fa.

¹⁴ See bisa hea bafa mateainan, fo nisi mataneinan-nala nai dalek ndia?

¹⁵ Muliha'in-na, sama leo besi babaa fanak, fo nananakatoto'dok esa nakaditan-na esa, de tean-na sama leo batu-a.

¹⁶ Esa sa'en-na esa, nalosa anin-na boeo, ta susi nala dalek fa.

¹⁷ Babaa fanak ndia, lakadiditaok, de tean-na seli, nalosa ta bisa tao kofe'ek-kasa fa.

¹⁸ Metema, Lewiatan-na kisufani soona, mangale'dok-kala busu; matan-na nangale'do, sama leo le'do-a tii mai.

¹⁹ Ha'i-a nasapipiti neme bafan dale mai; ha'i masapipitik-ka, nasalolo'de leo mamanak lala'en-na neu.

²⁰ Ha'imasuk-ka, masu-masu neme pana bolon dale mai, sama leo ha'i-a na'a ha'ilutek-ka, de namasu nai la'o dale.

²¹ Ani hahaen-na, tao napila ha'ikaak-ka; ma ha'i pilak-ka, kalua neme bafan dale mai.

²² Kandoun-na mateaina, de nalosa hata lala'en-na, ala bii-lamata'u nai matan-na.

²³ Ta hapu mamana mangana'uk nai loun-na fa; ta bisa heaba'e fan, nanahu tean-na sama leo besi bai-a.

²⁴ Dalen-na natea, leo batu-a, de dalen-na ta naba'e fa, mateaina sama leo batu tututuk-ka.

²⁵ Metema, ana fo'a napadeik soona, hataholi mabe'i-balakaik boeo, mopo palanin-na, ana taon-nan, ndole-ndaku, nanahu ana bii-namata'u nanseli.

²⁶ Ta hapu tafaina, bisa tao nahina fan; tee, kokouk do dongi boeo, ta bisa tola fan.

²⁷ Nafa'da nae besi-a, lutuanak leo na'u-aiana, ma liti-a managana'u anak, leo ai puku taik-ka.

²⁸ Ta bisa usi henin, nenik kokouk fa, batu fo nanapiak neun-na, nono'kabai ha'deaik-ka.

²⁹ Ai kalapu'ak ba'eneu ndia sama leo na'u tuuk-ka; metema, hataholi pau dongi neu soona, ana hika.

³⁰ Unek manai tein-na, sama leo falefangik fo, pe'dan-na namatane. Ana kisu tane, fo ana fa'aba'en, sama leo luku-a

³¹ Ana dopok tasi-a, nalosa tasi-a, nalupa oe makadotok-ka; sama leo nasu mina nai tasu dale, fo nafufu'de.

³² Ana la'oela ei mamanan fo, nangale'do-a, ana tao nasafali tasi-a, da'di fufu'dek, de dulan-na fulak.

³³ Nai daebafak-ka, ta hapu hata esa boen, sama no fan; ndia nde mahaek fo, ta nalelak bibii-namata'uk-ka fa!

³⁴ Bana fo nanakoa-kiok nanseli boeo, ana meten soona, matasi'da-matasek; ndia nde manek, nai basa bana makaa-makisuk lala'en-na dalek.”