AYUB 4 - Susula Malalaok Hehelu Palak Ma Hehelu Beuk

Kokolak makasososak-ka 4:1–14:22 Elifas

^1-2 Boema, Elifas kokolak nae, “Ayub, metema au kokolak-na, o dalem-ma ba'ihana do ta? Au ta bisa denge-denge, ala dook-ka fa.

³ O manoli hataholi makadotok so, ma o matetea-mahehele hataholi tapandoes-sa dalen-na.

⁴ O hala-kokolam, neni manggatek, O hela mafofo'a hataholi manamakatunuk-ka, manandole-ndakuk-ka, ma manasota-manguk-ka.

⁵ Tehu besak ia, dale-he'dik-ka tunin-na o seluk; O nggenge, de o da'di hataholi manaketu namahehenak.

⁶ Ade, o lilineka neu Manetualain hetu; ade, o so'dam-ma, ta mabu'u-ba'ek fa hetu? Metema leondiak soona, nandaa o mamahele, fo ta ketu o namahehenam-ma fa.

⁷ Dodoo su'dik-kana, ade, susa-soe, beita tuni la'e hai, hataholi sala taak-ka fa do?

⁸ Tunga au mata memeteng-nga, soona hataholi manafoi-fala tina mangalauk-ka, fo ana sele-nggali bini-ngges susa-soe-a, da'di leo bubu'u-palusa de'en-na, soona, neukose ana ketu-kolu susa-soe, ma toto'a-tataak-ka!

⁹ Nono'kabai, ani-sangu-a, leondiak boe Manetualain nasa-melun, tao namopo-namates, losa mopos!

¹⁰ Hataholi mangalauk-ka, nangao ma ana nggo, ala dola sama leo singa. Tehu Manetualain ko'oketu bafan-nala, ma Ana helu la'di nisin-nala.

¹¹ Mates, sama leo singa kamala'ak-ka, nalosa anan-nala tapasasala.

¹² Ninitak esa, ana mai hai leo au mai, nono'kabai, namakukutuk nai au di'idong dale.

¹³ Au sungu, ta amanee fa, hu kande namakukutuk ndia, sama leo hapu me'is mangalauk, nai fai le'odaen-na.

¹⁴ Au nggenge-la, de au dele ngge'be-ngge'be; basa aong-nga lala'en-na, dele nuku-nuku.

¹⁵ Ani manafifilo anak-ka la'e au mata-panang boema au bulung-nga tinggou.

¹⁶ Au ita aok esa, napadeik nai au matang-nga; au mete te-teen, tehu au ta alelak-kana fa. Boema au amanene halak-ka nae,

¹⁷ ‘Ade, hapu hataholi sala tak nai Manetualain matan do ta? Ade, hapu hataholi bu'u-ba'en ta, nai Manetualain, mata memeten-na fo manamakadada'dik-kana do ta?

¹⁸ Nakalenak, Manetualain ata-atan manai nusa so'dak-ka, Ana ta hapu namahele fas. Nakalenak, nai ata nusa so'dan-nala dalek boeo, Ana hapu masalak ma mabu'u-ba'ek.

¹⁹ Muda hata no mahahaek fo, ana da'di neme dae ulek-ka mai, mahahaek fo neme afu-a mai, fo bisa ne'e nakalulutuk-kana sama leo andae-a!

²⁰ Mahahaek ndia, naso'da nai fai fafain-na, boema maten nai fai le'donoson-na, fo ta nafandelen so'on, losa dodoon-na.

²¹ Soona, mopo la'iesak hata-heton lala'en-na; ma maten no, ana ta hapu ha'da-palii malole fa.’