AYUB 39 - Susula Malalaok Hehelu Palak Ma Hehelu Beuk

¹ Ade, o bubuluk faihi'da, bi'ihiik manai letek lain-na, inan bongin? O mete matalolole hai, nusa fuik-ka bongi anan-na do?

² Ade, o bubuluk lailu bula-faik de'ubee do? Ade, o bisa leke-ma, faik fo, ala bongi-a do?

³ Ade, o bubuluk faihi'da ala pukudo aon-nala, boema ala bongi anan-nala?

⁴ Anan-nala boetai lamatuak-ka, ma balakaik nai moo solokaek-ka; de ala la'o, fo ala ta fali ma'is leo inan-nala mai fa.

⁵ See kande po'i keledei fuik-ka, nai nula dale? See kande, se'i heni talin-na, de ana po'ilotak-kana nadabak?

⁶ Au fen moo solokaek-ka, da'di leo uman-na, ma moo mamasik-kala, soaneu mamana leleon-na.

⁷ Ana dook-ka neme kota-la, ma makalupu-makaseek-ka mai, ta hapu hataholi, bisa tao kamau fas, fo ana fes tao bela-ba'uk fa.

⁸ Mamana nana'an-na, nai moo mana'uk manai letek-ka, ana sanga na'u-aiana momo'dok manai naa-la.

⁹ Ade, sapi fuik-ka, nau naue-nale'di fe o do? Ade, ana nau sungu nai, o lalaem dale do?

¹⁰ Ade o bisa pa'a-man, fo o lakan nakauuk fe o do? Ade o bisa madenun, fo ana foi-fala o tinam-ma do?

¹¹ Ade, o bisa mamahena, balakai matuainan-na, fo o fen naue-nale'di, o ue-le'di mabelam-ma do?

¹² Ade, o mamahelen, ana ba'un-na kabubua o keketu-kokolum buna-boan, ma o moon leo o mamana popo'de gandum-ma neu do?

¹³ Manupui onta, nakalalapa li'dan-na lai-lai nanseli! Tehu manupui danoe-a, ana laa soona, ana ta dai fan.

¹⁴ Manupui onta, natolo nai dae lain, boema ana la'o elan; soona solokaek-ka nde tao nato'bi tolon-na.

¹⁵ Ana ta name'da, nae hataholi heta la'e fan, ma bana fuik-kala heheta-aa'in.

¹⁶ Ana tao, nono'ka bai ndia anan ta ndia fa; ana ta paluu fa, metema ue-le'din manada'di tak.

¹⁷ Au nde tao-alan da'di nggoak ma panganaa, Au ta fen manatee-tenok ma dudu'a-aafik fa.

¹⁸ Tehu metema, nalaik soona, manggafa, ana sengi ndala no manasa'ek-ka.

¹⁹ Hai Ayub, o nde fe ndala balakaik, ma dedeo manangganggapek manai kandoun-na do?

²⁰ O nde madenun, fo nakaboku sama leo lamak-ka, ma nasakukuu, fo nakabibiik hataholi do?

²¹ Ana nafakakali dae nai bafak-ka, no namahoko-seteleek, ma no manggatek nanseli, ana sapu leo musu dale neu.

²² Ana ta bii-namata'u nalelak fa; ta nakadedeak neme tafaina mai fa.

²³ Manasa'ek-ka, nasakue tee-tafa manai tala'dan-na, metema mangale'dok la'en soona, langale'do.

²⁴ Ndala ndia nalaik no manggatek nanseli; metema pupuuk-ka nalii soona, ana nau ka'da nalaik leona.

²⁵ Metema pupuuk-ka nanapuuk soona, nasakukuu, ana hae-na natee-natatik-ka boon-na, neme dook-ka mai. Nai lelek malanga solda'du manai lain-nala, ala eki, fo ala fe paleta soona, namanene.

²⁶ Ade, o nde manoli manupui balupua laa, metema ana lofa li'dan-na, fo ana laa leo kona neu do?

²⁷ Manupui kaka'ka, ana beita tao ndunu-na nai lete madema lain fa, ana tunga paleta, ade o paletam ndia do?

²⁸ Nafofo'a uman-na nai lete batu-a poin-na; batu pe'da matane-la, da'di kota musun-na.

²⁹ Ana mete matalolole neme ndia, leo mamanak lala'en-na neu, matan-na titino sanga nana'an-na.

³⁰ Manamatek nai bee soona, nai ndia, fo anan-nala linu manamatek ndia daan-na.