AYUB 35 - Susula Malalaok Hehelu Palak Ma Hehelu Beuk

^1-2 Ayub, metema o maedaenga o salam ta nai Manetualain matan-na soona, o sala ndia.

³ O sala, metema o matane mae, o salam-ma, nanuu koasa beek soaneun; ma metema, o ta tao sala-singok fa soona, o hapu nanalak hata.

⁴ Neukose, au nde fe o, ma o tia-laim-mala natataak-ka.

⁵ Mete leo lalai mu, fo taoafik neu ko'as-sa deman-na seli.

⁶ Neukose, Manetualain ta kulang hata esa boen, metema o masala-masingo. Dalen-na ta tu'da fa, metema o salam-ma makadotok.

⁷ O ta tulu-fali Manetualain, nenik o tatao-nono'i malolem-ma fa. Te'e-te'e, Ana ta paluu hata esa boen, neme o mai fa.

⁸ O sala-singom, ka'da tao nakatutu'dak o nonoo hataholim-ma. Ndia boeo, nde hapu nanalak neme o malolem-ma mai.

⁹ Hataholi nanatuni-ndenik-ka, neukose nakadii-nakau; ala nggasi, loke tutulu-fafalik.

¹⁰ Tehu ta loke neu Manetualain, fo mana makadada'dik sila fa, fo manafe namahehenak neu sila, nai lelek sila susa,

¹¹ ma manafe hataholi daebafak-ka, dudu'a-aafik, lena heni manupui, ma bana-manu manai daebafak-ka.

¹² Hataholi nanatuni-ndenik sila-la, laloo bebou, tehu Manetualain denge-denge, hu kande sila hataholi mangalauk, ma dalen-nala henuk no koao-ndaeaok-ka.

¹³ Ala nggasi lapane'e lanseli, tehu manada'di tak; Ndia Fo Manakoasa, ta mete do namanene fas.

¹⁴ Ayub, nakalenak bai, metema o mafa'da, mae o ta mita fan, ma o mae o dede'am-ma, nai matan-na so, de o mahani talu-talu mon!

¹⁵ O maedaenga, Manetualain ta fe huhukuk, ma Ana ta taoafik neu la'olenak-ka fa.

¹⁶ O kokolak makandoo boeo, manada'di tak; nana, o ta bubuluk hata fo, o mafa'dak-ka fa.