AYUB 34 - Susula Malalaok Hehelu Palak Ma Hehelu Beuk

^1-2 Ade emi ta hataholi malelak ma madudu'a-aafik fa do? Nah, mamanene au hala-kokolang ia-la lala'en-na

³ Hataholi-a bubuluk nana'ak-ka mala'da, metema ana so'ban, ma nalelak dede'a manatee-tenok-ka, metema namanenen.

⁴ Ita muse palisak dede'ak ia, fo ata taketun sama-sama.

⁵ Ayub nafa'da nae, ‘Ta hapu salak nai au fa, tehu Manetualain ta nau fe au, ndoos ma matetuk-ka fa.

⁶ Nafa'da nae au, masapepeko-masandandalik, hu kande, au afa'da ae, au sala-singong ta. Besak ia, au doidosok belak, leomae au salang ta.’

⁷ Ade, emi mita hai hataholi, sama leo Ayub ia do ta? Ana hakinonoli Manetualain la'i nono'ik.

⁸ Ana hii tao tia-laik no hataholi, malelesik-kala, boema ana leo-napalasa no hataholi mangalauk-kala.

⁹ Nafa'da nae, metema ana sanga enok, fo ana tao tunga Manetualain hihii-nanaun, soona manada'di tak.

¹⁰ Hai hataholi manatee-tenok-kala lemin, mamanene leona! Te masa bole, Manetualain Fo Manakoasa ana tao salak?

¹¹ Ana balas hataholi daebafak-ka, nandaa no tatao-nono'in ma Ana taon nandaa no ha'da-paliin.

¹² Manetualain Fo Manakoasa, ta tao tatao-nono'i mangalauk fa; Ana fe ndoos ma matetuk-ka, neu basa hataholi lala'en-na.

¹³ Manetualain sipo koasa neme see mai? See kande fe daebafak ia, leo Manetualain neu?

¹⁴ Leouni'ka, Manetualain ho'i falik, hataholi daebafak-ka samanen-na, ma Ana ho'i falik ani hahaek-ka,

¹⁵ soona mate basa, mahahaek fo masamanek lala'en-na, ma hataholi daebafak-ka da'di dae, sama leo makasososan-na.

¹⁶ Nah, metema o dodole maneu soona, taoafik leona, pasak o di'idoom-ma, fo mamanene leona.

¹⁷ Ade, o fe salak neu Manetualain, fo ndoos matetuk, ma makadelek ndia do? Ade, nai o dale dodoom-ma, Manetualain ta hii ndoos ma metetuk ndia fa do?

¹⁸ Manetualain huku manek ma manakoasa-la, metema ala tao tatao-nono'i mangalauk, ma lalelesi.

¹⁹ Ana ta nok manek-kala, do Ana bibinga-baba'e hataholi kamasu'ik-ka, neme hataholi matasi'da-matasaek-ka mai. Nanahu, sila basa-basas nde been-na, Ndia lima tataan mesa-mesan.

²⁰ Fatila'da soona, sila bisa mate no kaiboik, Manetualain huku manakoasa-la, de sila boeo, mopo-mate; Ana taonisa hataholi mabe'i-balakaik ma palani, no mu'dak la'i esak-kana.

²¹ Ana nanea besa-besa no, hataholi daebafak-ka so'dan-na, nita basa ei hahain lala'en-na.

²² Leomae makahatu kiu-kiuina boeo, ta hapu makahatuk, fo bisa nafuni hataholi masala-masingok-ka fa.

²³ Ta paluu Manetualain naketu fain-na, soaneu hataholi daebafak-ka mai, fo naketu-nala'dis.

²⁴ Ana ta palisak besa-besa no manakoasa-la fa, te Ana kalua henis, fo Ana so'u hataholi fe'ek nggatin.

²⁵ Nana Ana bubuluk sila tatao-nono'in; de Ana tao natu'das ma Ana tao nakalulutuk-kasa ai fai le'odaen-na.

²⁶ Ana fapak sila hu ka nde sala-singon-nala, Ana huku sila nai lea matan.

²⁷ Nanahu, sila ta tao tunga hihii-nanaun fa ma ta taoafik neu basa paletan-na fa.

²⁸ Sila tao la hataholi nuu-taak hata-taak-ka haladoi sila kikii-namatanen-na Manetualain namanene.

²⁹ Metema Manetualain ho'i nakeketuk fo denge-denge soona, ta hapu esa boen napalani nakamulu-nakadaun. Metema Ana nafuni mata panan soona, ta esa nitan boen.

³⁰ Boema basa leoina-la ta lapalani, soaneu ala kena-ka'i tatao-nono'ik mangalauk-ka koasan-na.

³¹ Ayub, o manaku basa o sala-singom neu Manetualain so do beik? o helu basa mae o ta tao seluk sala-singok so'ok?

³² O moke hain so do beik soaneu Ana natu'du o sala-singok? O soo-supak hai so do beik soaneu hahae tatao-nono'i leondiak-ka?

³³ Masa bole Manetualain tao natetu hata fo o mahiik-kana, te sekona Manetualain tatao-nono'in soona o ta mahiik-kana? Besak ia, o nde maketu, te ta Au fa. Mafa'da o hahapum-ma ndene-bee!

³⁴ Basa hataholi malelak-ka neukose nakaheik-kana; Hataholi malelak fo namanene au, neukose nafa'da

³⁵ nae Ayub kokolak te ta nalelak fa, ma nae dede'a kokolan sosoa-ndandaan ta.

³⁶ Metema Ayub dede'a kokolan titino matalololen soona, neukose hapu ndoon-na, hala kokolan ndia sama leo hataholi mangalauk-ka.

³⁷ Nanahu o tao seluk sala-singok no nalena langa-nasa'ba soona; ana la'ban neu Manetualain, ma nakamumulu-nakamamaek-kana nai ita matan.