AYUB 33 - Susula Malalaok Hehelu Palak Ma Hehelu Beuk

¹ Hai Ayub, besak ia mamanene matalolole dede'a-kokolak, fo au sanga afa'dak ia-la.

² Au sadia basa sanga kokolak so.

³ Au kokolak no dale ndoos; hata fo au afa'dak ia, nde been-na tete'ek-ka.

⁴ Manetualain Duladalen-na, nakadada'dik au, de ana fe au maso'dak-ka.

⁵ Da'di, metema bisa soona, mataa au. Sadia o nasala'em-ma leona.

⁶ Ba'eneu Manetualain soona, o ma au sama, Ana tao ita neme dae-a mai.

⁷ Da'di, ta paluu o bii-mamata'u neu au fa; au ta anuu dudu'ak, soaneu tao akala o fa.

⁸ Nah, au amanene basa, hata fo o mafa'dak-ka so, ma au bubuluk, hata fo o dudu'an.

⁹ O mafa'da mae, ‘Au malalaok, ta tao salak fa. Au bu'u-ba'em ta, ma o ta tao salak fa.

¹⁰ Tehu, Manetualain sanga enok, fo la'ban au, ma Ana tao au da'di musu nok.

¹¹ Ana pa'a namosina neu au eing-nga; ma Ana mete besa-besa no au heheo-hihilung.’

¹² Hai Ayub, o hahapum-ma salan! Nana Manetualain ba'u lena heni hataholi daebafak-ka.

¹³ Tao le'e de, o makasasa'ek dede'ak neu Manetualain, mae Ana ta taoafik neu hataholi daebafak-ka, haladoin-na fa?

¹⁴ Manetualain kokolak nenik enok mata-matak-kala tehu, ta hapu hataholi esa boen, taoafik neu hala-kokolan fa.

¹⁵ Nai fai le'odaen-na, hataholi-a sungu namanee, Manetualain kokolak, nai me'is ma ninitak-ka dalek.

¹⁶ Manetualain nadenus, fo lamanene; Ana tao nanggengek-kasa nenik kekena-kaka'ik.

¹⁷ Dudu'an-na nae, fo ela ala hahae tao sala-singok, ma ala tu'u-tapa heni, sila koao-ndaeaon-nala.

¹⁸ Ana ta po'ilotak-kasa, la'o la'di nakalulutuk-ka fa; nasulu-nahapas neme mamates-sa mai.

¹⁹ Manetualain kena-ka'i hataholi-a, nenik Ana fe he'di-laus mai, nalosa he'dis-sa kapu aopaan-na.

²⁰ Hataholi kamahe'dis-sa, ta hii na'a-ninu fa, nana'a mala'da hiik-ka boeo, ana maluan.

²¹ Aon-na mangalo'do, fo memetek basa duin-nala.

²² Ana hihii nae, fali leo bolo mamates dale neu, hataholi manamatek-ka daebafan-na, deka non so.

²³ Fafa'kama ata nusa so'dak esa, neme Manetualain ata nusa so'dan 1.000 mai, ana fe hataholi daebafak-ka nasanene'dak, la'eneu bela-ba'un, fo neukose, ana mai tulu-falin.

²⁴ Neukose, ata nusa so'dak ndia, nafa'da no dale kasian nae, ‘Se'i po'i hataholi ndia, fo boso fen kona leo hataholi manamatek-ka, daebafan dale neu. Doi sosoin-na nde ia, de po'in leona.’

²⁵ Neukose aon-na da'di balakaik, ma makadelek, napena sama leo hataholi muli-soluk-ka.

²⁶ Metema, ana hule-haladoi soona, neukose Manetualain sue-lain, boema neukose ana koa-kio Manetualain, no namahoko-seteleek, ma neukose, Manetualain tao nabebeu so'dan-na.

²⁷ Soona neukose, nafa'da nai lea matan nae, ‘Hata mangalauk-ka, au afa'da ae malole, de au sala-singong, ba'un-na seli, tehu Manetualain ta huku au fa.’

²⁸ Manetualain ta nau au u leo hataholi manamatek-ka, daebafan-na u fa, nalosa besak ia, au bei aso'da.

²⁹ Manetualain tao basa ia-la, la'i nono'ik,

³⁰ fo ela Ana hapu soi-tefa-na, hataholi daebafak-ka, ma Ana fen ua-nale malole, nai maso'dan-na dalek.

³¹ Hu ndia de, Ayub mamanene leona, pasak o di'idoom-ma, fo denge-denge, te besak ia, au nde kokolak-ka.

³² Tehu metema, o sanga mafa'da hata esa soona, mafa'dan leona; fo metema o ndoos soona, neukose au akaheik-kana.

³³ Tehu, metema ta soona, denge-denge leona, fo mamanene au, te au sanga anoli o, manatee-tenok-ka.