AYUB 30 - Susula Malalaok Hehelu Palak Ma Hehelu Beuk

¹ Tehu besak ia, hataholi muli-soluk-ka, hakinonoli au. Makahulun-na, au mete sila aman-nala matasi'da-matasaek nanseli, soaneu lanea au bi'ilopong-ngala, ma au busa manafoong-nga.

² Sila sosoa-ndandaan ta, ba'eneu au, nanahu be'i-balakain-nala ta so.

³ Ala lamala'a, ma ala doi-doso lanseli, nalosa la'a aioka tuuk, nai moo solokaek,, fo nee-nee lino-linok-ka.

⁴ Ala fe'a makatemak nai moo solokaek-ka, fo la'a doon-na ma okan-na boe.

⁵ Hataholi-a usis nenik eeki doto-dotok-ka, sama-na leo, hataholi-a usi nakodaa.

⁶ Ala leo lai leak-kala dalek; bolo-bolok manai lete papalak-kala, da'di neu sila uman-na.

⁷ Ala nggasi beau lai lasi-la dalek, sama leo bana, ala leo bubua-bubuak-kala, nai makatemak manai nula-la dalek.

⁸ Sila ta mana'dek, ma ta mabelik fa, hataholi-la usi henis, leme sila nusan-na mai so.

⁹ Besak ia ala mai, de ala hika au; ma ala hakinonoli au.

¹⁰ Au matasi'da-matasaek ma ta malole, tunga sila mata memeten-na, nakalenak, ala mu'di ape neu au mata-panang.

¹¹ Hu kande, Manetualain taon-na au male-tale, ma manatulu-manafaling ta, ala ta lakatatakak lala aoinan-nala, soaneu lamanasa au fa.

¹² Hataholi bubua makahatuk ndia, ala sapu-la au neme uluk mai, ma ala tutu'u au tutu'dang-nga.

¹³ Ala tepa au enong-nga, fo ala tao lamopo-lamate au; nai lelek ala mai sapu, ta hapu hataholi esa boen, napanggenggee fas.

¹⁴ Ala hona au kota musung-nga, sama leo faa; basa-asas mai, de ala ne'e au aong-nga.

¹⁵ Bibii namata'u matuaina, ana potin-na au aoinang-nga; au na'de maloleng-nga, mopok-kana, sama leo anin-na; au ua-nale maloleng-nga mopon, sama leo ko'as-sa, mopok-kana.

¹⁶ Besak ia, au hihii mate; au doi-dosong, ta hapu namada'u fa.

¹⁷ Nai fai le'odaen-na, basa au duing-ngala makei; au ame'da he'dis, fo manapapauk-ka, ta nau hahae fa.

¹⁸ Manetualain nafanggete-na au ba'dung-nga, lesuha'in-na, nalosa au bua papakeng-nga, potin-na au aong-nga

¹⁹ Ana tapa au leo tane dale neu, de au da'di kadafu dae!

²⁰ Au aloo bou-bou neu O, ou Manetualain, tehu O ta fe natataak fa; metema, au hule-haladoi soona, O ta taoafik neu fan.

²¹ O tao au no, ta pake dale kasian fa, O tuni-ndeni au, nenik O be'i-balakaim lala'en-na.

²² O po'ilotak anin-na lepa neni au; O taom-ma au aoinang-nga, nabo'u-so'ek nai ani-sangu dale.

²³ Au bubuluk, O moo au leo mamates-sa neu, mamanak fo, basa hataholi maso'dak-kala, nanatao nakabubuak.

²⁴ Tao le'e de, O sapu-ma, hataholi manahapu soe, fo ana ta hapu tao hata esa boen, te ka'da ana dokodoe dale kasian?

²⁵ Ade, au ta kii o hataholi manasusak-ka, ma sue-lai hataholi manato'a-taak-ka fa do?

²⁶ Au amahena ua-nale malole, ma mangale'dok-ka, tehu manamaik-ka, nde toto'a-tataak ma makahatuk-ka.

²⁷ Au daleng-nga nakalulutuk, hu kande susa ma dale he'dik-ka; au doi-dosong boetai namaba'uk-ka, neme faik leo faik neu.

²⁸ Au ada'bak nai makahatuk dale, au apadeik nai lea matan, fo au oke tutulu-fafalik.

²⁹ Au halang-nga noi-noi, henuk no dale he'dik-ka sama leo busa fuik-ka no onta, kikiin-na.

³⁰ Au loung-nga nggeok; au aong-nga suumai.

³¹ Makahulun-na, au amanene sasanu liik-ka, no namahoko-seteleek, tehu besak ia, ka'da kikii-makaleleuk mesak-kana.