AYUB 3 - Susula Malalaok Hehelu Palak Ma Hehelu Beuk

Ayub haladoi neu Manetualain

¹ Basa boema, Ayub mulai kokolak ma ana soo-supa fai bobongin-na nae,

^2-3 “Ou Manetualain, soo-supa au fai bobonging-nga leona, ma le'odaek fo, au inang nailu au-a!

⁴ Ou Manetualain, tao-ma faik ndia, da'di fai makahatuk, fo O boso boe mafandele bain, nalosa mopok-kana; boeo, O boso po'ilotak, mangale'dok-ka nangale'do la'en.

⁵ Tao-ma faik ndia, da'di fai makahatuk kikiuina, keluha'buk fo ta nasalaa fa; poti-man, nenik ko'as, ma masakoko'ak-ka, babaaketun neme le'do-a haan-na mai.

⁶ Ela leo been-na, le'odaek ndia, nanatao namopok neme teuk ma bulak-ka leleken-na mai; boso boe nafandele bain, boeo boso boe seseik-kana bai.

⁷ Nemen-na, fo le'odaek ndia henuk no makiu-makahatuk, fo ta hapu susue-lalaik, ma namahoko-seteleek fa.

⁸ Hai, hataholi malelak ma manamanea Lewiatan-nala lemin, fe soo-supak ma soe-a, tunin-na faik ndia;

⁹ boso nalosak, nduuina nasalaa, boso fe dulufula! Nemen-na, fo palsuma la'iesak-kana, le'odaek ndia nahani fai, ma namahehena beuk-ka mamain-na.

¹⁰ Soo-supak ba'eneu le'odaek maneni soe, nai lelek, au inang bongi au-a, ma nanapo'ilotak, lu'a-lepa doidosok-ka.

¹¹ Tao le'e de, ta mate au nai au inang tein dale fa, do ketu au ani hahaeng-nga, nai lelek bongi au-a fa?

¹² Tao le'e de, au inang holu au, ma ana ko'o-ifa au, boema ana fe au su'u, su'un-na?

¹³ Leounik-ka, mate au nai hatematak ndia, soona au sungu, ma au hahaeaong no nee-nee lino-linok,

¹⁴ sama leo, basa mane-manek, ma manakoasa makahulun eli-la, fo lafofo'a falik, uma manek manai tepo-lelek makahulun eli.

¹⁵ Au sungu, sama leo manek-ka anamanen-na, fo ana tao nahenu uman-na, nenik lilofula lilopilas.

¹⁶ Tao le'e de, au ta nanabongi mates fa, fo ela au sungu amanee, fo au afandele heni basa hata lala'en-na?

¹⁷ Nai naa, fo nai lates dale, hataholi mangalauk-ka, ta tao tatao-nono'i mangalauk fa, ma kuli manasota-manguk-ka, ana hapu hahaeaon-na.

¹⁸ Boeo hataholi nanafook-ka, name'da dalen-na loak, ana ta hapu nasapalak neme basa manamanea-la mai fa.

¹⁹ Nai naa, basa hataholi-la sama; nananita-nalelak, ma ta nananita-nalelak fa. Ma mate'en-na, basa ata-la nanase'i-po'ik.

²⁰ Tao le'e de, hataholi daebafak-ka, nanapo'ilotak, naso'da no doidosok nakandoo? Tao le'e de, fe mangale'dok, neu hataholi dale he'dik?

²¹ Sila lahiik bolo mamates-sa, lena heni hata-heto, lahani mamates-sa, te mamates-sa ta losa fa.

²² Metema mates, fo nananatoi-natonok soona, besak-ka, ala hapu lame'da lita, tetu-temak-ka.

²³ Manetualain tao-nas ta bubuluk so'dan-nala, nai fai manamaik-ka, Manetualain nakahapi-nalas neme mamanak lala'en-na mai.

²⁴ Mananggati au nana'ang-nga, nde hoo-nggu'uk-ka, Au ta hahae haladoik-ka fa.

²⁵ Au teneng-nga hailua neu basa hata lala'en-na, ala tuni-la au, au bii-amata'u neu basa hata lala'en-na, ala mai leo au-a mai.

²⁶ Ta hapu tetu-temak, ba'eneu au fa, au doi-dosong-nga, mate'e-mahanin ta.”