AYUB 29 - Susula Malalaok Hehelu Palak Ma Hehelu Beuk

Ayub nakeketu mate'en-na, la'eneu dede'an-na

¹ Ayub kokolak nakan'doo nae,

² “Ela leo been-na, au so'dang-nga sama leo makahulun-na seluk, nai lelek, Manetualain nasulu-nahapa au-a.

³ Ana fe au, tutulu-fafalik tataas esa, Ana fe mangale'do-na, nangale'do-na au, nai lelek au la'ok nai makahatuk-ka dalek.

⁴ Ndia nde, au fai-fai ua-nale maloleng-nga, nai lelek Manetualain, leo-napalasa no au, ma nasulu-nahapa au umang-nga.

⁵ Lelek ndia, Fo Manakoasa bei noo nahele au, ma au anang-ngala, okofefeo-la au.

⁶ Au bana-manung fe kapaoe makadotok nanseli. Ma au ai setung-ngala, fe mina makadotok, leomae selen nai dae mabatuk lain boe.

⁷ Metema, lasi nggolok-kala langatuuk sama-sama, fo au angatuuk nai sila tala'da soona,

⁸ no lai-laik muli-soluk-kala lakadedeak, nai lelek lita au. Ma lasik-kala boeo, fo'a no ha'dak, fo ala fe ha'da-holomata.

⁹ Nakalenak, hataholi matua-madema-la, hahae kokolak-ka,

¹⁰ ma hataholi nananita-nalelak-ka, ta kokolak so'on.

¹¹ Su'di see boe, metema lamanene au na'deng-nga soona, lasamanan; su'di see, fo nita au soona, ana koa-kio au tatao-nono'i maloleng-nga.

¹² Nana, au tulu-fali hataholi nuu-taa hata-taak, fo manaloke tutulu-fafalik; au tia-to'ba kisa-anamaak, fo manatulu-manafalin ta.

¹³ Hataholi manato'a-taak nanseli-a, ana koa au, au tulu-fali inafalu-la, nalosa so'dan-nala tetu-temak.

¹⁴ Au ho'i nakeketuk soona, tunga ndoon-na, ma bu'u-ba'en ta; au apadedeik atetu ndoos ma matetuk-ka tataas esa.

¹⁵ Au da'di matak, ba'eneu hataholi pokek-ka, ma au da'di eik, ba'eneu hataholi lu'ueik-ka;

¹⁶ Au da'di amak, ba'eneu hataholi nuu-taa hata-taak-ka; au da'di manamasala'e, ba'eneu hataholi manamai-a.

¹⁷ Tehu, au helu la'di hataholi fo dale kasian ta, koasan-na, fo au soi-tefa-ala, tutunu-hohotun-nala.

¹⁸ Au namahehenang-nga nde been-na, au hapu teu naluk, ma au mate no mole-dame, nai au uma mesang-nga dalek.

¹⁹ Au sama leo ai manaleloakak-ka, fo okan-na hapu oe, ma dinis-sa nakadoe ndanan-na.

²⁰ Basa hataholi-la, koa-kio au tataas esa, ma au be'i-balakaing, ta naloe fa.

²¹ Metema, au fe nanoli-nafa'dak soona, hataholi-la bedenge; Lamanene besa-besa loo, au dede'a-kokolang lala'en-na.

²² Au kokolak basa soona, ta paluu hataholi popo-tama kokolak so'on; dede'a-kokolak ana susi faa-faa, sama leo u'dan-a ti'ti faa-faa.

²³ Basa hataholi-la sipok au dede'a-kokolang, no namahoko-seteleek, sama-na leo, hataholi manatao tina-osi-a, ana sipok u'dan-na nai fai sele-nggalin-na.

²⁴ Lelek ketu namahehenan-nala, soona au hume os; au mata-pana mapenang-nga, neni fes manggatek.

²⁵ Au nde da'di leo mauli-malangan, fo au ho'i basa nakeketuk lala'en-na, Au auli-alangas, sama leo manek-ka nai solda'dun-nala tala'da, ma au kokoe-nanasis, nai dale he'din-nala dalek.