AYUB 27 - Susula Malalaok Hehelu Palak Ma Hehelu Beuk

Ayub

^1-2 Boema Ayub kokolak nakandoo nae, “No Manetualain, fo maso'dak, fo Ana ta fe ndoos ma matetuk-ka neu au fa,

³ au soo ae: Lelek Manetualain bei fe au ani hahaek, lelek samanek-ka bei nai au aong dale,

⁴ au difadoong-nga, ta kokolak dede'a masapepeko-masandandalik, ma au maang-nga, ta kokolak tipu-daik fa.

⁵ Da'di, au ta nau afa'da, ae emi ndoos fa; losa mate boeo, au akatatakak ahele, ae au ta manggenggeok fa.

⁶ Au ho'u ahele au ndoong-nga, ma au dale bobongoanang-nga boeo, malalaok tataas esa.

⁷ Ela leo been-na, au musung-nga, nanahukuk da'di leo hataholi malelesik, ma au musu noong-nga, nanananolik da'di leo hataholi mangalauk.

⁸ Ade, hapu namahehenak ba'eneu hataholi mangalauk-ka, nai lelek Manetualain ho'i falik samanen-na do ta?

⁹ Ade, metema toto'a-tataak tuni la'en soona, neukose Manetualain namanene kikiin-na do ta?

¹⁰ Tunga ndoon-na, ana muse nahiik hapu namahokok neme Manetualain mai, ma ana hule-haladoi neun, tataas esa.

¹¹ Neukose, au anoli emi, la'eneu Manetualain koasa matuainan-na, ma au afa'da emi, Manetualain Fo Manakoasa, dale tutu'un-na.

¹² Tehu, emi basa-basam-mala, mita matam so. Da'di, teo le'e de, emi fe nanoli-nafa'dak, fo sosoa-ndandaa tak?”

Zofar

¹³ Boema Zofar nae, “Enon-na leoiak, fo Manetualain Fo Manakoasa huku hataholi fo, dale kasian ta, ma hataholi malelesik-ka.

¹⁴ Metema, anan makadotok soona, neukose mates nai natee-natatik dale, ma neukose upun-anan, laso'da nai toto'a-tataak-ka dalek.

¹⁵ Mate tolanoo ka'a-fa'din fo bei elak-kala, hu kande he'di-laus-sa, fo inafalun-nala, ta kii-makaleleu fas.

¹⁶ Bole nakaduduluk lilofulak, ma bua papaken-na ladodou,

¹⁷ tehu, basa lilofulak, ma bua papakek sila-la, neukose ala da'di hataholi dale ndoos-sa, nuun.

¹⁸ Hataholi mangalauk-ka, uman-na po'ok, sama leo bolau ndunuk-ka, fo ana da'di ka'da, hataholi manamanea tina-osi, uma lalalin-na.

¹⁹ Ana nangape'uk nakandondoo aoinan-na, sama leo hataholi kamasu'i-makabetek-ka, tehu ana ta bisa tao leondiak seluk fa, lelek ana fo'a neme susungun-na mai, te mopo basa su'i-beten so.

²⁰ Bibii-namata'u matuaina, tuni la'en, sama leo faa matuaina, ana mai no kaiboik. Ani-sangu nai fai le'odaen-na, ana ba'u nenin.

²¹ Ani timu-a, so'u nenin, de mopok-kana neme uman-na mai.

²² Susa-soe tuni la'en, no ta pake dale kasian fa, de nau do ta nau fa, neu sanga nasulu-nahapak

²³ Hataholi-la soluk tutu'dan-na, nenik totoko limak; ana hapu nakamumulu-nakamamaek nai mamanak lala'en-na.”