AYUB 23 - Susula Malalaok Hehelu Palak Ma Hehelu Beuk

Ayub

^1-2 Tehu Ayub nataa nae, “Au aule-ahelu ma haladoi neu Manetualai; au ta bisa akatatakak abe'i au hoo-nggu'ung fa.

³ Ah, ela leo been-na, au bubuluk, mamanan-na nai bee, fo ela au bisa u, fo au atongo on.

⁴ Soona au afa'dan, au dede'ang ia, dede'a nasala'e aok-ka, da'di oe faa neme au bafang-nga mai.

⁵ Au hii bubuluk, hata fo, neukose Nafa'dan, ma Ana fe natataan-na, leobeek.

⁶ Ade, neukose Ana fe koasan-na, neu au do? Ta! Tao leo bee-o, neukose namanene au dede'a-kokolang.

⁷ Au salang ta, de au bisa asala'e au aoinang-nga nai matan-na, soona neukose nafa'da nae, au ala deak losa dodoon-na.

^8-9 Au sanga Manetualain, nai dulu, muli, kona, kii, tehu nai mamanak lala'en-na, Manetualain ta nai ndia fa; de au ta bisa atongo o fan.

¹⁰ Tehu, Ana bubuluk basa au enong lala'en-na, boeo au ei nggangganing lala'en-na Metema, Ana fola au, sama leo lilopilas-sa, soona neukose, Ana bubuluk nae, au daleng-nga leo lilo isik.

¹¹ Au tungan no lilinekak; au beita singo ita neme enok fo, naketuk-ka mai fa.

¹² Au tunga Manetualain paletan-nala, tataas esa, au tunga hihii-nanaun, te ta au hihii-nanau mesang-nga fa.

¹³ Manetualain ndia, ta nasafali fa; ta hapu hataholi bisa la'ban-nana fa. Ana tao su'di beek, fo nahiik-kana.

¹⁴ Neukose, nakalala'ok dale tutu'un-na, neu au, fe'ek neme ndia mai, dale tutu'un-na, bei ba'uk-ka seluk bai.

¹⁵ Au dele ngge'be-ngge'be, nanahu au bii-amata'u neun; au boetai dudu'a-dodoo basa sila-la, au boetai, bii-amata'u.

^16-17 Fo Manakoasa, tao nakalulutuk basa au napalaning lala'en-na. Au bii-amata'u, hu kande Manetualain, te ta hu kande, makiu-makahatuk-ka fa, leomae makiu-makahatuk ndia, okofeo-na au, de ana poti ketu au mata-panang.