AYUB 20 - Susula Malalaok Hehelu Palak Ma Hehelu Beuk

Zofar

^1-2 Boema Zofar nataa nae, “Hai Ayub, o dede'a kokolam tao naau daleng-nga ba'ihana, de besak ia, au hii fe au natataang-nga no lai-laik.

³ O hala-kokolam sila-la, te'e-te'e neni nakamumulu-nakamamaek, tehu, au bubuluk natataan-na leo beek so.

⁴ Tehu ade o bubuluk do ta, neme tepo-lelek makahulun eli mai, fo mulai neme makasososan-na hataholi daebafak-ka leo nai daebafak-ka,

⁵ hataholi mangalauk-ka, namahoko-seteleen ta doo bee ana esa boen, ma hataholi malelesik-ka, namahokon-na, ka'da hatematak esa mesak-kana do ta?

⁶ Leomae matua-mademan losa lalai, nalosa langan-na koila'e ko'as-sa boe,

⁷ tehu neukose ana sapu-lalo losa dodoon-na, fo mopon neme daebafak-ka mai, no enok nakamumulu-nakamamaek. Hataholi fo lalelak hain-nana, neukose latane lae, “Hai, neu leo bee neu?”

⁸ Neukose mopon, sama leo me'is-sa, mopok-kana, sama leo mata memetek-ka, nai fai le'odaen-na.

⁹ Ta mitan fan; ana ta nai mamana leleon-na fa.

¹⁰ Fo makahulun-na, namanakon-na, hataholi nuu-taa hata-taak-ka hata-heton-na, anan-nala muse nggatin.

¹¹ Leomae ndia muli-soluk ma makadelek, ta doo be ana esa boen te ana da'dik dae sopuk so.

^12-13 Mangalauk-ka makeek nanseli, nai bafan dale! Nalosa ta nahiik ana ko'do fan; hu ndia de, ana pe'dan nai maan-na dae, fo ela name'da la'dan-na losa dook-ka.

¹⁴ Tehu nana'ak ndia losa tein dale soona, ana da'di nasafali, fo ana da'di laso maneni mamates.

¹⁵ Ana ko'do hata-heto nakok-kala, no nakasetik, ana muta henis; Manetualain kalua henin, neme tein dale mai.

¹⁶ Hataholi mangalauk-ka, neukose ninu laso maneni soe-a, hu laso ndia de, neukose maten, sama leo menge malasok-ka, ana kaan.

¹⁷ Neukose ana ta pake nita mina setun manasasi kao-kaok-ka, do kapaoe ma fanioe manasasi kao-kaok-ka fa.

¹⁸ Ana hapu bunak lala'en-na, muse ana fe falik-kasa; neukose, ta na'a nita ue-le'din buna-boan fa.

¹⁹ Nana ana tuni-ndeni, ma ana taon-na, hataholi nuu-taak-ka natofa-natalak; ana loso-na uma fo, ndia ta nde taon-nana fa.

²⁰ Hu kande tenepetan fo too-lanen ta ndia, de neukose, name'dan-nana, beita dai fa.

²¹ Metema na'a soona, na'a heni la'iesak-kasa, hu ndia de, tetu-teman ta nakatatakak fa.

²² Lelek tetu-teman boetai kae, doidosok ma dale he'dik-ka mai tunin-nalan.

²³ Lelek, ana pue-lau no na'a-ninuk-ka, Manetualain namanasa nanseli, de Ana hukun.

²⁴ Metema nalai fo dook-ka neme tafaina bai mai soona, neukose kokouisik neme liti-a tolan.

²⁵ Kokouisik-ka la'en, de nakahina; kokouisi mangale'dok-ka tola aopaan-na, boema bibii-namata'uk-ka, potin-nan.

²⁶ Tao makalulutuk basa hata-heton nanape'da lala'en-na; ndia no basa uma isin-na lala'en-na, ha'i na'a henis, tehu hataholi daebafak-ka ta nde tao ha'i ndia fa.

²⁷ Lalai-a, natu'du tatao-nono'i mangalaun-na, ma daebafak-ka fo'a, fo la'ban-nana.

²⁸ Neukose basa la'iesak su'i-beten lala'en-na, nanahu Manetualain nasa-melun, manalua ponu-ponun-na.

²⁹ Hataholi mangalauk-ka, ua-nalen nde ndia, ua-nalek fo, Manetualain naketun ba'eneun.”