Biblia Todo Logo
Bìoball air-loidhne

- Sanasan -

AYUB 18 - Susula Malalaok Hehelu Palak Ma Hehelu Beuk


Bildad

1-2 Boema Bildad nataa nae, “Hai Ayub, fa'ihi'da dei fo besak-ka o kokolak mate'e? Denge-denge leona, fo mamanene, besak ia, ami sanga kokolak.

3 Tao le'e de, o mafa'da mae ami nggoak, de o makasasamak ami no kapa-la?

4 O nasam-ma, ka'da tao nahe'di seluk o aoinam. Ade, hu kande o paluum-ma, de daebafak-ka muse namopo laun-na, ma letek-kala, muse keko heok leme mamanan-nala mai do?

5 Hataholi mangalauk-ka, banun-na, tao leo bee-o, nanafuu nisak; neukose, ta de'de seluk-kana so'on.

6 Mangale'dok manai lalaa teman dale-a, da'di makahatuk; nanahu banun-na ta pila fa.

7 Ei ngganggani matea-mahelen-na, da'di naleulilok; dale tutu'un-na taon-nan nakatunu.

8 Ana la'ok leo hihi'ik-ka dale neu, boema ein-na kai.

9 Hihi'ik-ka nala ei tingan-na, nalosa ho'u lan.

10 Hihi'ik-ka talin-na, nananakadofuk nai dae dale; hihi'ik-ka, ma lele'ek-ka nanapasak nai enok lain.

11 Bibii-namata'u matuaina, neme mamanak lala'en-na mai, de ana tao nanggengek hataholi mangalauk-ka; bibii-namata'uk-ka tungan, neme nggani eik leo nggani eik neu.

12 Makahulun-na mabe'i-balakaik, tehu besak ia, ana male-tale; soe-a non nai mamanak lala'en-na.

13 He'di belak-ka, na'a loun-na, alun-na, ma ein-na laboo pulu.

14 Nanaloso nenik neme lalaa teman, fo mamana nee-nee lino-linon-na dalek mai, boema, nanalele'a-lolosok leo mamates-sa neu.

15 Besak ia, su'di see-a, bole leo nai lalaa teman dale, fo ana nggali belerang, fo manatao namopo he'dis-sa.

16 Okan-nala kukulu, ma ndanan-nala lamatuu.

17 Ta lalelak-kana nai kota dale, do nai kota deak so'on; ta hapu hataholi esa boen, fo bei nafandendelek na'den-na.

18 Nanausi henik neme mangale'dok-ka mai, leo makahatuk dale neu; nana-nadook neme hataholi maso'dak-ka daebafan-na mai.

19 Ta maanak, ma ta matititi-nonosik fa; ta ela hataholin esa boen, nai nggolo-ta'dun-na fa.

20 Laun manai nusak muli-la, ala nggenge-la, nai lelek lamanene ua-nalen da'di tao leondiak, tehu laun manai nusak dulu-la, dele bengge'be, hu kande bibii-namata'uk-ka.

21 Hataholi malelesik-ka, ua-nalen leondiak, leondiak boe, hataholi fo ana ta taoafik neu Manetualain fa.”

Lean sinn:



Sanasan