AYUB 17 - Susula Malalaok Hehelu Palak Ma Hehelu Beuk

¹ Au le'do-faing deka so, de hihii nae, ketu au hahaeng-nga; ka'da bolo mamates-sa, nanasadiak ba'eneu au.

² Hataholi-la tao au da'di, hata fo nanahakinonolik; au itas ala kokolak hoholo hataholi.

³ Au ia hataholi dale ndoos, ou Manetualain. Mamahele neu au leona! See bai, fo bisa ana tia-to'ba au dede'a-kokolang?

⁴ O kena ketu dalen-nala, nalosa ta lalelak fa; boso nalosak besak ia ala sengi au.

⁵ Tunga dede'a nakalala'dik-ka nae, see kalaak nonoon-na, hu kande nanalak-ka soona, anan-nala nde neukose sipo babalan-na.

⁶ Besak ia, ala kokolak holo au, nenik dede'a nakalala'dik ndia; ala mai, fo ala mu'di ape neu au mata-panang.

⁷ Au matang-nga keluha'buk-ka, nanahu kikii dale he'dik-ka; nalosa au mangalo'do anseli.

⁸ Hataholi kamahehelek-ka ana nggenge, ma ana dodoo doak-kana; hataholi sala tak-ka nafa'da nae, au lamatuang ta.

⁹ Hataholi malole ma sala tak-ka, boetai namahele so'dan-na, eno-dalan nandaa no Manetualain dalen-na.

¹⁰ Tehu, leouni'ka, emi basa-basam-mala, mai leo ia mai, soona neukose, au ta hapu hataholi manatee-tenok esa boen.

¹¹ Au fai maso'dang-nga, seli so, de au dale tutu'ung lala'en-na, manada'di tak; mopo la'iesak au namahehenang-nga.

¹² Tehu, au tia-laing-ngala lafa'da lae, ‘Leodaek ndia lele'dok, de mangale'dok-ka, hihii nae losa so.’ Tehu, au bubuluk nai au daleng dale, ae au so'dang-nga, makahatuk nahele.

¹³ Au amahenak kande, daebafa mamates-sa, nai naa, neukose au sungu nai makahatuk dale.

¹⁴ Au foi au bolo mamateng-nga, na'de “Au amang”, ma kalatik mana'a au ao paang-nga, au okes ae, “Ina” ma “Au tolanoo inang”.

¹⁵ Au namahehenang-nga, nai bee; see nita, hapu ua-nalek soaneu au?

¹⁶ Metema, au kona leo hataholi manamatek-kala, daebafan dale u soona, au ta anuu namahehenak so'on.”