AYUB 16 - Susula Malalaok Hehelu Palak Ma Hehelu Beuk

Ayub

^1-2 Tehu Ayub nataa nae, “Nasi'an-na au amanene hataholi-la hahapun-na nae leo ia; O kokoe-nanasim ka'da doidosok mesak-kana.

³ Faihi'da, fo besak-ka, o hahae kokola bafa louk-ka? Beek kande fufu'di-oo'dok emi, fo fe natataak?

⁴ Leouni'ka emi nde au ia ma au nde emi soona, au boeo bisa kokolak sama leondiak boe. Au kokolak dede'ak makadotok nanseli, o emi; neukose au akakale langa.

⁵ Neukose, au atetea-ahehele emi dalem-ma, nenik nadedenuk mata-matak-kala; au dede'a-kokolang, neukose ana fe kokoe-nanasik.

⁶ Metema, au kokolak soona, au doi-dosong ta naloe fa; metema au denge-denge soona, sosoa-ndandaan-na, beek?

⁷ Manetualain taon-na au sota-mangu; au uma ising lala'en-na nanatao namopo-namatek so.

⁸ Ndia la'ban au de Ana ho'un-na au. Besak ia ela ka'da au dui-loung so, de ba'eneu hataholi makadotok soona, ndia nde da'di buti, nae au asala-asingo so

⁹ Manetualain sii-sii lulu'i au aopaang-nga no nasak; Ana mete au no mata panan pila lo'a-lo'a.

¹⁰ Hataholi-la laka'uk bafan-nala, fo ala hakinonoli au; Lakamomotu-la au, de ala tutu-fepa au ma ala fapa au nasebu'ung-nga.

¹¹ Manetualain fe au leo hataholi fo tatao-nono'in ta malole; Ana fe au leo hataholi mangalauk-ka liman dale neu.

¹² Makahulun-na au so'dang-nga nee-nee lino-linok ma so'da-molek, tehu no kaiboik, Manetualain sapu-na au. Ana ki'du-na au kandoung-nga, de Ana tapa heni au; Ana tao au da'di mamana nanolik.

¹³ Ana ta kasian au fa te, Ana kou nahele au, nalosa, au tei-ateng, poka leo deak mai.

¹⁴ Ana sapu sama leo palani ta'ti batu, de Ana tao nakahina au, la'i nono'ik.

¹⁵ Au pake kalong, fo da'di leo ta'du-tana dale he'dik, ma au angatuuk nai dae sopuk-ka dale, nanahu au nanasengik so.

¹⁶ Au mata-panang pilas, hu kande kikiik-ka; au mata loung-nga peta, ma ana kapahe'duoe.

¹⁷ Tehu, au ta tao naseti-nalakak fa; de au hule-haladoi, no dale ndoos neu Manetualain.

¹⁸ Hai daebafak-konei tatao-nono'i mangalauk soaneu au-a, boso mafunin; boso denge-denge moo au ngganggasing, fo au oke ndoos ma matetuk-ka.

¹⁹ Au bubuluk, ae au Manamasala'eng-nga, nai nusa so'dak-ka; Ana sakasii nae, au sala-singong ta.

²⁰ Au tia-laing-ngala, ala hakinonoli ma ala hika au; au u leo Manetualain, no kikiik, fo au oke tutulu-fafalik.

²¹ Ah, sa'di leo been-na, Manetualain mesak-kana, nasala'e au nai matan-na, sama leo hataholi esa, ana nau nasala'e tia-lain.

²² Au teu-faing fo bei elak-ka, ta ba'uk-ka so'on; ba'ihanak seluk bai te au la'o fo neukose, au ta fali ma'ing-nga fa.