AYUB 12 - Susula Malalaok Hehelu Palak Ma Hehelu Beuk

Ayub

^1-2 Boema Ayub nataa nae, “Memak, hataholi daebafak-ka lima boboa konan-na, nde emi ia. Metema, mate emi soona, mate manatee-tenok-ka boe.

³ Au boeo, hataholi daebafak madudu'a-aafik boe; basa hata fo, emi mafa'dak sila-la, au alak-kasa so. Bai te, see kande, ta bubuluk basa sila-la fa? Da'di, boso maedaenga, emi lena heni au!

⁴ Au nonoong-ngala, ma au tia-laing-ngala, ala hika-hume au, te se'kona, au ia ndoos, ma ta mabuu-ba'ek fa. Makahulun-na, Manetualain nataa au huhule-haladoing, neu faik bee fo, au aloo bou-bou oke tulu-fali au.

⁵ Emi makamumulu-makamamaek, hataholi manahapu soe-a nai lelek emi so'dam-ma nee-nee lino-linok; hataholi fo, esabain-na ana tu'da, emi bei fepan bai.

⁶ Tehu, hataholi manabonga uma, so'dan-na nee-nee lino-linok; hataholi fo, napalani la'ban Manetualain-na, so'dan-na tetu-temak. Te se'kona, lasalai dean-nala neu lamatua daebafak-ka, fo ka'da be'i-balakaik mesak-kana.

⁷ Matane manupui-la, ma bana fe'ek-kala, soona neukose, ala fe emi nanolik.

⁸ Moke nafa'da mangalele'dok neme mahahaek manai daebafak-ka, ma manai tasi dale-la, soona neukose, emi hapu nafa'da mangalele'don-na.

⁹ See, nai basa sila-la dalek, ana ta bubuluk, nae manamakadada'dik sila nde been-na, ka'da Manetualain mesak-kana?

¹⁰ Ndia nde, ito-ato basa mahahaek lala'en-na, so'dan-na; Ndia nde koasa, hataholi daebafak-ka ani hahaen-na.

¹¹ Sama leo, au maang-nga hii nalamei nita nana'a mala'da, leondiak boe, au di'idoong-nga, nau namanene hala-kokolak.

^12-13 Lafa'da lae, manatee-tenok-ka, nai hataholi lasik-kala, tehu, manatee-tenok-ka ma be'i-balakaik, ka'da nai Manetualain mesak-kana. Lafa'da lae, dudu'a-aafi manadaik-ka, ka'da nai hataholi lasik-ka, tehu, dudu'a-aafi manadaik-ka, ma manadodoo-tataik-ka, nai Manetualain boe!

¹⁴ Hata fo, Manetualain ofe henin, soona ta bisa nafofo'a falik-kana so'on, Manetualain tao see, da'di hataholi nanafook soona, ta nana po'ik so'on.

¹⁵ Ana bakate'te ketu oe-a, soona basa-basan lala'en-na, lamatuu, ma ala da'di dae tokotik; Metema, Ana soi henin, soona faaina mai!

¹⁶ Manetualain ndia, balakaik, manasengik, ma nai uluk tataas esa! Hataholi manatipu-daik, ma hataholi nana tipu-daik-ka, lai Manetualain koasan-na dae.

¹⁷ Ana ho'i-heni basa manapaleta-la manatee-tenon-na, ma Ana tao basa mauli-malangan-nala, da'di hata fa nanahika-humek.

¹⁸ Ana nakonaheni manek-kala neme paletan-nala mai, fo Ana taos da'di hataholi nanafook;

¹⁹ nakadadaek imam-mala, ma lasi nggolok-kala.

²⁰ Ana ko'o ketu hataholi malela dede'ak-kala bafan-na, Ana ho'i-heni, hataholi lasik-kala, manatee-tenon-na.

²¹ Nakamamaek hataholi nananita-nalelak-kala; Ana ho'i-na, sila fo manakoasa-la, koasan-na.

²² Ana fe mangale'dok neu, mamana manamama'uk-kala; Ana tao nangale'do salaok nggeoina.

²³ Ana taon-na leoina-la lakapela, ma tetu-temak, boema, Ana tao namopo-namates, losa beelutu.

²⁴ Ana taon-na, mauli-malangan-nala, da'di lapangamak, nalosa laleu-lalaak, no huu-pe'dan ta.

²⁵ Ala lafangganggao, nai makahatuk dale, ma laleu-lilok, sama leo hataholi manamafuk-ka.