AYUB 11 - Susula Malalaok Hehelu Palak Ma Hehelu Beuk

Zofar

^1-2 Basa boema, Zofar nae, “Ade, hataholi manakokolak bafa louk ndia, ta hapu natataak fa do? Ade, hataholi bafa maloa ndia, muse fen ndoos do?

³ Ayub, o maedaenga, ami ta mataa mabe'i o fa do? O maedaenga, ami denge-denge, nanahu o hakinonolim-ma do?

⁴ Tunga o hahapum-ma, o hala-kokolam sila-la, ta sala fan; tunga o hahapum-ma, o malalaok nai Manetualain matan.

⁵ Tehu, sa'di leo been-na, Manetualain mesak-kana kokolak!

⁶ Fo sa'di leo been-na, nafa'da o, nae manatee-tenok ndia, enon ba'uk-ka, de hataholi daebafak-ka, ta nalelak-kana fa. Soona besak-ka o mame'da, mae o doidosom ndia, ta ba'u bee esa boen, metema, nakasasamak-kana no huhukuk fo, nandaa o sipon-nana.

⁷ Masa bole, o bisa malelak Manetualain dudu'a-aafin? Masa bole, o malelak koasan-na too-lanen?

⁸ Koasan-na, dema lena heni lalai maloa; o ta bisa dai fan, fo o ho'i ma fan. Koasan-na, dema lena heni, hataholi manamatek-kala, daebafan-na, o ta bisa malelak-kana, makandondook fa.

⁹ Manetualain koasan-na, nalu lena daebafak-ka, ma loa lena tasi maloaina.

¹⁰ Metema, Ana ho'un-na o, fo no o leo manakee-manafulan neu, soona see kande napalani napanggenggee Ndia?

¹¹ Manetualain nalelak hataholi fo, ana hii ka'da nasapepeko-nasandandali; nita la'i esak, sila tatao-nono'i mangalaun-na.

¹² Metema, keledei ina fuik-ka ana bongi keledei ana kamaus soona, besak-ka hataholi nggoak-ka, da'di manatee-tenok.

¹³ Ayub, tao balisi o dalem-ma, fo sale dale neme o sala-ma leona! Hule-haladoi neu Manetualain leona!

¹⁴ Lose heni sala-singok manai o dalem dale-a, ma usi madook, mangalauk-ka neme o umam-ma mai.

¹⁵ Soona o bole, masasale matak mo maso'dak ia, no dale matea-mahelek, ma napalanik; neukose, o mapadeik mahehele, ma ta paluu hela-hae fa,

¹⁶ nakalenak, o ta mafandele seluk o doidosom so'on; fo hataholi-a nafandele henin, sama leo faa le'e.

¹⁷ Neukose, o so'dam-ma mangale'dok, lena heni fai lele'dok-ka, ma nai lelek, o so'dam-ma makahatuk-ka, neukose mangale'dok, sama leo mangale'do fafaik-ka.

¹⁸ Neukose, o matea-mahele, ma henuk no namahehenak-ka; neukose, Manetualain nasulu-nahapa o, nalosa o nee-nee lino-linok.

¹⁹ Neukose, o ta bii-mamata'u neu musu nok-ka fa; neukose, hataholi ba'uk-ka, loke tutulu-fafalik neme o mai.

²⁰ Tehu, hataholi mangalauk-ka, neukose ana mete, fo napangamak, nana, ta hapu tutulu-fafalik ba'eneu sila fa. Sila namahehenan-na, ka'da kisak esa mesak-kana, fo nde, mamates-sa, losa lai-lai leona.”