AMSAL 9 - Susula Malalaok Hehelu Palak Ma Hehelu Beuk

Manatee-tenok ma nggoak

¹ Manatee-tenok-ka napadede'ik-na uma, ma ana tao natetetu dii kahitun-nala.

² Ana do'do bana manu soaneu feta, ana tao angol oek ma ana sadia nana'a-nininuk.

³ Nadenu malalau-maoono inak-kala, soaneu laloo bou-bou neme mamana madema-la fo manai kota,

⁴ “Se fo ta nalelak hata esa boen soona, bole mai leo ia mai!” Manatee-tenok-ka nafa'da neu madudu'a-aafi taak-ka nae,

⁵ “Mai fo mu'a mita au nana'ang-ngala, ma minu mita angol fo au tao aok-kala.

⁶ Tunga hataholi mantee-tenok-ka enon-na, fo tu'u-tapa heni dudu'a-aafi taak-ka, fo ela o maso'da no tetu-temak.”

⁷ Metema hataholi fo ta nau nanoli-nafa'da fan soona, o matu'du salan-na, soona neukose ana hika-hume o. Metema o mamanasa hataholi mangalauk-ka soona, neukose ana dodoki-aali o.

⁸ Boso makadadaek hataholi fo ana ta nau nanoli-nafa'da fan, te neukose ana nakamuu-nakadau o. Tehu metema o matu'du hataholi manatee-tenok-ka salan-na soona, neukose ana nalelak ha'dak neu o.

⁹ Metema o manoli-mafa'da hataholi manatee-tenok-ka soona, neukose ana da'di manatee-tenok lena seluk bai. Ma metema o manoli-mafa'da hataholi fo ana tunga Manetualain paletan-na soona, malelan-na boe tama seluk.

¹⁰ Soaneu da'di manatee-tenok soona, makasososan-na hataholi muse nanuu nameme'dak ha'da-holomata, ma bii-namata'u neu Manetualain. Metema o malelak ndia Fo Malalao-Malalafuk-ka soona, neukose o hapu dudu'a-aafik.

¹¹ Manatee-tenok-ka ana fe o teu fai manalu.

¹² Metema o manuu manatee-tenok soona, neukose o mesam-ma hapu nanalak. Tehu metema o tipa heni manatee-tenok-ka soona neukose o ta hapu hata esa boen.

¹³ Nggoak-ka nde been-na sama leo inak ba'u bafa fo dudu'a aafin taa, ma ana ta bubuluk bibii-mamaek-ka fa.

¹⁴ Ana nangatuuk nai uman-na lelesun-na matan-na, do nai kota lelesuinan-na.

¹⁵ Nai ndia naloo bou-bou neu hataholi fo manala'ok tunga ndia. Ana fufu'di-oo'dok hataholi fo dale ndos-sa,

¹⁶ “Hei, emi fo dudu'a-aafi taak-kala lemin, mai leo ia mai!” Ana nafa'da neu hataholi fo ta nalelak hata esa boe, nae,

¹⁷ “Oe nakok-ka la'dan-na makek-ka, ma ta'a tafufunik-ka mala'dahiik nanseli.”

¹⁸ Sila fo manada'di ndia nana'an-na ala ta bubuluk lae hataholi fo mana leu donge nana latongo lo fai mamaten-na nai ndia; ma sila fo manaleu lo uman dale, besak ia lai hataholi manamatek-kala daen-na so.