AMSAL 8 - Susula Malalaok Hehelu Palak Ma Hehelu Beuk

Nanoli-nafa'da manatee-tenok

¹ Mamanene! Manatee-tenok-ka naloo bou-bou, manatee-tenok-ka botik halan-na.

² Ana napadeik nai pupukuk manai enok-ka su'un-nala, ma nai enok kaba'ek-kala.

³ Nai lelesuina fo enok masok leo kota neu-a, nai ndia halan-na nananamanenek.

⁴ “Hei, hataholi daebafak-kala lemin, au aloo neu emi; basa mahahaek manai daebafak-ka lemin, tao afik neu au dokodoeng-nga!

⁵ Emi fo dudu'a-aafi manadai tak-kala lemin, manoli manuu dudu'ak matane; emi fo nggoam-ma seli, manoli da'di manatukatei-manasale dalek.

⁶ Tao afik neu au hala-kokolang, nanahu basan lala'en-na nandaa ma masosoak.

⁷ Fo au afa'dak-kala, la'e la'iesak-kasa, nana au akamuu masandandalik-ka.

⁸ Au hala-kokolang-ngala basas ndoos ma matetuk, ta hapu esa boen fo puputa-papaik do sala fa.

⁹ Ba'eneu hataholi dodole maneua, au kokoang-nga la'en, ba'eneu hataholi fo manatee-tenok-ka, soon au kokolang-nga matetuk.

¹⁰ Fe ha'da-holomata neu au nanoling-ngala lena heni lilofulak isik-ka, tao makahuluk malelak-ka lena heni lilopilas isik-ka.

¹¹ Au nde been-na manatee-tenok-ka, belin-na lena heni neme poemata mai; ta hapu nakasasamak-kana nenik hata esa boen fo o mamahenak-ka fa.

¹² Au nde been-na manatee-tenok-ka; malelak-ka hapun nai au, manatee-tenok-ka ana bubuluk basa hata lala'en-na.

¹³ Fe ha'da-holomata neu Manetualain soona sosoan-na nae, makamuu-makadau manatao mangalauk-ka; Au ta hii manakoao-ndaeaok-ka ma manamamatutua-mamadedema aok-ka fa. Au akamuu-akadau heheo-hihiluk mangalauk-ka, ma hala-kokolak manatipu-daik-ka.

¹⁴ Au nde fe dudu'a-aafi maneu. Ma au boeo anduku-alosak-kana. Au dudu'a maneu ma balakaik boe.

¹⁵ Au tulu-fali manek-kala lakalala'ok paleta, au tulu-fali basa manakoasa-la tao latetetu ndoos ma matetuk-ka.

¹⁶ Hu kan nde au tatao-nono'i maloleng-nga de, basa hataholi matua-madema-la ma basa mane ana-la ala paleta no ndoos ma matetuk-ka.

¹⁷ Au sue lai sila fo lahik neu au; manasanga au-a, neukose latongo lo au.

¹⁸ Su'i-betes-sa nanasadiak nai au, ha'da-holomata ma tetu-temak-ka boe.

¹⁹ Hata fo o hapu neme aumai-a, lena heni lilopilas isik-ka; belin-na lena heni lilofulak isik-ka.

²⁰ Au tunga enok ndoos ma matetuk-ka, au la'ok nai enok fo tunga ka'da ndoon-na.

²¹ Hataholi fo manasue-lai au-a, au taon da'di kamasu'i; au tao ahenu uman-na nenik hata-heto.

²² Manetualain nakadada'dik au da'di leo makasososak, au nde been-na lima tatan-na buna-boa makasososan-na fo nai lelek makahulun eli.

²³ Au nananakada'dik neme le'do fai makasososak-ka, nai makasososan-na nai lelek daebafak-ka beita nakadada'dik-kana fa.

²⁴ Bongi au te tasi maloaina beita nananakadada'dik fa, oe mata-la beita ka'di fas.

²⁵ Bongi au te, letek-kala beita latetu fa, beita lapadede'ik pupukuk-kala fa.

²⁶ Manetualain beita nakadada'dik daebafak-ka, nakalenak beita nakadada'dik dae bubuak makasososak-ka fa.

²⁷ Au sakasii matang nai lelek lalai-a nanalofak, ma lalai-a nanabetubalak nai tasi poin-na.

²⁸ Nai lelek Manetualain pe'da ko'as-sa nai lalai-a, ma ana huka tasi maloa oe matan-nala,

²⁹ nai lelek Ana paleta tasi oe-a fo ela boso seli daetoon-nala. Au emen-na boe nai lelek daebafak-ka neten-na nanape'dak.

³⁰ Au ka'da nai boboan-na da'di leo ana susuen-na su'di faik au nde been-na ndia tetu teman-na; au akaminak tataas esa nai matan-na.

³¹ Au amahoko-setelee nai daebafak-ka poin-na, ma ame'da amahoko nai hataholi daebafak-ka tala'da.

³² Hei hataholi muli-soluk-konei! Mamanene neu au, Tunga au natutu'dung-nga, soona neukose o tetu-temak.

³³ Sipok ma nanoli-nafa'dak fo da'di manatee-tenok, o boo pela-ngalin.

³⁴ Namahoko-seteleek ba'eneu hataholi fo namanene neu au, fo su'di faik nangatuk nahani nai au umang-nga lelesun-na, ma manamaneak nai au mamana leleong-nga lelesuinan-na.

³⁵ Se hapu au soona, ana hapu maso'dak-ka, soona nanda neu Manetualain.

³⁶ Se ta hapu au fa soona, ana tao nakatutu'dak aoinan-na mesak-kana; hataholi fo manamakamuu-makadau au-a, ana sue mamates-sa.”