AMSAL 5 - Susula Malalaok Hehelu Palak Ma Hehelu Beuk

Nasanene'dak la'eneu hohonge

¹ Anang-ngonei, mamanene au leona! Taoafik neu au manatee-tenong ma dudu'a manadaing, fo au anolin neu o,

² fo ela o bubuluk, tao leo beek fo, o muse ito-ato o aoinam-ma, ma kokolak da'di leo hataholi malelak.

³ Inak ta malole-a, hala-kokolan makeek sama leo fanioe-a, ma dede'a-kokolan, tao natu'da hataholi dalen-na,

⁴ tehu basa sila-la sapu-lalao soona, ela ka'da makahe'duk ma doidosok-ka.

⁵ O nanahehela-lolosok leo hataholi manamatek-ka daebafan-na neu; enok fo ana la'ok tungak-ka, ana leo mamates-sa neu.

⁶ Ana ta nahele nai enok fo, ana leo maso'dak-ka neu fa; ana ta bubuluk fa te, ana singo neme enok ndia mai so.

⁷ Hu ndia de, anang-ngala lemin, mamanene au dede'a-kokolang, fo boso mafandele henin.

⁸ Madook aoinam-ma, neme inak matak leondiak-ka mai! Nakalenak boso deka moo uman-na.

⁹ Metema, o leo-mapalasa moo inak ndia soona, neukose mopo o na'de malolem-ma, ma hataholi fo dale kasian ta, neukose ana ho'i-na o so'dam fo, lelek o bei muli-solum-ma.

¹⁰ Neukose hataholi fe'ek ho'i-na basa o su'i-beten, ma hataholi fo o ta malelak-kana fa, nanuu o sosota-mamangum buna-boan.

¹¹ Mate'en-na, neukose o haladoi, metema he'di-laus na'a heni o aom-ma.

¹² Boema, neukose o mafa'da mae, “Ah, tao le'e de, au ta hii nanoli-nafa'dak fa? Tao le'e de, au tan au hataholi nasanggai au fa?

¹³ Au ta nau amanene au meseng-ngala fa, ma au tan au tunga fas.

¹⁴ Te se'kona au tu'da basa nai laun-na mata mamaten-na so.”

¹⁵ Hu ndia de, lilineka neu o saoinam-ma mesak-kana, ma fe o susue-lalaim neu ka'da ndia mesak-kana.

¹⁶ Sosoa-ndandaan ta ba'eneu o, sanga lole-la'dak neme hataholi fo, o saoinam ta ndia fa.

¹⁷ Lole-la'dak ndia, hehelik soaneu o moo o saoinam-ma, te ta soaneu hataholi fe'ek fa.

¹⁸ Hu ndia de, ela leo been-na, o maua-manale moo o saoinam-ma mesak-kana; sanga lole-la'dak neme anafe'oanak fo o ka'bing basa moon so –

¹⁹ anafe'oana mata-makeek ma makabitik sama leo nusa. Nemen-na fo aopaa malole-ma'an-na taon-na o, mamulu tataas esa moon, ma susue tou-ta'en-na taon-na o mafuk.

²⁰ Anang-ngonei, nasa sao-anak soaneu ina fe'ek-ka, sosoa-ndandaan hata? Sosoak hata, sese'do-babalik moo inak ta malole-a fa?

²¹ Manetualain nita basa lala'en fo, hataholi daebafak-ka tao-no'in. Hataholi daebafak-ka neu su'di leo bee neu boe, Manetualain mete nahelek-kana.

²² Hataholi mangalauk-ka sala-singon, sama leo hihi'ik-ka, fo nala seluk hataholi ndia.

²³ Ana mate, nanahu ana ta sipok nanoli-nafa'dak fa. Nggoan-na, non leo nakalulutuk-ka neu.