AMSAL 4 - Susula Malalaok Hehelu Palak Ma Hehelu Beuk

Nanalak fo hapun neme manatee-tenok-ka mai

¹ Hai, anang-ngala lemin, mamanene emi amam nanoli-nafa'dan. Taoafik neu basa sila-la, soona neukose o da'di hataholi manatee-tenok.

² Hata fo au anolin neu o ia, malole, hu ndia de, o boso heheta-aa'in.

³ Lelek au bei anang-nga, fo au amang anaulun-na,

⁴ au amang nanoli au. Ana nafa'da nae, “Mafandendelek au nanoli-nafa'dang-ngala, fo boso mafandele henis makandondook. Makalala'ok au natutu'dung-ngala, fo ela o so'dam-ma naua-nanale.

⁵ Da'di hataholi manatee-tenok, ma malelaina. Mafandendelek au nanoling-ngala tataas esa, fo boso tu'u-tapa henin.”

⁶ Boso tu'u-tapa heni manatee-tenok-ka, soona neukose nasulu-nahapa o, sue-lain, soona neukose nanea o, fo ela o nee-nee lino-lino mahele.

⁷ O muse tao dede'ak fo nanapaluu makasososak-ka nde, sanga enok fo da'di hataholi manatee-tenok. O usi su'di hata beek-ka boeo, makasososan-na nde, sanga enok fo hapu dudu'a manadaik-ka.

⁸ So'u laik manatee-tenok-ka, soona neukose ana so'u namadedema o. Holun, soona neukose o nanafe ha'da-holomata.

⁹ Neukose ana fe o, bunga nanabalias manahiik, fo ana da'di o ti'ilanga manem-ma.

¹⁰ Anang-ngonei, mamanene au! Taoafik matalolole, au nanoli-nafa'dang-ngala, soona neukose o teum-ma namanalu.

¹¹ Au anoli basa o manatee-tenok-ka, ma au atu'du o, so'da ndoos-sa eno dalan so.

¹² Metema o maso'da leondiak, soona neukose ta hapu manamapangge-ngge, nai lelek o la'ok, ma neukose o ta makatunu, nai lelek o malaik.

¹³ Mafandendelek tataas esa, neu nanolik fo, o sipo basan neme au mai so. Manea matalolole basa sila-la, nana no nanolik sila-la, fo o so'dam-ma, neukose nabuna-naboa

¹⁴ Boso tunga hataholi mangalauk-ka so'dan-na eno-dalan, ma boso tunga sila tatao-nono'in.

¹⁵ Boso tao o dalem-ma neus. Madook aoinam-ma neme hataholi sila mai, ma la'ok makandoo!

¹⁶ Hataholi managalauk-ka, ana ta hapu sungu fa, metema ana beita tao tatao-nono'i ta malole fa. Ala beita tekauk fa, metema ala beita tao soe hataholi fe'ek fa.

¹⁷ Tatao-nono'i mangalauk-ka, ma naseti-nalakak-ka nde been-na, sama leo sila nana'a-nininun.

^18-19 Hataholi mangalauk-ka enon-na makahatuk, sama leo makahatuk-ka nai fai le'odaen-na. Ala lakatunu, fo ala tu'u leu, tehu ala ta bubuluk fa. Nasafalin-na, enok fo hataholi malole-a la'ok tungak-ka nde been-na, sama leo le'do-a tii mai; ana boetai mangale'dok-ka, losa mate'en-na, mangale'don-na namatua.

²⁰ Anang-ngonei, taoafik neu au hala-kokolang! Mamanene au nanoli-nafa'dang.

²¹ Boso tu'u-tapa henin, te pe'da tataas esa nai o dalem dale.

²² Hataholi manabubuluk-kana, neukose naso'da, ma so'da-la'dak.

²³ Manea matalolole o dalem-ma, nana o dalem-ma naketu o so'dam-ma eno-dalan.

²⁴ Boso kokolak makandondook hata esa, fo ta ndoos fa. Usi madook kokolak fo masapepeko-masandandalik-ka, ma dede'a-kokolak fo tutu'dan-na, neni matofa-matalak fe hataholi.

²⁵ Ela leo been-na, o mata-panam, natu'du o dale ndoom-ma; ta palu o tao, nono'kabai poek-ka nai batu selik.

²⁶ Dodoo-tatai matalololen, fo besak-ka taon, soona neukose o hapu buna-boak nai o ue-le'dim dale.

²⁷ Madook aoinam-ma neme mangalauk-ka mai, ma maso'da tunga ndoon-na. Boso singo meme eno ndoos-sa mai makandondook.