AMSAL 31 - Susula Malalaok Hehelu Palak Ma Hehelu Beuk

Nanoli-nafa'dak soaneu manek

¹ Ina Lemuel, fo Manek Masa, ana kokolak dede'ak-kala nde ia, soaneu anan-na, nae,

² “Anang-ngonei, au susueng-ngonei, au bongi o, da'di neu natataak neu au huhule-haladoing. Ade, au sanga afa'da o beek?

³ Boso didilo-dodolo o balakaim-ma, do nggenggela-ngganggali o be'i-balakaim neu inak. Nana mopo-mate manek ba'uk-ka, hu kande inak-ka.

⁴ Mafandendelek, Lemuel! Ba'eneu manakoasa, ta nandaa ninu angol, ma nininu ala-lalu boe.

⁵ Nana, metema manek-ka ninu ala-lalu soona, neukose nafandele heni hoholo-lalanek, ma ana ta taoafik neu hataholi tapandoes-sa fa.

⁶ Ala-lalu nde been-na, ka'da soaneu hataholi manamale-talek-ka, ma manadale he'dik-kala.

⁷ Ala linu, fo lafandele heni nuu-taa hata-taan, ma toto'a-tataan-nala.

⁸ Masala'e sila fo, ala ta bisa lasala'e aoinan-nala fa. Masulu-mahapa, hataholi manatulu-fali taak-kala, hak-ka.

⁹ Matee-mata'ti soaneus, ma da'di manakee-manafula ndoos ma matetuk. Masulu-mahapa hataholi nuu-taa hata-taak-ka, ma hataholi nanatuni-ndenik-ka, hak-ka.”

Saoina malelak

¹⁰ Susa la'i esak-kana, sanga saoina malelak; ndia belin-na, lena heni lilopilas-poemata.

¹¹ Neukose, saotoun-na, ta to'a-taa hata esa boen, hu kande, ana tao namahehelen-na neu.

¹² Ana ta tao nita mangalauk, neu saotoun-na fa; nai fai maso'dan-na dalek, ana tao malole soaneu saotoun-na.

¹³ Ana manggate nakaduduluk ha'deaik, ma bi'ilopo bulu, boema nakalupu tenu-henge.

¹⁴ Ana ho'i nana'ak neme mamana dook mai, sama leo manadangan-nala, ofan-nala taok-ka.

¹⁵ Ana fo'a fafaianak, fo ana sadia fe uma isin-nala nana'ak, ma soaneu, ana baba'e fe malalau-maoonon-nala bela-ba'uk.

¹⁶ Ana sanga dae duduik esa, boema ana asan-nan; ana hapu osi angol esa neme tutunga-sasangan mai, de ana foi-falan.

¹⁷ Ana sadia matalolole aoinan-na, fo naue-nale'di no puselaipana.

¹⁸ Ana bubuluk, nae ana tao basa hata lala'en-na, neni nanalak fen; ana tao bela-ba'un, losa le'odae.

¹⁹ Ana le'a a'bas, fo ana tenu si'di.

²⁰ Ana ta mali hataholi manato'a-taak-ka fa; dalen-na malole, neu hataholi manapaluu tutulu-fafalik.

²¹ Metema, fai makasufuk-ka losa soona, ana ta bii-namata'u fa, nanahu, ana sadia fe uma isin-nala ba'du hanas.

²² Ana tenu aon, temak fo belan neu uman-na laten lain, bua papaken-na, nanatenuk neme tema a'balutu pilabalanggeok, fo mana'an-na seli.

²³ Saotoun-na nde been-na, hataholi nananita-nalelak – fo hataholi esa, neme basa mauli-malangan kota dalek mai.

²⁴ Ana tenu boalo'as ma kalikee fo nase'o neu manadangan.

²⁵ Nana nita nalelak ma nanafee ha'da-holomata; ma ana ta bii-namata'u neu fai manamai-ka fa.

²⁶ Ana kokolak no dale mangana'uk; dede'a kokolan manatee-tenok.

²⁷ Ana manggaten-nanseli, ma ana taoafik neu uma loon ito-aton-na.

²⁸ Anan-nala fe ha'da-holomata neun, ma saotoun-na sue-lain.

²⁹ “Saotoun-na nafa'da nae, hapu inak neulauk ba'uk-ka, tehu o malolem-ma nakalena neme basa inak sila-la mai.”

³⁰ Mata-pana makeek-ka ta hapu namahehelek, ma mata mana'a neukose mopon; tehu inak fo namahele neu Manetualain nandaa hapu kokoa-kikiok.

³¹ Hu ka nde tatao-nono'i neulaun-na; hu ndia de inak ndia nandaa nanafee ha'da-holomata nai basa mamanak-ka lala'en-na!