AMSAL 30 - Susula Malalaok Hehelu Palak Ma Hehelu Beuk

Agur dede'a-kokolan

¹ Agur, fo Yake neme Masa mai, anan-na, ana kokolak dede'a-kokolak-kala nde ia: “Au sota-mangu, ou Manetualain, au sota-mangu! Basa au be'i-balakaing so!

² Au nggoak sama leo bana-manu; au dudu'a manadaing ta.

³ Au beita anoli ita, manatee-tenok-ka fa, au ta bubuluk faanak boen, la'eneu Manetualain.

⁴ Hataholi see-ka, kae-kona hai nusa so'dak-ka so? Ana nafanggete hai anin-na neme liman dale, ma ana poti oe nai ba'dun dale, do naketu daebafak-ka, too-lanen so do beik? See ndia, ma anan-na nde see? Tao leo bee-o, o bubuluk-kana!”

⁵ Manetualain tao natetu hala hehelun lala'en-na. Ndia sama leo babaa fanak esa, ba'eneu basa hataholi fo, ala mai lasulu-lahapa neun.

⁶ Metema, o makadaik hata fo nafa'dan, soona neukose Ana ka'i o, ma Ana fe buti, nae o masapepeko-masandandalik.

Nanoli-nafa'da fe'ek de'ubee

⁷ “Ou Manetualain, au beita mate fa, te au dokodoe, fe au dede'ak dua nde ia.

⁸ Boso nalosak, au kokolak dede'a-kokolak peko-pakik, ma pepekok, ma boso fe au nuu-taa hata-taak do kamasu'i-makabetek. Ka'da fe au, hata fo au paluuk-ka.

⁹ Nana, metema au amasu'i soona, fafa'kama au afa'da, ae au ta paluu O so'on. Ma metema, au nuu-taa hata-taak soona, fafa'kama au amanako, nalosa au tao anggenggeo O na'dem-ma.”

¹⁰ Boso makasasa'ek dede'ak neu ata esa, neu tuan-na, nana mahani te, ana soo-supa o, ma nafa'da nae o masala.

¹¹ Hapu hataholi nggelok soo-supa aman, ma ala ta fe ha'da-holomata neu inan fa.

¹² Hapu hataholi nggelok, lafa'da lae sila malalao-malalafuk, te se'kona, manggenggeon-na seli.

¹³ Hapu hataholi nggelok, lame'da aoinan-na, malole nanseli – malolen-na seli!

¹⁴ Hapu hataholi nggelok sanga so'dan-na, nenik tatao-nono'ik, fo dale hataholin ta; hataholi sila, mangalaun-na seli, ma lakatutu'dak hataholi nuu-taa hata-taak-ka, ma hataholi tapandoes-sa.

¹⁵ Kelumatuk-ka anan dua; duas na'de, “Soaneu au”! Hapu dede'ak haa, fo lame'dan, beita dai fa, fo nde:

¹⁶ hataholi manamatek-ka daebafan-na, inak manabongi taak-ka, dae tuuk fo, ana paluu u'dan, ma ha'i fo, nasalolo'de su'di leo bee neu.

¹⁷ Hataholi fo, ana hakinonoli ina-aman fo lamalasi so, nandaa tapan leo deak neu, fo manupui kaa, ana tutu matan-na, fo manupui kaka'ka, na'a popolan-na.

¹⁸ Hapu dede'ak haa, tean-na seli ba'eneu au alelak-kana, fo nde:

¹⁹ manupui kaka'ka, fo ana laa nai lalai, menge fo, ana lo'do nai batu piak lain, ofak fo, ana la'ok nai tasi tala'dak, ma touanak esa no inaanak esa lahiik.

²⁰ Inak fo, ana ta lilineka neu saotoun-na, eno tipu-dain nde ia: Ana sosoa-piao basa soona, na'a-ninu, fo lose bafan-na, fo basa soona nafa'da nae, “Au ta tao hata esa boen!”

²¹ Hapu dede'ak haa, daebafak-ka lala'en-na, ta sipok-kana fa, fo nde:

²² ata esa da'di manek, hataholi nggoak esa, ana hapu basa hata lala'en, fo nahiik-kana,

²³ inak esa, ana bisa ka'bing, te se'kona hataholi ta hii fan, ata inak esa, natona-na, inyora nangatutuun-na.

²⁴ Nai daebafak ia, hapu bana 4, anak-ka, tehu malelan-nala seli, fo nde:

²⁵ Ne'ek-ka, bana esa balakain ta, tehu ana sadia nana'an-na, nai fai hanas-sa.

²⁶ Nusa ana, bana esa tapandoes, tehu ana tao uman-na nai pupuku batu lain.

²⁷ Lamak-ka, bana esa ta nanuu manek fa, tehu ala la'ok lakadadalak, no malole.

²⁸ Tekela'bak-ka, bana esa, bisa ho'un nenik limak, tehu hapun nai manek-ka uma manen dale.

²⁹ Hapu bana haa, metema taoafik neu lala'on-nala soona, ei nggangganin-nala, mana'ahiik, fo nde:

³⁰ Singa, bana esa, balakain-na lena heni basa bana lala'en-na, ma ana ta bii namata'u neu su'di beek-ka boen;

³¹ bi'ihii mane, manulaluk fo, ana la'ok natetu, ma manek fo, nai laun-na matan.

³² Metema, hu kande o nggoam-ma, de no namatutua-namadedema aok, o tutu'u dede'a mangalauk-ka, de manea!

³³ Nana, metema o dopok kapaoe-a soona, mantega kalua. Metema, o fepa hataholi panan soona, daak-ka kalua. Metema, o mafofo'a nasa-meluk soona, o nai nale'a-napilik-ka dalek.