AMSAL 29 - Susula Malalaok Hehelu Palak Ma Hehelu Beuk

¹ Metema nanoli-nafa'da see, fo ana la'ban nakandoo soona, neu faik esa te, neukose nakalulutuk, fo ta bisa tao matalololen fa.

² Metema, hataholi ndoos ma matetuk-ka, ana paleta soona, laun-na namahoko-setelee. Tehu metema, hataholi mangalauk-ka, ana koasa soona, laun-na doi-doso.

³ See nau manatee-tenok-ka soona, nandaa no aman dalen-na. See leo-napalasa no manasosoa-piaok soona, ana didilo-dodolo tali-doin.

⁴ Metema hataholi manakoasa, ana taoafik neu ndoos ma matetuk-ka soona, neukose nusan-na natea-nahele. Tehu metema, ana paluu ka'da doik-ka soona, neukose nusan-na nakalulutuk.

⁵ See so'u laik nonoo hataholin-na soona, ana lona hihi'ik, soaneu aoinan-na.

⁶ Hataholi mangalauk-ka, sala-singon, nakahihi'ik-na seluk-kana, tehu hataholi manatao ndoos-sa, namahoko ma naua-nanale.

⁷ Hataholi malole-a, ana bubuluk hataholi tapandoes-sa hak-ka, tehu hataholi mangalauk-ka, ta dodoo nala fan.

⁸ Hataholi fo, ana hii nakamuu-nakadauk-ka, ana tao tasi'bu kota, tehu, hataholi manatee-tenok-ka, tao natenak heni nasa-meluk-ka.

⁹ Metema, hataholi manatee-tenok-ka no hataholi dudu'a-aafi tak-ka, ladede'a soona, hataholi dudu'a-aafi taak ndia, ka'da natutu-nafepa, ma ana hika, nalosa nakadada'dik tasi'bu.

¹⁰ Hataholi manamaa ma'da daak-ka, ta hii hataholi dale ndoos-sa fa, tehu, hataholi malole-a, nasulu-nahapan.

¹¹ Hataholi dudu'a-aafi taak-ka namanasa le'do-le'dok, tehu, hataholi manatee-tenok-ka, ta haelai namanasa fa, ma nakatatakak-na nasa-melun

¹² Metema hataholi manakoasa, taoafik neu hala pepekok-ka soona, neukose, basa hataholi mana'a ngga'din-nala, da'di hataholi mangalauk.

¹³ Hataholi nuu-taa hata-taak esa, no hataholi manatuni-ndenin-nana, duas sama; Manetualain fe duas matak, fo lita maso'dak-ka mangale'don-na.

¹⁴ Metema, manek-ka nasala'e hataholi tapandoes-sa, hak-ka soona, neukose ana paleta teu-teuk.

¹⁵ Nanolik, ma kekena-kaka'ik-ka, taon-na hataholi-a, da'di manatee-tenok. Ni'iana fo, ina-aman tunga dale hihiin-na tataas esa, neukose nakamamaek ina-aman.

¹⁶ Metema, hataholi mangalauk-ka, ana paleta soona, la'olenak-ka, boetai nakadele. Tehu, hataholi dale ndoos-sa, neukose ana hapu loak, nita hataholi mangalauk-ka, nakalulutun-na.

¹⁷ Manoli o anam-ma, soona neukose, ana fe o tetu-temak, ma neni namahokok fe o.

¹⁸ Leoina fo, ana ta hapu hela-nolek neme Manetualain mai fa, ana da'di leoina, fo henuk no tasi'bu. Maua-manalek ba'eneu hataholi fo, ana tunga Manetualain hoholo-lalanen.

¹⁹ Ta bisa nanoli ata esa, nenik ka'da dede'a-kokolak fa, nalelak-kana, tehu ana ta taoafik neu fan.

²⁰ Hataholi nggoa-panganaa namahehenan-na, ba'uk-ka lena neme hataholi fo ana kokolak, te ana ta dudu'a-dodoo nakahuluk fa.

²¹ Ata fo nananakatutuak neme muli-solun-na mai, mate'en-na neukose ana da'di langa batuk.

²² Hataholi fo, namanasa lai-lai-a, taon-na hataholi ba'uk-ka lale'a-lapilik, fo lasala-lasingo.

²³ Hataholi fo namatutua-namadedema aoinan-na, neukose nananakadadaek; hataholi dale taidaek-ka, neukose nanakoa-kiok.

²⁴ Hataholi fo, ana tao-no'i sama-sama no nakodaa, sosoan-na nae, nakamuu-nakadau seluk aoinan-na. Metema, ana tui no mangale'dok nai uma manakee-manafula soona, neukose hukun. Tehu metema, ka'da denge-denge soona, neukose Manetualain soo-supan la'en.

²⁵ Bii-mamata'u hataholi dede'a kokolan soona, neninin-na toto'a-tataak. Mamahele neu Manetualain soona, neukose o nee-nee lino-linok.

²⁶ Hataholi ba'uk-ka, ala nau sosolo manakoasa-la dalen-na, tehu manafe ndoos ma matetuk-ka, nde ka'da Manetualain mesak-kana.

²⁷ Hataholi malole-a, ta nape'da dale nasak no hataholi mangalauk-ka fa; ma hataholi mangalauk-ka, nakamuu-nakadau hataholi malole-a.