AMSAL 28 - Susula Malalaok Hehelu Palak Ma Hehelu Beuk

¹ Hataholi mangalauk-ka nalai, leomae hataholi ta usi fan, tehu hataholi dale ndoos-sa, napalani sama leo singa.

² Metema, leoina nasala-nasingo soona, manakoasan-na nggati-nggati; metemamauli-malangan manatee-tenok soona, neukose leoina nakatatakak, ma tetu-temak nahele.

³ Manakoasa fo, ana tuni-ndeni hataholi nuu-taa hata-taak-ka, sama leo u'daina mai, fo ana tao nalutu, tina-osi buna-boan.

⁴ See ta taoafik neu hoholo-lalanek fa soona, nok hataholi mangalauk-ka; see tunga hoholo-lalanek soona, ana la'ban hataholi mangalauk-ka.

⁵ Hataholi malelesik-ka, ta nalelak natalolole ndoos ma matetuk-ka fa, tehu hataholi fo, ana sene-do'ok neu Manetualain-na, te'e-te'e nalelak-kana.

⁶ Malole lenak, hataholi nuu-taa hata-taak fo, dalen-na ndoos, neme hataholi kamasu'ik, fo manatao peko-pakik-ka mai.

⁷ Ta'eanak fo, manatunga hoholo-lalanek-ka nde been-na, hataholi manatee-tenok. Tehu, hataholi fo, ana leo-napalasa no hataholi manadodolo-didilok-ka, nakamamaek aman.

⁸ See da'di hataholi kamasu'ik, hu kande ana ho'i bunak, ma ana ho'i nanalak makadotok nanseli soona, neukose su'i-beten, tu'da leo hataholi fo, nanuu dale kasian, soaneu hataholi nuu-taa hata-taak-ka, liman dale neu.

⁹ Metema, o ta tunga Manetualain hoholo-lalanenfa soona, neukose Manetualain boeo, malua o huhule-haladoim.

¹⁰ See fufu'di-oo'dok hataholi dale ndoos-sa, fo daenga ana tao tatao-nono'i mangalauk soona, ndia nde tu'da leo hihi'ik dale neu. Hataholi fo, dalen-na neu isik, neukose nanaba'e-palak, fo naua-nanale.

¹¹ Hataholi kamasu'i-makabetek-ka, name'da aoinan-na manatee-tenok, tehu, hataholi nuu-taa hata taak fo, dale malole-a, bubuluk see ndia.

¹² Metema, hataholi malole-a koasa soona, basa hataholi-la lamahoko, te metema, hataholi mangalauk-ka, paleta soona, laun-na leu ke'ke.

¹³ See nafuni sala-singon soona, neukose ana ta hapu nanalak fa. See manaku, ma ana tu'u-tapa heni sala-singon soona, neukose Manetualain sue-lain.

¹⁴ Fe ha'da-holomata tataas esa neu Manetualain, soona neukose o maua-manale. Metema, o la'ban-nana soona, o hapu soe.

¹⁵ Hataholi mangalauk, fo ana koasa hataholi manato'a-taak-ka, sama leo singa manamangaok-ka, do meoasu, fo ana sapu-na hataholi.

¹⁶ Manakoasa fo, manatuni-ndeni hataholi fe'ek-ka, ta nanuu dudu'a-aafi neulauk fa; manakoasa fo, ana ta hii eno peko-pakik-ka fa, neukose ana paleta teu-teuk.

¹⁷ Hataholi kanisak esa, name'da nanausik nakandoo, losa maten; ta hapu hataholi esa boen, bisa napanggee-na fan.

¹⁸ Hataholi fo, naso'da no bu'u-ba'en ta soona, neukose naso'da. Hataholi fo, so'dan-na dopelele'u, neukose ana tu'da.

¹⁹ Hataholi manatao tina-osi fo, puselaipana no ue-le'dis-sa, neukose ana hapu nana'ak manadaik; tehu hataholi fo, ana tu'u-tapa heni le'do-fai-a, neukose ana to'a-taa.

²⁰ Neukose, Manetualain ba'e-pala, hataholi dale ndoos-sa, tehu, hataholi fo nahiik namasu'i lai-lai-a, neukose ta nala huhukuk-ka deak fa

²¹ Ta malole fa, metema bibinga-baba'e hataholi; tehu, hapu manakee-manafula boe, ana nau tao eno peko-pakik, ka'da soaneu hapu doik faa.

²² Hataholi tene petak-ka, nahiik namasu'i lai-lai; tehu ta name'da nae nuu-taa hata-taak-ka, no lai-laik tunin-na aoinan-na fa.

²³ Hataholi manafe kekena-kaka'ik-ka, mate'en-na, nanafe ha'da-holomata lena neme hataholi manafe kokoa-kikiok-ka.

²⁴ Hataholi fo namanako neme ina-aman mai, ma naedaenga sala-singok ta ndia fa, sama leo nakodaa fe'ek-kala boe.

²⁵ Paluu ka'da aoinak-ka mesak-kana, neninin-na nale'a-napilik; Metema o mamahele neu Manetualain soona, o hapu nanalak lena.

²⁶ See dalen-na namatua neu hahapu mesan-na soona, ta nanuu dudu'a-aafi neulauk fa. See tunga hataholi manatee-tenok-ka, nanolin-na soona, neukose naso'da.

²⁷ See tulu-fali hataholi nuu-taa hata-taak-ka soona, neukose ana ta to'a-taa fa. See ta tulu-fali hataholi nuu-taa hata-taak-ka paluun-na fa soona, neukose, ana hapu soo-supak.

²⁸ Metema, hataholi mangalauk-ka, ana koasa soona, laun-na leu ke'ke; metema hataholi mangalauk-ka mopo-mate soona, hataholi manatao ndoos ma matetuk-ka, ana paleta su'di bebe'ik-ka.