AMSAL 27 - Susula Malalaok Hehelu Palak Ma Hehelu Beuk

¹ Boso kokolak bafa maloa, la'eneu fai balahaan-na, nanahu, neukose o ta bubuluk hata da'di fa.

² Boso koa-kio o aoinam-ma mesak-kana; nemen-na, fo hataholi fe'ek nde koa-kio o, nakalenak hataholi fo, o ta malelak-ka fa.

³ Batu ma solokaek-ka, bei da'uk-ka, metema nakasasamak-kana no, dale he'dik fo, hataholi nggoak-ka taon.

⁴ Nasa-meluk ndia, ta nanuu dale susue lalaik fa, te neni nakalulutuk, tehu see nakatatakak, metema nasasalematak no nape'da dalek-ka?

⁵ Malole lenak kena-ka'i no mangale'dok neme susue-lalaik nananafunik-ka mai.

⁶ Tia-laik-ka, ana fepa nenik susue-lalaik, tehu musu-a, ana holu nenik laso.

⁷ Metema, hataholi-a nakabete, soona ana ta sipo fanioe-a boen; metema namala'a soona, makahe'duk-ka boeo, name'dan mala'da.

⁸ Hataholi fo, ana la'oela uman-na, sama leo manupui fo, ana la'oela ndunun-na.

⁹ Sama leo mina kaboomenik-ka nandaa dale, leondiak boe, tia-laik dale malolen-na, tao napena samanek-ka.

¹⁰ Boso mafandele heni o tia-laim, do o amam tia-lain-nala. Boso moke o tolanoom-ma tutulu-fafalik, nai toto'a-tataak-ka dalek; uma titia-tataik fo manadekak-ka, sosoa-ndandaan lena neme tolanook manai dook-ka mai.

¹¹ Anang-ngonei, ela leo been-na, o da'di hataholi manatee-tenok, fo ela au amahoko, ma metema o nananakamumulu-nakamamaek soona, au bisa ataa.

¹² Hataholi manatee-tenok-ka, nita soe-a soona, nakadedeak; tehu hataholi nggoak-ka, la'ok nakandoo, fo susa-soe tuni-lan.

¹³ See nau lu'a-lepa hataholi fe'ek huta-bu'un soona, nandaa hata-heton nanaho'i-nak, da'di neu bua pepe'dak, soaneu hala hehelun-na.

¹⁴ Fafain-na, see nate'a tia-lain, nenik hala belak soona, bisa tafa'da tae, ana kokolak soo-supak ndia.

¹⁵ Saoinak fo, ana hii ka'da nale'a-napilik-ka, sama leo u'dan-na nakasaa mai, nai lele'do katemak esa dalen-na.

¹⁶ Ta bisa nadenun, fo denge-denge fa, sama leo, ta bisa ka'i-na, anin-na fa, ma ta bisa nafanggete-na, mina fa.

¹⁷ Sama leo bai-a na'a bai-a, leondiak boe, hataholi daebafak-ka, nanoli neme nonoo hataholin-na mai.

¹⁸ See nakaboboi ai soona, neukose na'a boan-na. Neukose malalau-maoono, nanafe ha'da-holomata, metema ana sue-lai tuan-na.

¹⁹ Sama leo o mita o mata-panam nai oe dale, leondiak boe, o dalem-ma natu'du o aoinam-ma.

²⁰ Hapu mamanak tataas esa, nai hataholi manamatek-ka, daebafan-na; leondiak boe, hataholi daebafak-ka, dale hihiin-na ta hapu too-lanen fa.

²¹ Lilopilas-sa no lilofulak-ka, nanafolak nai ha'ikaak dale; hataholi-a, nananalelak neme heo-haan soaneu kokoa-kikiok-ka.

²² Leomae fepa napane'e hataholi nggoak-ka boe, neukose ta mopo nggoan-na fa.

²³ Makaboboi matalolole o bana-manum,

²⁴ nanahu su'i-betes-sa, neukose manasapu-manalalok, nakalenak koasa soaneu paleta boeo, neukose ta nahele losa dodoon-na fa.

²⁵ O ke'di na'u nai tina dale, ma nai letek lain, fo o fe o bana-manum sila-la, tehu basa soona, na'u-a moli seluk.

²⁶ O hapu bua-lo'as neme, o bi'ilopom-mala bulun-na mai, ma o mase'o o bi'ihiim-mala, fo o bisa pake doik-kala seli, soaneu asa dae beuk.

²⁷ Neme o bi'ihii fe'em-mala mai, o bisa hapu su'uoe, soaneu o, ma o teidalem-mala, boema o malalau-maoonom-mala.