AMSAL 26 - Susula Malalaok Hehelu Palak Ma Hehelu Beuk

¹ Sama leo u'dan-na nai fai hanas-sa, ma salju nai fai le'do mahaak-ka, leondiak boe, hataholi ngoak-ka, ta nandaa koa-kio fan.

² Sama leo manupui-a laa-laa nai lalai, leondiak boe, soo-supak ta bisa la'e, hataholi sala taak-ka fa.

³ Muse tao lapa neu keledei-a, ma muse fepa ndala, leondiak boe, muse fepa hataholi nggoak-ka.

⁴ Hataholi fo nataa hataholi panganaa natatanen-na soona, ngoan-na sama no hataholi ndia.

⁵ Natatane nggoak-ka, muse nataan nenik natataa nggoak boe, fo ela manamatanek-ka, name'da nae ndia ta malelak, sama leo dale dodoon-na fa.

⁶ Madenu hataholi nggoak-ka, fo ana haitua halak soona, sama no ana tao nala'di ein-na, ma ana sanga soe.

⁷ Sama leo hataholi lu'uk-ka, la'ok nenik ein-na, leondiak boe, hataholi nggoak-ka, kokolak dede'a nanoli-nafa'dak.

⁸ Koa-kio hataholi nggoak-ka, sama leo pa'a nahele batu-a neu pipiluk-ka.

⁹ Sama leo manamafuk-ka, ana due heni nggauk-ka neme liman dale mai, leondiak boe, hataholi nggoak-ka, kokolak dede'a nanoli-nafa'dak.

¹⁰ See fe hataholi nggoak-ka, do su'di see boe, tao bela-ba'uk soona, neukose nakatutu'dak hataholi makadotok.

¹¹ Sama leo busa fali leo muta-na neu, leondiak boe, hataholi nggoak-ka, la'i esa seluk nggoan-na.

¹² Hataholi fo, nggoan-na seli, malole lena neme hataholi fo, nafa'da nae ndia hataholi malelak.

¹³ Tou pelatua, nau nahele ka'da uma; nafa'da nae, “Singa nai deak, de bisa ana kaa-na au, nai eno tala'dak.”

¹⁴ Sama leo lelesu-a, ana puta nai hensel-la, leondiak, tou pelatua nasafafali ao, nai pepe'un lain.

¹⁵ Hapu hataholi pelatua nanseli; nalosa, ana hao nana'ak leo bafan-na neu boeo, ana pela.

¹⁶ Tou pelatua, nafa'da nae ndia manatee-tenon-na, lena neme hataholi hitu, fo ala fe natataak-ka, la'en

¹⁷ Hataholi fo, ana sese'do-babalik nai nale'a-napilik, fo ndia ito-aton ta ndia fa, sama-na leo hataholi fo, ana ho'u neu busa fuik-ka di'idoon-na.

^18-19 Hataholi fo, ana tipu-dai, boema nafa'da nae, “Ka'da au akasoe ndia,” sama no hataholi kamulus, fo nakaminak no tafa-sisilo maneni soe-a.

²⁰ Metema, basa ai-a soona, mate ha'i-a; metema, touk do ina bafa manasodaik-ka, taak-ka soona, nale'a-napilik-ka hahae.

²¹ Sama leo ha'ikaak-ka no ai-a, tao-la ha'i-a pila nahele; leondiak boe, hataholi fo, ana hii ka'da nale'a-napilik-ka, ana taon-na nale'a-napilik-ka namahana nakandoo.

²² Tao nanggenggeo hataholi na'den ndia, la'dan-na seli, de hataholi-a nau ko'don.

²³ Sama leo uledae nananakadiditak lilofulak, leondiak boe, hataholi fo, hala-kokolan makeek, tehu dalen-na mangalauk.

²⁴ Hataholi manamakamuu-makadauk-ka, hala-kokolan makeek, tehu dalen-na, henuk no tipu-daik.

²⁵ Leomae, hala-kokolan mangana'uanak, tehu boso mamahelen; nanahu nakamuu-nakadauk-ka, koasa dalen-na.

²⁶ Leomae nafuni nakamuu-nakadaun boe, neukose, basa hataholi-la lita tatao-nono'i mangalaun-na.

²⁷ See kali bolok soaneu hataholi fe'ek soona, neukose ana kosik leo dalek neu. See loli batu, fo ela tuni la'e hataholi fe'ek soona, neukose batu ndia, tuni la'e seluk-kana.

²⁸ Masapepeko-masandandalik-ka, sama no nakamuu-nakadauk-ka. Hala-kokolak makee-mamina neni soe.