AMSAL 23 - Susula Malalaok Hehelu Palak Ma Hehelu Beuk

–6–

¹ Metema, o mangatuuk mu'a moo hataholi matua-madema esa soona, mafandendelek see ndia.

² Metema, o hii ka'da mu'a-minu makandondoo henin, soona makatatakak o dale hihiim ndia.

³ Boso no lai-laik, mu'a nana'a mala'da, fo ana sadiak-ka, te fafa'kama, sanga nakahihi'ik o ndia.

–7–

⁴ Boso sota-mate, soaneu da'di hataholi kamasu'ik. Boso pake o dudu'a-aafim ndia.

⁵ Nana o hata-hetom, bisa mopok-kasa, ka'da nai hatematak esa mesak-kana, nono'kabai malidak, de ana laa sama leo manupui kaka'ka laa leo lalai neu.

–8–

⁶ Boso mu'a sama-sama moo, hataholi malitua. Boeo, boso mahiik nana'a mala'dan-na.

⁷ Nana, neukose nafa'da nae, “Mai mu'a; fo tama seluk,” te se'kona, dudu'an-na tee-tee tutu'dan ta leondiak fa. Hala-kokolan makeek, tehu dalen-na fe'ek.

⁸ Mahani te, o ko'do heni beek ndia soona, o muta falik-kana, fo o dede'a-kokola makeem soaneun-na, sosoa-ndandaan ta.

–9–

⁹ Boso manoli-mafa'da hataholi nggoak-ka; te neukose, ana ta taoafik neu o nanoli-nafa'dam ndia fa.

–10–

¹⁰ Boso lali heok dae too pusaka, do kisa-anamaak dae toon-na.

¹¹ Nana, Manetualain nde been-na, manamasala'e mabe'i-balakaik. Ndia nde, neukose nasala'es-sala, fo Ana la'ban o.

–11–

¹² Taoafik neu o mesem-ma nanolin-na, fo manoli makandoo.

–12–

¹³ Boso hia-penge manoli o anam-ma. Metema o fepan nenik ue soona, neukose ta mate fan,

¹⁴ te neukose naso'da.

–13–

¹⁵ Anang-ngonei, metema o da'di hataholi manatee-tenok soona, au amahoko anseli.

¹⁶ Metema, au amanene o kokolak dede'a-kokola masosoa-ndandaak soona, au daleng-nga namatua.

–14–

¹⁷ Boso mape'da dalek neu hataholi masala-masingok-ka. Tunga Manetualain tataas esa,

¹⁸ fo ela o so'dam nai fai manamaik-ka, malole ma ta mopo o namahehenam-ma fa.

–15–

¹⁹ Mamanene, anang-ngonei! Da'di hataholi manatee-tenok leona. Taoafik te'e-te'e, neu o so'dam-ma eno-dalan.

²⁰ Boso leo-mapalasa moo hataholi manamafuk, do hataholi tenepetak,

²¹ nana, neukose ala da'di hataholi nuu-taa hata-taak. Metema, o ka'da sungu-sungu mesan, soona ta dooanak so'on te, neukose o pake bua-lo'a sida-saik.

–16–

²² Tunga o amam paletan-na; nana metema, ndia ta soona, o boeo ta. Metema, o inam namalasi soona, matu'du mae o sue-lain.

²³ Asa-ma, nanoli ndoos-sa, manatee-tenok-ka, nanoli-nafa'dak-ka, ma dudu'a manadaik-ka, soona boso mase'o henis.

²⁴ Amak esa, neukose namahoko-setelee, metema anan-na nanuu dudu'a-aafi malole; ma metema, anan-na da'di hataholi manatee-tenok soona, dalen-na namatua.

²⁵ Sa'di leo been-na, o inam ma o amam, dalen-nala lamatua, soaneu o; sa'di leo been-na, inak manabongi o-a, naua-nanale.

–17–

²⁶ Anang-ngonei, taoafik matalolole, ma tunga au so'dang-nga, eno-dalan.

²⁷ Ina manasosoa-piao langa batuk-ka, nde been-na meobesi maneni soe.

²⁸ Lapanggee hataholi, sama leo nakodaa, de ala tao-la touk makadotok, ala hohonge.

–18–

^29-30 Ade, o bubuluk, hata da'di neu hataholi fo, maninu angol makadotok-ka, ma nasi'a ninu ala-lalu do ta? Hataholi ndia, ana doi-doso. Nale'a-napilik tataas esa, ma ana haladoi. Matade'en-na pilas, ma aon-na bisu-bisu mesan, te se'kona, bisa nadook aon-na, neme basa sila-la mai.

³¹ Leomae angol-la nadoe dale, neuanak nai nggalas dale, ma ko'don soona la'dan-na seli, tehu boso tao o dalem-ma neun.

³² Nana metema, o minun soona, balahaa fafaik te, o mame'dan, sama leo menge malasok-ka, ana kaa o.

³³ O matam-ma keluha'buk, o dudu'a-aafim tasi'bu, ma o bafam-ma dafi kalo-kalo.

³⁴ O mame'dan, sama leo nai ofak dale, fo nai tasi tala'dak; o langam-ma naleo, ma o maleu-lilok.

³⁵ Boema, neukose o mafa'da mae, “Namata hataholi fepa ma fapa au, tehu au ta afandele hata da'di so. Awii, au matang-nga, nduak-ka nanseli! De au paluu inu seluk!”