AMSAL 21 - Susula Malalaok Hehelu Palak Ma Hehelu Beuk

¹ Sama leo Manetualain ito-ato lee oen-na, fo ela ana faa tunga dale hihiin-na, leondiak boe, Ana hela-nole manek-ka dudu'a-aafin

² Hataholi-a esa-esak tatao-nono'in, fafa'kama malole, tunga ndia mesak-kana mata memeten-na, tehu Manetualain nde fola dalen-na tetee-tutu'dan.

³ Tatao-nono'i ndoos ma matetuk-ka, nandaa no Manetualain dalen-na, lena heni tunu-hotuk-ka

⁴ Hataholi mangalauk ndia, nasala-nasingo, hu kande namatutua-namadedema aoinan-na, ma koao-ndaeaon-na.

⁵ Hataholi manggatek-ka, dale tutu'un-na neni hahapu-dadaik; tehu ho'i nakeketuk no lai-laik soona, neninin-na totoa-tataak-ka.

⁶ Su'i-betes fo hapun nenik enok tipu-daik-ka, mopon lai-lai, ma neni mamates fe hataholi.

⁷ Hataholi mangalauk-ka, ta nau hoholo-lalanek fa; ana doi-doso, hu kande tatao-nono'i ha'da hataholi tan-na.

⁸ Hataholi masalak-ka, enon-na dopelele'u; ma hataholi malole-a, naso'da tunga ndoon-na tataas esa.

⁹ Leo nai uma hunuk-ka bu'un-na, malole lena neme leo uma esa no saoinak fo, ana hii ka'da nale'a-napilik.

¹⁰ Hataholi mangalauk-ka, ana hii ka'da tao mangalauk tataas esa; ana ta nanuu dale susue-lalaik, soaneu su'di see-a fa.

¹¹ Huhukuk ba'eneu hataholi manahakinonolik-ka, da'di nanolik ba'eneu hataholi nggoak-ka, ma metema, fe hataholi manatee-tenok-ka nanolik soona, neukose ana hapu malelak.

¹² Manetualain Fo Manatao ndoos ma matetuk nanseli-a, Ana bubuluk hata fo, ana da'di nai hataholi malelesik-ka uman. Neukose, Ana fes kosik leo bolok dale neu, fo mopo-mates.

¹³ See ta nau namanene hataholi manato'a-taak-ka haladoin-na fa soona, metema noke tutulu-fafalik soona, neukose hataholi ta taoafik neu fa.

¹⁴ Soaneu tao natenak heni nasa-meluk-ka, fe bua palsen no denge-dengek.

¹⁵ Metema, ndoos ma matetuk-ka, nananakalala'ok, soona hataholi malole-a namahoko, tehu hataholi mangalauk-ka, bii-namata'u

¹⁶ Hataholi fo so'dan-na, ta tunga enok malole-a fa soona, tao leo bee-o, neukose ana losa, hataholi manamatek-ka daebafan-na.

¹⁷ Hataholi fo, ana hii ka'da namahoko-seteleek-ka soona, neukose ana to'a-taa nahele; ma hataholi fo, ana hii ka'da nggenggela-ngganggali tali-doin soona, neukose ta namasu'i fa.

¹⁸ Metema, Manetualain huku laun-na soona, hataholi malole-a ta, tehu hataholi mangalauk-ka nde hapu susa.

¹⁹ Malole lenak, leo nai moo solokaek-ka, neme leo no saoinak, fo ana hii ka'da nakamuu-muu, ma ana tao nasa-nasak mesan.

²⁰ Hataholi manatee-tenok-ka, tetu-temak ma namasu'i nahele,; tehu hataholi nggoak-ka dodolo-didilo hata-heton

²¹ See sanga enok, fo ela ndoos ma matetuk-ka, nananakalala'ok soona, neukose ana hapu so'da-molek, ha'da-holomata ma teu naluk.

²² Hataholi dodole da'uk-ka, napalani natona-na kota fo, solda'du palani-la lanean; ana tao nandefa heni, lamahena kota musu-la.

²³ Soaneu boso hapu toto'a-tataak-ka, ela leo been-na, manea matalolole hala-kokolak-ka.

²⁴ Hataholi manakoao-ndaeaok, ma namatutua-namadedema aoinan-na, ana hii ka'da nakamuu-nakadau, ma malela ha'da taak.

²⁵ Tou pelatua maisik fo, ana ta nau naue-nale'di fa; ana taonisa aoinan-na, nenik dale hihiin-na.

²⁶ Fai katemak esa dalen-na, ka'da ana dodoo-dudu'a, la'eneu hata fo nahiik-kana. Nasafalin-na, hataholi fo, so'dan-na doos, ana hapu fe no ana sasi kao-kao.

²⁷ Manetualain nape'da dale nasak, hataholi malelesik-ka tunu-hotun fa, nakalenak, metema ana tunu-hotu no muu-dauk.

²⁸ Masapepeko-masandandalik-ka, ana fe sakasii soona, neukose ta lamahele fan, tehu hataholi fo, ana bubuluk dede'ak-ka huu-pedan-na, hala-kokolan nanasipok.

²⁹ Hataholi dale ndoos-sa, namahele aoinan-na; tehu hataholi mangalauk-ka, ta bii-mae nalelak fa.

³⁰ Ta hapu malelak, dodole maneu ma manatee-tenok fo, bisa nakatatakak nai Manetualain matan fa.

³¹ Leomae, sadia ndala musu soaneu natee-natatik-ka boeo, manamaketu sesengik-ka nde been-na, Manetualain dei.