AMSAL 2 - Susula Malalaok Hehelu Palak Ma Hehelu Beuk

Manuu dudu'a-aafi manatee-tenok soona, masosoak

¹ Au anang-ngonei, sipo-ma au nanoling-ngala, ma mafandendelek tataas esa, neu au nanoli-nafa'dang neu o-a.

² Taoafik neu dede'a manatee-tenok-ka, ma sanga enok leona, fo malelak-kana.

³ Hei, au anang-ngonei, sanga enok fo manuu dudu'a-aafi madema, ma moke dudu'a-aafi manadaik.

⁴ Sanga basa sila-la, sama leo sanga lilopilas, ma usi basa sila-la, sama leo usi hata-heto nananafunik.

⁵ No enok ndia, neukose o bubuluk, sosoan-na hata, bii-mamata'u neu Manetualain ma neukose o hapu malelak la'eneu Manetualain.

⁶ Manetualain nde manafe manatee-tenok-ka; hataholi daebafak-ka hapu malelak ma dudu'a-aafi manadaik neme Ndia mai.

⁷ Ana fe tutulu-fafalik ma nasulu-nahapak neu hataholi dale ndoos ma bu'u-ba'e tak.

⁸ Manetualain nanea hataholi manatao tunga ndoon-na, ma nasulu-nahapa sila fo manasue-lain-nana.

⁹ Au anang-ngonei, metema o tunga au soona, neukose o bubuluk hata fo ndoos ma matetuk-ka, tao tunga ka'da ndoon-na, ma hata fo malole. Neukose o boeo bubuluk, o muse maso'da tao leo beek.

¹⁰ Neukose o da'di hataholi manatee-tenok, ma neukose o malelam-ma, nandaa no o dalem-ma.

¹¹ O dudu'a manadaim-ma, ma o dudu'a-aafi matanem-ma, neukose lasulu-lahapa o,

¹² boema dudu'a-aafik sila-la, kena-ka'i o maso'da tunga maso'dak fo ta malole-a eno-dalan fa, ma boeo madook o aoinam-ma, neme hataholi manakokolak dede'a-kokola mangalauk-ka mai.

¹³ Ala ta nau tunga maso'dak malole-a, eno-dalan fa; ala tunga eno makahatuk fo henuk no sala-singok-ka.

¹⁴ Ala hapu namahokok neme sila tatao-nono'i mangalaun-na mai.

¹⁵ Ala ta tao tunga ndoon-na fa, ma ala la'ok sala eno ndoos-sa.

¹⁶ O fo au anangonei, neukose o bisa tipa heni ina mangalauk-kala fufu'di-oo'don, fo ala sanga enok soaneu tao latu'da o dalem-ma, nenik dede'a-kokola makee-maminan.

¹⁷ Inak ndia nafandele heni hala hehelun neu Manetualain-na, de ana ta lilineka neu saotoun-na fa.

¹⁸ Metema o muu leo uman muu soona, sosoan-na nae, o muu leo mamates dale muu ndia. Muu leo ndia muu, sama leo muu leo hataholi manamatek-ka daebafan-na muu.

¹⁹ Hataholi mananeu leo ndia neu-a, ana ta hapu fali ma'in leo enok manaleo maso'dak-ka neu fa.

²⁰ Hu ndia de, au anang-ngonei, tunga hataholi malole-a heheo-hihilun, ma maso'da tunga Manetualain hihii-nanaun.

²¹ Nana, hataholi manatunga Manetualain hihii-nanaun-na, nde hataholi dale ndoos-sa, fo sila nde leo nai nusak fo Manetualain heluk-ka.

²² Tehu hataholi mangalauk, ma masala-masingok-ka, neukose Manetualain tapas leo nusak ndia deak leu, sama leo fe'a heni na'u-a neme dae dale mai.