AMSAL 19 - Susula Malalaok Hehelu Palak Ma Hehelu Beuk

¹ Malole lenak hataholi nuu-taa hata-taak, fo dalen-na ndoos, neme hataholi nggoak, fo ana nau nasapepekok-nasandandali.

² Manggatek-ka ta no malelak-ka fa soona, ta malole fa; hataholi fo, nakalupu lai-lai, neukose ana tao salak.

³ Hataholi daebafak-ka, nggoan-na, nakatutu'dak seluk aoinan-na, basa boema, ana fe salak neu Manetualain, hu kande tataon ndia.

⁴ Hataholi kamasu'i-makabetek-ka, tia-lain boetai lamaba'uk-ka; tehu hataholi nuu-taa hata-taak-ka, tia-lain lalai la'oelan.

⁵ Hataholi fo, nasapepeko-nasandandali nai uma manakee-manafulak-ka, neukose ta nala deak neme huhukuk-ka mai fa.

⁶ Hataholi-a esa-esak, ana sanga enok, ho'i hataholi nananita-nalelak-ka dalen-na; basa hataholi lala'en-na, nau tao tia-laik no hataholi doi ba'uk-ka.

⁷ Hataholi nuu-taa hata-taak-ka, tolanoon-na ta taoafik neu fan, nakalenak tia-lain-nala. Leomae ana sanga enok boe, tehu ana ta bisa hapu fas.

⁸ See usi malelak-ka soona, ana sue-lai aoinan-na; ma see fo nafandele, hata fo nanolik-ka soona, neukose naua-nanale.

⁹ Hataholi fo, nasapepeko-nasandandali nai uma manakee-manafula soona, tao leo bee-o, neukose nanahukuk, ma manatao namopo-namatek.

¹⁰ Hataholi nggoak-ka, ta nandaa so'dan-na sama leo manek-ka fa, ma ta nandaa boen, fo ata paleta manakoasa fa.

¹¹ Hataholi manatee-tenok-ka, bisa nakatatakak-na, nasa-melun, ma nanakoa-nanakiok, nanahu ana fe ampon neu hataholi manatao salak soaneun.

¹² Manek-ka nasa-melun sama leo; dinis fo nakadoe na'u-aiana.

¹³ Ni'iana nggoak-ka, bisa ana tao soe fe aman. Saoinak fo, ana sanga ka'da nahuu-namasalak-ka, sama leo oe-a, fo ana ti'ti nakandondoo henin.

¹⁴ Bisa hapu uma, ma hata-heto neme ina-amak mai, tehu saoinak fo, manatee-tenok-ka nde been-na, baba'e-babatik neme Manetualain mai.

¹⁵ Pelatua mangananalok-ka, ana taon-na hataholi-a sungu-sungu mesan, de mate'en-na, tou pelatua, neukose namala'a-namandoe.

¹⁶ Hataholi manatunga Manetualain paletan-na, neukose naso'da, tehu hataholi fo, ana ta taoafik neu fan-na, neukose maten.

¹⁷ Tulu-fali hataholi nuu-taa hata-taak-ka, sama leo fe Manetualain doi totonak; mahani te, Manetualain boeo, neukose Ana balas-sana.

¹⁸ Manoli matalolole o anam-mala, bei dai hapu namahehenak; metema ta soona, sosoan-na nae, o mahiik o anam-ma mamaten-na.

¹⁹ Nemen-na, fo hataholi namanasa lai-lai-a, name'da aon neninin-na Metema o tulu-falin soona, ka'da o tao makananasak-kana.

²⁰ Metema, o nau manoli ma mamanene nanoli-nafa'dak soona, neu fai makabuin te, o da'di hataholi manatee-tenok.

²¹ Hataholi daebafak-ka, nanuu dale tutu'uk makadotok, tehu ka'da Manetualain nde naketu, fo ana da'di.

²² Ha'da-paliik fo, nananamahenak neme hataholi esa mai-a, nde lilinekan-na. Malole lenak nuu-taa hata-taak, neme da'di hataholi masapepeko-masandandalik.

²³ Fe ha'da-holomata neu Manetualain, soona o so'dam-ma naua-nanale; ma neukose, o mame'da dai-ma lena, ma o matapo'i meme soe-a mai.

²⁴ Hapu hataholi nggelok, pelatua maisik nanseli; ana sulu nana'ak leo bafan dale neu boeo, ana pela.

²⁵ Metema, hataholi manakoao-ndaeaok-ka, nanahukuk soona, hataholi dudu'a-aafi taak-ka hapu nanolik. Metema, hataholi dale malole-a, hapu kena-ka'ik soona, ana boetai da'di hataholi manatee-tenok.

²⁶ Ni'iana fo, ana fepa-li'u, ma ana usi heni ina-aman, nde been-na, ni'iana fo, ana tao nakamamaek aoinan-na.

²⁷ Anang-ngonei, metema o ta nau manoli seluk fa soona, neukose o mafandele heni nanolik fo, o manoli basak-kala so.

²⁸ Fe sakasii pepekok soona, sosoan-na nae, heheta-aa'i hoholo-lalanek; hataholi mangalauk-ka, ana tao susa-soe hataholi soona, la'dan-na seli.

²⁹ Hataholi ngoak fo, namatutua-namadedema aoinan-na, tao leo bee-o, neukose ana hapu fefepa-lili'uk.