AMSAL 18 - Susula Malalaok Hehelu Palak Ma Hehelu Beuk

¹ Hataholi fo, ana ta nau nakabubua no hataholi fe'ek fa, sosoa-ndandaan nae, hataholi ndia taoafik neu ka'da aoinan-na mesak-kana; ana se'i hataholi fe'ek hahapun-na.

² Hataholi nggoak-ka, ana ta nau fen dudu'a manadaik fa; ana hii ka'da kalua hata fo, ana pe'dan nai dalen dale.

³ Sala-singok ma nakamumulu-nakamamaek-ka, ala la'ok sama-sama; metema nananakamumulu-nakamamaek basak so, soona tao leo bee-o, nananakadadaek.

⁴ Hataholi-a hahapun-na, nalupa manatee-tenok-ka matan-na demak-ka, sama leo tasi maloaina, ma makasufuk sama leo oe manafaak-ka.

⁵ Tok hataholi malelesik-ka ma tuni-ndeni hataholi sala taak-ka soona, ta malole fa.

⁶ Metema, hataholi dudu'a-aafi taak-ka kokolak soona, neni nale'a-napilik, ma noke fefepa-popokok.

⁷ Hataholi dudu'a-aafi taak-ka, kokolan-na tao nalutu aoinan-na, dede'a-kokolan, nakahihi'ik-na seluk-kana.

⁸ Kokolak nanggenggeo hataholi na'den ndia, la'dan-na seli; de hataholi-a nau ko'don.

⁹ Hataholi fo, ta nakalala'ok bela-ba'un fa, mangalaun-na, sama no hataholi fo, ana ta nau tao malole fa.

¹⁰ Manetualain ndia, sama leo uma puni madema mateaina; hataholi dale ndoos-sa, neu leo naa neu, de ana hapu mamanak fo, nee-nee lino-linok.

¹¹ Tehu hataholi kamasu'i-makabetek-ka, naedaenga hata-heton nde lasulu-lahapan-nana sama leo papala nanadamak madema, ma mateaina, okofefeon-na kota.

¹² Hataholi manakoao-ndaeaok-ka, neukose ana tu'da, hataholi dale taidaek-ka, neukose nanafe ha'da-holomata.

¹³ Mataa makahuluk, neme mamanene nde been-na tatao-nono'i nggoak, ma nakamumulu-nakamamaek.

¹⁴ Hu kande, dale hihiik soaneu naso'da, hataholi-a bisa doi-doso; mopo dale hihiik ndia soona, mopo basa namahehenak lala'en-na boe.

¹⁵ Hataholi dale malole-a maa ma'da malelak-ka tataas esa; hataholi manatee-tenok-ka, ana hii hapu nanolik tataas esa.

¹⁶ Bua palsen-na, soi enok fo noo hataholi leo hataholi matua-la neu.

¹⁷ Hataholi manakokolak makasososa nai manakee-manafula matan-na, ndoos tataas esa, tehu, metema musu noon-na mai soona, palisak matalolole seluk hala-kokolan.

¹⁸ Nale'a-napilik-ka bisa nate'e, nenik tu'u batu, leomae hataholi manakoasa-la lale'a-lapilik boeo, bisa nanaketuk.

¹⁹ Tolanook fo, dalen-na nanatao nakahehe'dik-ka, tean-na seli, soaneu deka non neme kota mateaina mai; nale'a-napilik-ka, sama leo ai betubalak, neme lelesuina manai kota, fo makota musuk-ka mai.

²⁰ Ba'eneu dede'a-kokolak, fo nanakokolak-ka, neu mate'en-na te, muse ana lu'a-lepa-nan.

²¹ Maak-ka nanuu koasa soaneu soi-tefa-na so'dak-ka, do tao nalutun; hataholi-a muse lu'a-lepa-na, hala-kokolan neninin-na.

²² Hataholi manahapu saoinak-ka, ana hapu nanalak; saoinak-ka nde been-na, baba'e-babatik neme Manetualain mai.

²³ Hataholi nuu-taa hata-taak-ka, ana dokodoe no ha'da-holomata; tehu hataholi kamasu'i-makabetek-ka, nataa no nasapalak.

²⁴ Hapu tia-laik fo, ana ta lilineka fa, tehu hapu nggelok malole-na seli, neme tolanook esa mai.