AMSAL 17 - Susula Malalaok Hehelu Palak Ma Hehelu Beuk

¹ Malole lenak ta'a kakau pingak esa, tehu ta'an no dale manatesa-tamak, neme nana'a mala'dahiik-ka sasi kao-kao boe, tehu ta'an no dale manatesa-tamak taak.

² Ata dodole da'uk-ka, neukose ana koasa ni'iana maneni bibii-mamaek-ka; ma neukose, ana sipo baba'ek sama-sama no ni'iana ndia, tolanoon-nala.

³ Lilopilas ma lilofulak-ka, nanafolak nai ha'ikaak dale, tehu Manetualain fola hataholi-a dalen-na.

⁴ Hataholi mangalauk-ka, tunga mangalauk-ka nanoli-nafa'dan, ma masapepeko-masandandalik-ka, hii namanene dede'a-kokolak fo, tao nanggenggeo hataholi na'den-na.

⁵ See hakinonoli hataholi nuu-taa hata-taak-ka soona, nakamumulu-nakamamaek Manetualain, fo manamakadada'dik-kana. See namahoko-setelee soaneu hataholi ua-nale poke-pake-a soona, tao leo bee-o, ana hapu huhukuk.

⁶ Hataholi fo namalasi so, dale namatutuan-na nde been-na, nde upu-anan; ma ni'iana-la, dale namatutuan-na nde ina-aman.

⁷ Hataholi nanafe ha'da-holomata, ta nandaa kokolak dede'a-kokolak pepekok fa; ma hataholi nggoak-ka, ta nandaa kokolak dede'a-kokola neulauk fa.

⁸ Hapu nggelok laedaenga, doi sosolo dalek-ka, hapu tao manada'di beuk; nana no doi sosolo dalek-ka, de basa hata lala'en-na bisa da'di.

⁹ Metema o hii hataholi sue-lai o soona, fe do'o do ampon neu salak, fo ala tao-no'in, nafofo'a salak-ka, ka'da tao naketu tia-lai malole-a.

¹⁰ Kena-ka'ik esa, sosoa-ndandaan lena, ba'eneu hataholi dale malole-a lena heni filuk hataholi dudu'a-aafi taak-ka la'i natun esa.

¹¹ Hataholi mangalauk-ka, nakadada'dik tasi'bu tataas esa, tehu mamates-sa mai neun, da'di leo hataholi nadedenuk fo, dale kasian ta.

¹² Malole lenak natongon-no meoasu ina manamopo anak-ka, neme natongon-no hataholi fo, puselaipana no nggoan-panganaan-na.

¹³ See balas malole-a nenik mangalauk soona, mangalauk-ka boeo, ta hapu nanakaluak neme uman dale mai fa.

¹⁴ Mulai nale'a-napilik-ka nde been-na, sama leo soi heni oe enon-na; hu ndia de, nale'a-napilik-ka beita mulai fa te, heok leona.

¹⁵ Manetualain ta hii hataholi fo nasala'e, hataholi malelesik-ka, ma ana fe salak neu hataholi sala taak-ka.

¹⁶ Palsuma la'iesak-kana, hataholi dudu'a-aafi taak-ka nabasa tali-doin soaneu sanga manatee-tenok-ka, nana dudu'a-aafin ta neulauk fa.

¹⁷ Tia-laik esa, lilineka tataas esa neu nonoon-na, ma ana da'di tolanook esa, nai toto'a-tataan-na dalek.

¹⁸ Hataholi fo naheluk, soaneu ana bae nonoo hataholin-na huta-bu'un nde been-na hataholi nggoak ndia.

¹⁹ Hataholi fo nahiik sala-singok-ka, ana hii nale'a-napilik. Hataholi bafa maloa, ana sanga nakalulutuk-ka.

²⁰ Hataholi manatipu-daik esa, neukose ta naua-nanale fa, hataholi maa kaba'ek-ka, neukose ana hapu soe.

²¹ See hapu ni'iana fo nggoa-panganaak soona, sosoan-na nae, ana hapu dale he'dik; da'di amak neu ni'iana nggoa-panganaak-ka soona, ana ta fe namahoko-seteleek fa.

²² Dalek fo henuk no namahoko-seteleek-ka, taon-na aopaak-ka so'da-la'dak; tehu dale manasusak-ka, tao namopo manggatek-ka.

²³ Manakee-manafula fo ta tao tunga ndoon-na fa, ana sipo doi sosolo dalek no nafufunik ma ta nakalala'ok ndoos ma matetuk-ka fa.

²⁴ Hataholi dudu'a manadaik-ka, dale tetee-tutu'dan nde, soaneu hapu manatee-tenok-ka, tehu hataholi dudu'a-aafi taak-ka, dale tetee-tutu'dan huu-pe'dan ta.

²⁵ Ni'iana nggoak-ka, tao susa aman; ma nakahehe'dik inan dalen-na.

²⁶ Ta nandaa, kee fe hataholi sala taak-ka nahuta; ta nandaa, tuni-ndeni hataholi dale malole-a fa.

²⁷ Hataholi dudu'a-aafi matane-a, ta bafa maloa fa. Hataholi manatee-tenok-ka, nee-nee lino-linok tataas esa.

²⁸ Hataholi dudu'a-aafi taak-ka boeo, neukose laedaenga dudu'a-aafi matane, ma manatee-tenok metema ana denge-denge ma nakatema bafan-na.