AMSAL 15 - Susula Malalaok Hehelu Palak Ma Hehelu Beuk

¹ No natataa mangana'uk-ka, nasa-meluk tenak; tehu no natataa makei-maketek-ka, nafofo'a nasa-meluk-ka.

² Hataholi manatee-tenok-ka maan-na, kalua malelak; tehu hataholi dudu'a-aafi taak-ka, bafan-na kalua dede'a-kokola nggoak.

³ Manetualain nita basa hata manada'dik manai mamanak lala'en-na; Ana taoafik neu basa hata fo malole, ma hata fo mangalauk.

⁴ Dede'a-kokolak malole-a, ana popo-tama manggatek; tehu dede'a-kokolak fo nakahehe'dik dalek-ka, ana tao tapandoe dale hihii-nanauk-ka.

⁵ Hataholi nggoak-ka, nakadadaek aman nanoli-nafa'dan; tehu hataholi manatee-tenok-ka, taoafik neu kekena-kaka'ik.

⁶ Nai hataholi malole-a uman, hapu hata-heto makadotok; tehu hataholi mangalauk-ka hata-heton mopok-kana, nanahu susa-soe.

⁷ Hataholi manatee-tenok-ka dede'a-kokolan, henuk no malelak, tehu hataholi nggoak-ka dudu'a-aafin, ta leondiak fa.

⁸ Manetualain sipok hataholi malole-a huhule-haladoin; tehu Ana ta hii hataholi mangalauk-ka tunu-hotun fa.

⁹ Manetualain ta hii hataholi malelesik-ka so'dan-na eno-dalan fa, tehu Ana sue-lai hataholi manasanga enok, fo tao-no'i hihii-nanaun-na.

¹⁰ Hataholi manatao tatao-nono'i mangalauk-ka, neukose nanatao doidosok; ma hataholi fo ana ta nau ka'i fan-na, neukose maten.

¹¹ Manetualain bubuluk hataholi manamatek-ka daebafan-na no eno-ma'an; hapu nai bee, hataholi daebafak-ka dudu'a-aafin nananafunik eme Manetualain mai?

¹² Hataholi fo ana hii ka'da nakamumulu-nakamamaek, ana ta hii ka'i fan; dalen-na belak, noke nanoli-nafa'dak neme hataholi manatee-tenok-ka mai.

¹³ Dalek fo namahoko-setelee, ana tao napena mata-panak; tehu dalek fo manasusak-ka, ana tao namopo manggatek-ka.

¹⁴ Hataholi manatee-tenok-ka, ana sanga malelak; tehu hataholi nggoak-ka, puselaipana no tatao-nono'i nggoa-panganaan-na.

¹⁵ Hataholi manasusak-ka, muse ana sanga enok nai so'dan-na dalek, tehu hataholi fo mata-panan napena, naua-nanale tataas esa.

¹⁶ Malole lenak hata-heto lumanak, tehu hata-heto lumanak ndia, sama-sama no bibii-namata'u neu Manetualain, neme hata-heto makadotok, tehu hata-heto makadotok ndia, sama-sama no bibii-namata'uk.

¹⁷ Malole lenak na'a aidoo, tehu na'an sama-sama no susue-lalaik, neme na'a paa mala'da, tehu na'an sama-sama no nakamuu-nakadauk.

¹⁸ Hataholi fo namanasa lai-lai-a, nakadada'dik nale'a-napilik, tehu hataholi fo, ta haelai namanasa fa, neni mole-dame.

¹⁹ Hataholi pelatua-mangananalok-ka, neukose la'ola'di toto'a-sosotak tataas esa; tehu hataholi manatao tunga ndoon-na, ta hapu toto'a-sosotak fa.

²⁰ Ni'iana manatee-tenok-ka, nandaa no aman dalen-na; tehu ni'iana nggoak-ka, ta fe ha'da-holomata neu inan fa.

²¹ Nggoa-panganaak-ka nde been-na, hataholi nggoak-ka dale hihiin, tehu hataholi manatee-tenok-ka, so'dan-na ndoos.

²² Dale tutu'uk-ka ta da'di fa, metema ta sama-sama no dodoo-tataik fa; tehu dale tutu'uk-ka neni buna-boak, metema hataholi manafe nanoli-nafa'dak makadotok.

²³ Dede'a-kokolak fo kokolak-kana la'e fain-na, neni namahoko-seteleek.

²⁴ Hataholi manatee-tenok-ka, ana tunga eno ndanda'ek manaleo maso'dak-ka neu; te ta leo eno kokonak manaleo mamates-sa neu fa.

²⁵ Neukose Manetualain tao natu'u, hataholi manakoao-ndaeaok-ka uman-na, tehu Ana nasulu-nahapa inafalu esa dae pusakan-na.

²⁶ Manetualain ta hii dale tutu'u mangalauk-ka fa, tehu dede'a-kokolak malole-a, nandaa no dalen-na.

²⁷ See sanga nanalak fo ta malole fa soona, ana tao nakalulutuk teidale-bobongin-na. See ta hii sipo doi sosolo dalek fa soona, neukose so'dan-na naua-nanale.

²⁸ Hataholi malole-a, ana tai-dodoo dede'a-kokolan; tehu hataholi mangalauk-ka, kokolak dede'a manggenggeok.

²⁹ Metema hataholi malole-a hule-haladoi soona, Manetualain namanene, tehu Ana ta taoafik neu hataholi malelesik-ka fa.

³⁰ Mata-pana mapenak-ka, tao namahoko dalek-ka, hala malole-a, tao makasufu samanek-ka.

³¹ Hataholi manataoafik neu kekena-kaka'ik-ka, nanalekek da'di leo hataholi manatee-tenok.

³² Hataholi fo, ana ta nau nanoli-nafa'da fan-na, ta fe ha'da-holomata neu aoinan-na fa; tehu hataholi fo, ana sipo kekena-kaka'ik-ka, ana da'di hataholi dale malole.

³³ Bibii-namata'uk neu Manetualain nde been-na, netes ba'eneu nanoli malole-a; ma dale taidaek-ka, nakahuluk neme ha'da-holomata mai.