AMSAL 14 - Susula Malalaok Hehelu Palak Ma Hehelu Beuk

¹ Ina manatee-tenok-ka, nafofo'a uma-loon, tehu nggoan-na, tao natu'un.

² Hataholi manatao tunga ndoon-na, bii-namata'u ma fe ha'da-holomata neu Amak Manetualain; tehu hataholi fo, so'dan-na ta ndoos fa, nakamumulu-nakamamaek-kana.

³ Hu kande hataholi nggoak-ka manakoao-ndaeaon-na, de ana hii namatutua-namadedema aoinan-na; tehu hataholi manatee-tenok-ka, neukose dede'a-kokolan nasulu-nahapan.

⁴ Sapi ta soona, ta hapu buna-boak nai tina fa; tehu no sapi be'i-balakain, de buna-boak sasi kao-kao.

⁵ Sakasii fo manatao tunga ndoon-na, kokolak dede'a tete'ek tataas esa, tehu sakasii fo ta hapu namahele fan-na, nasapepeko-nasandandali tataas esa.

⁶ Hataholi manakoao-ndaeaok-ka, neukose ta da'di manatee-tenok fa, tehu hataholi dodole da'uk-ka, mu'dak la'iesak-kana, ana hapu malelak.

⁷ Boso tao tia-laik moo hataholi nggoak-ka; nana ana ta hapu nanoli o hata esa boen.

⁸ Hataholi manatee-tenok-ka ana bubuluk, tao leo beek fo, muse ana ho'i nakeketuk, tehu hataholi nggoak-ka, nggoan-na ke'di-ndiu-na seluk-kana.

⁹ Hataholi nggoak-ka ta nafaduli, ade sala-singon hapu do'o do ampon do ta; tehu hataholi malole-a, ana hii sala-singon hapu do'o do ampon.

¹⁰ Namahokok ma dale he'dik-ka, nanape'dak nai dalek-ka dalek; de hataholi fe'ek, ta hapu name'da nita fan.

¹¹ Hataholi malole-a uman-na, natea nahele; tehu hataholi mangalauk-ka uman-na, neukose ana tu'u neu.

¹² Hapu enok fo meten soona, ta ndoos fa, tehu mate'en-na, enok ndia leo mamates-sa neu.

¹³ Nai hihikak-ka dean-na, fafa'kama hapu kikiik; ma namahoko-setelek-ka, hapu nate'e nenik luumata-pinuiduk.

¹⁴ Hataholi mangalauk-ka, neukose ketu-seu tatao-nono'i mangalaun-na buna-boan; tehu hataholi malole-a, neukose ana ketu-seu tatao-nono'i malolen-na, buna-boan.

¹⁵ Hataholi nggoak-ka, namahele neu basa dede'a-kokolak lala'en-na, tehu hataholi manatee-tenok-ka, ho'i nakeketuk besa-besa.

¹⁶ Hataholi dale malole-a, nanea tataas esa, ma nadook aoinan-na neme tatao-nono'i mangalauk-ka mai, tehu hataholi nggoak-ka kalua nasa-melun, fo besak-ka dalen-na tesa-tama.

¹⁷ Hataholi fo ana hii namanasa, ana ho'i nakeketu nggoak; tehu hataholi manatee-tenok-ka, ana ta haelai namanasa fa.

¹⁸ Hataholi fo malelan-na ta dai fa, neukose ana da'di nggoak; tehu hataholi manatee-tenok-ka, neukose malelan-na boetai namaba'uk-ka.

¹⁹ Hataholi mangalauk-ka, neukose nakatele neu hataholi fo dalen-na ndoos, fo ana dokodoe, fo ela sue-lain.

²⁰ Hataholi-a nape'da dale nasak hataholi nuu-taa hata-taak-ka, lena-lenak tia-lain-nala; tehu hataholi kamasu'i-makabetek-ka, tia-lain makadotok.

²¹ See nakamumulu-nakamamaek hataholi soona, ana tao sala-singok; tehu see dalen-na malole no hataholi nuu-taa hata-taak-ka soona, neukose naua-nanale.

²² See sanga enok, fo ana hapu malole-a soona, neukose nananamahelek, ma ana hapu ha'da-holomata; tehu see tutu'u eno mangalauk soona, nai eno matofa-matalak lain.

²³ Nai ue-le'dis lalaena dalek, hapu nanalak; tehu kokolak fo isin ta, taon-na hataholi-a, tu'da leo nuu-taa hata-taak-ka dalek neu.

²⁴ Hataholi manatee-tenok-ka nanakoa-kiok, nanahu manatee-tenon-na, tehu hataholi nggoak-ka nananita-nalelak, nanahu nggoan-na.

²⁵ Metema sakasii esa nafa'da ndoos soona, ana soi-tefa-na hataholi samanen; tehu metema nasapepeko-nasandandali soona, ana ke'di-ndiu nonoo hataholin-na.

²⁶ Hataholi fo namahele neu Manetualain-na, ana hapu tetu-temak, ma teidalen-nala, neukose ala hapu nasulu-nahapak.

²⁷ Namahele neu Manetualain nde been-na, ua-nalek-ka huun-na; ma enok soaneu tala mamates-sa deak.

²⁸ Manek-ka ua-nalen malolen-na, hapun nai laun-nala dede'un-na; laun ta soona, ana ta hapu koasa fa.

²⁹ Hataholi manatee-tenok-ka, ta namanasa lai-laik fa; tehu hataholi nggoak-ka, ta hapu nakatataka-na, aoinan-na fa.

³⁰ Dalek fo manatesa-tamak-ka, taon-na aopaak-ka so'da-la'dak; tehu nape'da dalek-ka, nono'kabai he'di-laus, fo neni mamates.

³¹ See tao malole neu hataholi nuu-taa hata-taak-ka soona, ana fe ha'da-holomata neu ndia Manetualain-na; tehu see tuni-ndeni hataholi tapandoes-sa soona, nakamumulu-nakamamaek Manamakadada'dik-kana.

³² Hataholi mangalauk-ka mopo-mate, nanahu tatao-nono'i mangalauk-ka, tehu hataholi malole-a, dale ndoon-na nasulu-nahapan.

³³ Manatee-tenok-ka nai hataholi dale malole-a dudu'a-aafin dale tataas esa; tehu nakanete-na hataholi nggoak-ka dudu'a-aafin.

³⁴ Ndoos ma matetuk ma tatao-nono'i malole-a, so'u laik leoina-ka na'den-na, tehu sala-singok taon-na leoina-ka, da'di nakamumulu-nakamamaek.

³⁵ Manek-ka dalen-na loak neu hataholi mana'a ngga'di malelak-ka; tehu namanasa hataholi mana'a ngga'di fo, ta hapu nakalala'ok bela-ba'uk fa.