AMSAL 13 - Susula Malalaok Hehelu Palak Ma Hehelu Beuk

¹ Ni'iana malelak ma manatee-tenok-ka, metema aman fe nanoli-nafa'dak soona, ana taoafik neun; tehu hataholi manakoao-ndaeaok-ka, ta nau ka'i fan.

² Hataholi malole-a hala-kokolan, neni nanalak; hataholi fo, ana ta tao tunga ndoon-na fa, ana hii naseti-nalakak-ka.

³ Hataholi fo nanea hala-kokolan-na, neukose so'dan-na nee-nee lino-linok; hataholi manakokolak tofa-tafi-a, neukose susa-soe tunin-nan.

⁴ Tou pelatua, dale hihiin ba'uk-ka, tehu ana ta hapu esa boen; tehu hataholi fo naue-nale'di puselaipana, ana hapu basa hata lala'en fo nahiik-kana.

⁵ Hataholi manatao tunga ndoon-na, ana ta hii masapepeko-masandandalik-ka fa, hataholi mangalauk-ka, heheo-hihilun neni mamaek ma tao nanggenggeo aoinan-na.

⁶ Ndoos-sa nasulu-nahapa hataholi fo so'dan-na ndoos; tatao-nono'i mangalauk-ka, tao nakalulutuk hataholi masala-masingok-ka.

⁷ Hapu nggelok, ala tao nono'kabai ndia hataholi kamasu'ik, te se'kona, hata-heton ta; tehu hapu nggelok, ala tao nono'kabai ndia hataholi nuu-taa hata-taak, te se'kona, lamasu'i hatu-hatu.

⁸ Hataholi kamasu'ik-ka, muse ana kalua doik makadotok, fo ela so'dan-na nee-nee lino-linok; tehu hataholi nuu-taa hata-taak-ka, ta hapu nasanene'dak mahelek fa.

⁹ Hataholi manatao dede'a malole-a, nono'kabai mandela-masa'ak-ka; tehu hataholi mangalauk-ka, nono'kabai banu manamatek-ka.

¹⁰ Namatutua-namadedema aok-ka, ka'da neni nale'a-napilik-ka; tehu hataholi manatee-tenok-ka, ana nau sipo nanolik.

¹¹ Su'i-betes fo hapun no mudak, neukose mopon no lai-laik; tehu hata-heto fo, nananakaduduluk faa-faa, neukose boetai namaba'uk-ka.

¹² Metema namahehenak-ka, ta tao natetu fan soona, aopaak-ka male-tale; tehu metema hihii-nanauk-ka nanatao natetuk soona, dalek-ka naua-nanale.

¹³ Hataholi fo nakadadaek Manetualain nanolin-na, ana tao soe aoinan-na; tehu hataholi fo, ana tunga Manetualain hoholo-lalanen-na, neukose ana hapu ngga'din-na.

¹⁴ Hataholi manatee-tenok-ka nanolin-na, nono'kabai oemata ua-nalek; metema hapu nasanene'da mahelek soona, nanolik ndia nde soi-tefa.

¹⁵ Hataholi dale malole-a, neukose nanakoa-nanakiok; tehu hataholi fo ta hapu namahele fan-na, neukose so'dan-na susa.

¹⁶ Hataholi manatee-tenok-ka, dudu'a-dodoo nakahuluk, fo besak-ka ana ho'i nakeketuk; tehu hataholi nggoak-ka, nase'o nggoan-na.

¹⁷ Hataholi dinitiu-a hataholi nadedenun-na, no hataholi-a leo soe dale neu tehu hataholi nadedenuk fo nananamahelek-ka, neni buna-boak.

¹⁸ Hataholi fo, ana ta nau nanoli fan-na, ana da'di nuu-taa hata-taak ma nananakadadaek; tehu hataholi fo, ana taoafik neu nanoli-nafa'dak-ka, neukose nanafe ha'da-holomata.

¹⁹ Malolen-na seli, metema hapu hata fo nahiik-kana! Hataholi nggoak-ka, ta nau tu'u-tapa heni tatao-nono'i mangalauk-ka fa.

²⁰ Hataholi fo, ana leo-napalasa no hataholi manatee-tenok-ka, neukose ana da'di manatee-tenok; tehu hataholi fo, ana leo-napalasa no hataholi nggoak-ka, neukose ana hapu soe.

²¹ Ua-nale poke-pake-a, usi-bulu tataas esa no hataholi masala-masingok-ka tehu hataholi malole-a, ana sipo ua-nale malole tataas esa.

²² Hataholi malole-a, ana ba'e hata-heton neu upu-anan; tehu hataholi masala-masingok-ka su'i-beten nanape'dak, soaneu hataholi fo, so'dan-na ndoos.

²³ Dae louk-ka hapu nabuna-naboa nana'ak makadotok soaneu hataholi nuu-taa hata-taak-ka; tehu dae ndia nanafoi-fala tak, nanahu ta hapu ndoos ma matetuk fa.

²⁴ Ta fepa-li'u ni'iana fa soona, sosoa-ndandaan nae, ta sue-lai fan; metema sue-lain soona, muse mapalani fepa-li'un.

²⁵ Hataholi malole-a, hahapu-dadain dai-ma lena tataas esa, tehu hataholi mangalauk-ka, to'a-taa tataas esa.