AMSAL 11 - Susula Malalaok Hehelu Palak Ma Hehelu Beuk

¹ Manetualain nahiik hataholi fo, ana pake tatais ta matetuk fa tehu nahiik hataholi fo, ana pake tatais matetuk.

² Hataholi manakoao-ndaeaok-ka, neukose nana nakamumulu-nakamamaek; hataholi dale taidaek-ka nde been-na, manatee-tenok.

³ Hataholi malole-a, dale ndoon-na hela-nolen; hataholi fo ana hii nasapepeko-nasandandali-a, masapepeko-masandandalin tao nakalulutuk-kana.

⁴ Metema nasasale matak no mamates-sa soona, hata-heton sosoa-ndandaan ta; o so'dam-ma neukose nanasoi-tefak, metema o dalem-ma ta peko-pakik fa.

⁵ Ndoos ma matetuk-ka, tao natetetu hataholi malole-a, so'dan-na eno-dalan, tehu hataholi mangalauk-ka, neni aoinan-na leo nakalulutuk-ka neu.

⁶ Hataholi manatao tunga ndoon-na, naso'da, nanahu dale ndoo-na; hataholi fo ta hapu nananamahelek fa, ana kosik nanahu tenepetan-na

⁷ Metema hataholi mangalauk-ka maten soona, namahehenan-na boeo maten; mamahena neu be'i-balakai mesam-ma soona, sosoa-ndandaan ta.

⁸ Hataholi ndoos-sa, nala toto'a-tataak-ka deak; hataholi mangalauk-ka hapu batu nakatutunuk.

⁹ Hataholi mangalauk-ka hala-kokolan neni momopo-mamatek; hataholi malole-a, manatee-tenon-na soi-tefa nalan.

¹⁰ Metema hataholi manatao tunga ndoo-na, hapu baba'e-papalak soona, kota namahoko-setele; metema mate hataholi mangalauk-ka soona, laun-na eeki-natadale.

¹¹ Hataholi manatao tunga ndoon-na, huhule-haladoin tao nalole kota; hataholi mangalauk-ka hala-kokolan, tao nalutun.

¹² Makamumulu-makamamaek hataholi fe'ek nde been-na, tatao-nono'i nggoak; hataholi dudu'a-aafi malole-a, neukose ana kokolak hata esa boen.

¹³ Manatui dede'a anin-na, neukose ta nape'da dede'a nanabibila-babaak fa, tehu hataholi fo hapu nananamahelek-ka, bisa nape'da dede'a nanabibila-babaak.

¹⁴ Metema leoina mauli-malangan ta soona, neukose nakalulutuk; tehu metema manamanoli-mafa'da makadotok soona, hapu so'da-molek.

¹⁵ Maheluk fo bae hataholi fe'ek hutan-na soona, sosoan-na neni soe; malole lenak boso muu sese'do-babalik nai dede'ak ndia dalek, fo ela nee-nee lino-linok.

¹⁶ Inak dale malole-a, hapu ha'da-holomata; hataholi nasa-melu mangalauk-ka, nakaduduluk su'i-betes.

¹⁷ Hataholi dale malole-a, neni nanalak fe aoinan-na, hataholi nasa-melu mangalauk-a, nakatutu'dak aoinan-na.

¹⁸ Hataholi mangalauk-ka nanalan-na nde been-na, nanala manataik, hataholi manatao malole-a, nanalan-na nde been-na, nanala matetuk.

¹⁹ See manggate tao malole soona, neukose naua-nanale; see dalen-na natea soaneu tao mangalauk soona, neu leo mamates-sa neu.

²⁰ Manetualain ta hii hataholi dale mangalauk-ka fa, tehu Ana sue-lai hataholi fo so'dan-na bu'u-ba'en ta.

²¹ Hataholi mangalauk-ka, tao leo bee-o, ana hapu huhukuk; tehu hataholi malole-a, neukose naso'da.

²² Inak fo dalen-na ta malole fa, mata makeen-na sama leo ndeli lilopilas-sa, nai bafi panan-na.

²³ Hataholi malole-a dale hihiin-na, nabuna-naboa malole tataas esa, tehu hataholi mangalauk-ka namahenak-ka nde ka'da nasa-meluk-ka.

²⁴ Hapu hataholi ana hii fe, tehu boetai namasu'i, hapu hataholi ana hii kila-nakadidia, tehu ana boetai da'di nuu-taa hata-taak.

²⁵ Hataholi fo ana hii fe ba'uk-ka, neukose anahapu dai-ma lena, hataholi fo ana hii tulu-fali, neukose ana hapu tutulu-fafalik boe.

²⁶ See nakaduduluk gandum soona, neukose hataholi supa-soon, tehu hataholi manamase'o gandum-ma, ana hapu kokoa-kikiok.

²⁷ See manggate tao malole soona, neukose hataholi sue-lain; see sanga mangalauk-ka soona, neukose toto'a-sosotak tunin-nalan.

²⁸ See nasalai dean-na neu hata-heto soona, neukose ana tu'da sama leo akidoo tuuk-ka; tehu hataholi manatao malole-a, neukose nakapela sama leo ai nupu beuk-ka.

²⁹ Hataholi manatao susa uma-loon-na, neukose namopo basa hata lala'en-na, hataholi nggoak-ka, neukose nalalau-naoono hataholi manatee-tenok-ka

³⁰ Hataholi manatao malole-a, neukose so'dan-na natetu; ma hataholi manatee-tenok-ka, manatunga dean-nala boetai lamaba'uk-ka.

³¹ Metema nai daebafak ia, hataholi malole-a boeo neukose ana sipo babalak soona, tao leo bee-o hataholi mangalauk-ka, ma hataholi masala-masingok-ka, neukose hapu huhukuk.